លោក អ៉ិត សំហេង ថានឹងជួយសម្រួលពលករខ្មែរនៅថៃ ឲ្យបានចុះឈ្មោះបោះឆ្នោត បើមានសំណើពី គ.ជ.ប
(http://www.freshnewsasia.com) 2016-08-01
(ភ្នំពេញ)៖ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ លោក អ៉ិត សំហេង បានថ្លែងថា លោកនឹងជួយសម្រួលដល់ពលករខ្មែរ ដែលបម្រើការងារនៅក្នុងប្រទេសថៃ ឲ្យបានចុះឈ្មោះបោះឆ្នោតប្រសិនបើមានសំណើពីគណៈកម្មាថិការជាតិរៀបចំការបោះឆ្នោត (គ.ជ.ប)។
ការថ្លែងបញ្ជាក់របស់លោក អ៉ិត សំហេង គឺឆ្លើយតបទៅនឹងការលើកឡើងរបស់គណបក្សសង្រ្គោះជាតិ ដែលគ្រោងស្នើឲ្យក្រសួងការងារជួយសម្រួលដល់ពលករខ្មែរ ឲ្យបានចូលរួមចុះឈ្មោះបោះឆ្នោត ដែលនឹងធ្វើនៅអំឡុងខែកញ្ញា ខាងមុខនេះ។ គណបក្សសង្រ្គោះជាតិ ក៏ធ្លាប់បានចេញលិខិតទៅ គ.ជ.ប ផងដែរ ឲ្យរៀបចំការិយាល័យនៅតាមព្រំដែន ដើម្បីឲ្យពលករខ្មែរនៅថៃ បានមកចុះឈ្មោះបោះឆ្នោត ក៏ដូចជាបានចូលរួមបោះឆ្នោត។
លោក អ៉ិត សំហេង បានថ្លែងប្រាប់ក្រុមអ្នកព័ត៌មាននៅក្រោយជំនួបពិភាក្សាការងារជាមួយឯកអគ្គរដ្ឋទូតអូស្ត្រាលីថា «ចំពោះរឿងនេះ យើងត្រូវតែធ្វើទៅតាមច្បាប់ស្ដីពី ការបោះឆ្នោត បើច្បាប់តម្រូវឱ្យចុះឈ្មោះបោះឆ្នោត និងបោះឆ្នោតនៅឯណា គឺយើងត្រូវអនុវត្តតាម ព្រមទាំងអនុវត្តឱ្យស្របតាមនីតិវិធីរបស់គណៈកម្មាធិការជាតិរៀបចំការបោះឆ្នោត ហើយក្រសួងការងារចាំតែសម្រួលតាមសំណូមពររបស់ គ.ជ.ប ទេ»។