====== សហភាពអឺរ៉ុបអះអាងថា  ស្ថានការសុំសិទ្ធិជ្រកកោននឹងត្រូវផ្តល់ជូនសម្រាប់ជនភៀសខ្លួនស៊ីរីមួយគត់ ======

(http://bayontv.com.kh/31/03/2016)

 សឺណែវ៖ គណៈកម្មាធិការទទួលបន្ទុកជនអន្តោប្រវេសន៍អឺរ៉ុប បានប្រកាសឲ្យដឹងនៅក្នុងទីក្រុងសឺណែវកាលពីថ្ងៃពុធថា ស្ថានការស្វែងរកសិទ្ធិជ្រកកោននៅអឺរ៉ុប នឹងត្រូវផ្តល់ជូនសម្រាប់តែជនភៀសខ្លួនស៊ីរីមួយគត់ ដែលត្រូវការជំនួយដ៏ចាំបាច់ពីអន្តរជាតិ។

លោកឌីមីទ្រីស អាវរ៉ាម៉ូពូឡូស គឺជាមន្ត្រីបម្រើការនៅគណៈកម្មាធិការទទួលបន្ទុកជនអន្តោប្រវេសន៍អឺរ៉ុប បានផ្តល់អនុសាសន៍បែបនេះ អំឡុងសន្និសីទកាសែតមួយ ក្រោយមានកិច្ចប្រជុំស្តីពីទំនួលខុសត្រូវសកល ចែករំលែកការទទួលយកជនជនភៀសខ្លួនស៊ីរី ដែលរៀបចំឡើងដោយគណៈកម្មាធិការសិទ្ធិមនុស្សរបស់អង្គការសហប្រជាជាតិសម្រាប់ជនភៀសខ្លួន ។

លោកឌីមីទ្រីស បាននិយាយថា ពួកលោកដឹងច្បាស់ថា ស្ថានការជនភៀសខ្លួនអាចនឹងត្រូវផ្តល់ជូនសម្រាប់អ្នកដែលត្រូវការជំនួយ និងការការពារពីអន្តរជាតិមួយគត់ ដូច្នេះត្រូវញែកឲ្យដាច់ស្រឡះពីគ្នានូវអ្វីដែលជាជនភៀសខ្លួន និងអ្វីគឺជាជនអន្តោប្រវេសន៍។ លោកបានបន្តទៀតថា វាសំខាន់ខ្លាំងណាស់ សម្រាប់អឺរ៉ុប ដើម្បីធ្វើការរួមគ្នាជាមួយទួរគី ក្នុងការដោះស្រាយបញ្ហាជនភៀសខ្លួន។

សូមបញ្ជាក់ថា ជាង៩១ភាគរយនៃជនអន្តោប្រវេសន៍ដែលបានធ្វើដំណើរមកដល់ប្រទេសក្រិក គឺមកពីបណ្តាប្រទេសដែលញាំញីដោយសារភ្លើងសង្គ្រាម ក្នុងនោះ រួមមាន ស៊ីរី , អាហ្វហ្គានីស្ថាន និងអ៊ីរ៉ាក់៕