http://ann.com.kh/site/news/15107.html ថ្ងៃព្រហស្បតិ៍, 5 ខែតុលា 2017 1:43 ល្ងាច

ភ្នំពេញ៖ យោងតាមប្រភពពី សមត្ថកិច្ចកងរាជអាវុធហត្ថបានឱ្យដឹងថា នៅព្រឹកថ្ងៃទី៥ ខែតុលា ឆ្នាំ២០១៧នេះ លោក ពេជ្រ វិជ្ជាធរ ចៅក្រមស៊ើបសួរ នៃសាលាដំបូងរាជធានីភ្នំពេញ បានចេញដីកាបង្គាប់ឱ្យឃុំខ្លួន សរុប ៣នាក់ ដែលបាន ដើរប្រមូលលុយពីកុមារៗ និងអ្នកសុំទាននៅតាមស្តុប នៅពន្ធនាគារជាបណ្តោះអាសន្នហើយ។ យោងតាមប្រភពដដែលបានបញ្ជាក់ថា លោក ហោ លីណា ជាតំណាងអយ្យការកាន់សំណុំរឿង បានពិនិត្យ និងចោទប្រកាន់លើ៖ -ទី១ឈ្មោះ ឃុត នឹម ហៅ តាលឹម ភេទប្រុស អាយុ ៥៥ឆ្នាំ ជាបុគ្គលិកជាប់កិច្ចសន្យា មន្ទីរសង្គមកិច្ច-ទី២ឈ្មោះ ហឹង សារ៉ូម ហៅ តារុំ ភេទប្រុសអាយុ ៤២ឆ្នាំ ជាបុគ្គលិកជាប់កិច្ចសន្យា មន្ទីរសង្គមកិច្ច -និងទី៣ឈ្មោះ សាន សិត ភេទប្រុស អាយុ៤១ឆ្នាំ អតីតជាអ្នកសុំទាន បច្ចុប្បន្នជាអ្នកដើរប្រមូលលុយពីអ្នកសុំទានតាមភ្លើងស្តុប ឲ្យទៅឈ្មោះ ឃុត នឹម ហៅតាលឹម និងឈ្មោះ ហឹង សារ៉ូម ហៅ តារុំ។

ជននេះត្រូវជាប់ចោទ ចំនួន២បទ៖ -ទី១ បទ ញុះញង់អនីតិជនឱ្យប្រព្រឹត្តបទឧក្រិដ្ឋ ឬបទមជ្ឈិម -និងទី២ បទ កំហែងយកដោយមានស្ថានទម្ងន់ទោស ទាក់ទងទៅនឹងជនរងគ្រោះ ប្រព្រឹត្តនៅរាជធានីភ្នំពេញ យោងតាមមាត្រា ៣៤៤ មាត្រា ៣៦៣ និងមាត្រា ៣៦៥ នៃក្រមព្រហ្មទណ្ឌ។

សូមបញ្ជាក់ថា កាលពីថ្ងៃទី៣ ខែតុលា ឆ្នាំ២០១៧កន្លងទៅ កម្លាំងកងរាជអាវុធហត្ថរាជធានីភ្នំពេញ បានបញ្ជូនបុរស ទាំង ៣នាក់ខាងលើ ទៅកាន់អយ្យការអមសាលាដំបូងរាជធានីភ្នំពេញ ដើម្បីចាត់ការបន្តតាមនីតិវិធី ពាក់ព័ន្ធករណី កេងប្រវ័ញ្ចពលកម្មកុមារ និងប្រើហិង្សាគម្រាមកុមារឱ្យដើរសុំទាន។

បុរសទាំង ៣នាក់ខាងលើត្រូវបានសមត្ថកិច្ចកងរាជអាវុធហត្ថរាជធានីភ្នំពេញ សហការជាមួយ លោកស្រី មុំ ចាន់ដានី ជាប្រធានស្តីទី នៃមន្ទីរសង្គមកិច្ចអតីតយុទ្ធជន និងស្តារនិតិសម្បទា រាជធានីភ្នំពេញ ឃាត់ខ្លួនកាលពីថ្ងៃទី០១ ខែតុលា ឆ្នាំ២០១៧ កន្លងទៅ ក្រោយពីរកឃើញថាពួកគេបាន ទទួលយកផលប្រយោជន៍ពីអ្នកសុំទាន និងជារនុកក្នុងផ្តល់ព័ត៌មានដល់អ្នកសុំទាន ធ្វើការគេចខ្លួនពីការ ចុះបង្ក្រាប របស់មន្ទីរសង្គមកិច្ច និងសមត្ថកិច្ចផងដែរ។នៅចំពោះមុខសមត្ថកិច្ច បុរសទាំង ៣នាក់ បានសារភាពថា ពួកគាត់ពិតជាបានធ្វើសកម្មភាពប្រមូលលុយ ពីអ្នកសុំទានរៀងរាល់ថ្ងៃ នៅតាមភ្លើងស្តុប ដោយអ្នកសុំទានម្នាក់ត្រូវបង់ ១ម៉ឺន ទៅ ១២,០០០ រៀលក្នុង១ថ្ងៃ។

ដោយមានឈ្មោះសាន សិត ជាអ្នកដើរប្រមូលលុយប្រចាំថ្ងៃ និងក្នុងមួយអាទិត្យ ទើបយកលុយប្រគល់ឲ្យឈ្មោះ តាលឹម និងឈ្មោះ តារុំ ម្តង។ ឈ្មោះ តាលឹម យកចំណែកអ្នកដើរសុំនៅស្តុបអាងទឹក ស្តុបពេទ្យចិន ស្តុបផ្សារដើមគោ និងភូមិសាស្ត្រក្បែរគ្នា។ ឈ្មោះ តារុំ យកចំណែកអ្នកដើរសុំនៅស្តុបកាណាឌីយ៉ា ស្តុបបូកគោ និងប៉ែកខាងមាត់ទន្លេ។

ការយកលុយរបស់ តាលឹម និងតារុំ ពីអ្នកសុំទាននេះ ជាថ្នូរជាមួយនឹងការផ្តល់ព័ត៌មាន នៅពេលណាដែល មន្ទីរសង្គមកិច្ច និងសមត្ថកិច្ចចុះបោសសំអាតប្រមូលអ្នកសុំទាន អ្នកញៀនថ្នាំ និងក្មេងអានាថាតាមដងផ្លូវ តែបើពួកអ្នកសុំទានទាំងនោះ មិនព្រមបង់លុយឱ្យទេ ឈ្មោះ សាន សិត គម្រាមថា នឹងរាយការណ៍ឱ្យយខាងមន្ទីរសង្គមកិច្ចនិងសមត្ថកិច្ច ចុះចាប់ពួកគេ ក្នុងនោះក៏មាន អ្នកសុំទានជាច្រើន ពិតជាត្រូវបាន ឈ្មោះ សាន សិត រាយការណ៍ ឱ្យ តាលឹម និងតារុំ នាំក្រុមការងារសង្គមកិច្ចចុះបង្ក្រាបមែន ពេលដែលពួកគេមិនព្រមបង់លុយតាមការទាមទារ៕ដោយ៖ ឡុក សំរិត