http://www.daem-ampil-news.html ព្រហស្បតិ៍, ២២ មិថុនា ២០១៧ 10:12 ដោយ: ដើមអម្ពិល ID:014

បន្ទាយមានជ័យ៖ អាជ្ញាធរខេត្តបន្ទាយមានជ័យ ក្នុងកិច្ចប្រជុំរវាង មន្ត្រីការិយាល័យទំនាក់ទំនង កម្ពុជា-ថៃ (BLO) កាលពីថ្ងៃទី២១ ខែមិថុនា ឆ្នាំ២០១៧ នៅស្រុកអារញ្ញ ខេត្តស្រះកែវ ប្រទេសថៃ បានស្នើ ភាគីថៃ ជួយទប់ស្កាត់បទល្មើសនានា ដែលមានប្រភពចេញពីប្រទេសថៃ ។

ក្នុងកិច្ចប្រជុំនោះ លោកវរសេនីយ៍ឯក ចាប់ សុផារិទ្ធ ស្នងការរងនគរបាល ខេត្តបន្ទាយមានជ័យ អាជ្ញាធរកម្ពុជា បានលើកឡើងថា ភាគីថៃត្រូវចូលរួម ទប់ស្កាត់បទល្មើសឆ្លងដែន តាមបន្ទាត់ព្រំដែន កម្ពុជា-ថៃ ដូចជាបទល្មើសគ្រឿងញៀន, បទល្មើសជួញដូរអាវុធខុសច្បាប់, វត្ថុបុរាណ, ជួញដូរមនុស្ស និងបទល្មើសឈើគ្រូញូង ព្រមទាំងទំនិញគេចពន្ធ ដែលនាំចូលពីប្រទេសថៃ មកកាន់កម្ពុជា ។

សូមបញ្ជាក់ថា កិច្ចប្រជុំនេះភាគីកម្ពុជា មានការចូលរួមពីលោកវរសេនីយ៍ឯក ចាប សុផារិទ្ធ តំណាងលោក អ៊ុ រាត្រី អភិបាលរងខេត្តបន្ទាយមានជ័យ, លោកវរសេនីយ៍ឯក ស ប៊ុនសឿង មេបញ្ជាការរងកងរាជអាវុធហត្ថខេត្ត និងអាជ្ញាធរថ្នាក់ដឹកនាំស្រុក-ក្រុងជាប់ជាយដែន ។ ចំណែកខាងភាគីថៃរួមមាន លោក សានិត សូរិយៈគុណ អភិបាលស្រុកអារ័ញ្ញ និងមន្ត្រីពាក់ព័ន្ធជាច្រើនរូបទៀត ៕