http://www.arey-news.com/archives/ (ថ្ងៃទី 19 September 2018 ម៉ោង 9:24 pm)

ភ្នំពេញ៖ នៅថ្ងៃទី១៩ ខែកញ្ញា ឆ្នាំ២០១៨ សមត្ថកិច្ចជំនាញនៃការិយាល័យស្រាវជ្រាវបទល្មើសជួញដូរមនុស្ស កងរាជអាវុធហត្ថរាជធានីភ្នំពេញ បានបញ្ជូនជនសង្ស័យ១នាក់ ទៅសាលាដំបូងរាជធានីភ្នំពេញ ដើម្បីផ្តន្ទាទោសតាមនីតិវិធី ពាក់ព័ន្ធករណីហិង្សាគំរាមសម្លាប់ , បង្ខាំងទុក និង អំពើទារុណកម្ម ។ ជនសង្ស័យ ឈ្មោះ ព្រឿង សំអឿន ហៅសេម ភេទប្រុស អាយុ ៣៩ឆ្នាំ ធ្លាប់ជាអណិកជនរស់នៅសហរដ្ឋអាមេរិក អាចចាត់ទុកថា ជាជនកំណាចឃោរឃៅម្នាក់នៅកម្ពុជា ប្រចាំឆ្នាំ២០១៨ ដែលគួរឲ្យភ្ញាក់ផ្អើលបំផុត ដោយសមត្ថកិច្ចអាវុធហត្ថរាជធានីភ្នំពេញ ស្រាវជ្រាវឃើញថា ជននេះមានមុខរបរជាគ្រូបង្រៀនលំហាត់ប្រាណ នៅក្នុងក្លឹបស៊ុបភឺហ្វីត បានប្រព្រឹត្តអំពើ បង្ខាំងទុកនារីម្នាក់ ប្រើអំពើហិង្សា និងធ្វើទារុណកម្មផ្លូវភេទ លើជនរងគ្រោះ ឈ្មោះ ម.ហ ភេទស្រី អាយុ ២២ឆ្នាំ ជានិស្សិតឆ្នាំទី២ ព្រមទាំងបានទូរស័ព្ទទៅក្រុមគ្រួសាររបស់ជនរងគ្រោះ ប្រើពាក្យសំដីមិនសមរម្យ ប៉ះពាល់ដល់កិត្តិយសជនរងគ្រោះ និងគំរាមបង្ហោះវីដេអូរួមភេទជាមួយគ្នាផងដែរ។

ជនសង្ស័យ បានសារភាពឲ្យដឹងថា រូបខ្លួន និងជនរងគ្រោះ បានស្គាល់គ្នារយៈពេល១ឆ្នាំមកហើយ ពួកគេទាំង ២នាក់ ស្គាល់ដំបូង គឺជនរងគ្រោះតែងមកហាត់ប្រាណនៅក្នុងក្លឹបស៊ុបភឺហ្វីត រាល់ថ្ងៃ ហើយខ្លួនជាគ្រូបង្រៀនលំហាត់ប្រាណនៅទីនោះ ។ ក្រោយពេលពួកគេទាំង២នាក់ ស្គាល់គ្នាបានប្រហែល ៣សប្តាហ៍ ពួកគេទាំង២នាក់ បានស្រឡាញ់គ្នាជាសង្សារ ហើយតែងតែទូរស័ព្ទណាត់ជួបគ្នា ដើម្បីរូមភេទជាញឹកញាប់ក្នុង១សប្តាហ៍ ២ទៅ ៣ដង ហើយក្នុងពេលរួមភេទម្តងៗ ជនសង្ស័យខាងលើ តែងតែ ថតជាវីដេអូទុកផងដែរ។ លើកដំបូង ពួកគេរួមភេទ ជាមួយគ្នាក្នុងផ្ទះសំណាក់ម្តុំផ្សារសុវណ្ណា ហើយក្រោយៗមកទៀត ពួកគេបានជួលបន្ទប់ខុនដូ មួយឈ្មោះ MHM បន្ទប់លេខ១៦៤ សង្កាត់ទួលទំពូង១ ខណ្ឌចំការមន រាជធានីភ្នំពេញ ដើម្បីណាត់ជួបគ្នារួមភេទ។

តាមការបញ្ជាក់របស់នារីរងគ្រោះបានឲ្យដឹងថា ដំបូងឡើយរូបនាងពិតជាបានស្រឡាញ់ជនសង្ស័យជាសង្សារខ្លាំងណាស់ តែរយៈកាលក្រោយៗមក រូបនាងបែរជាមានការភ័យខ្លាចជាខ្លាំង ព្រោះតែជនសង្ស័យហាក់ដូចជាមនុស្សរោគចិត្ត ដ្បិតពេលរួមភេទជាមួយគ្នាម្តងៗ ជនសង្ស័យមិនត្រឹមតែថតវីដេអូទុកប៉ុណ្ណោះទេ រូបគេ(ជនសង្ស័យ) ថែមទាំងប្រើទារុណកម្មឃោរឃៅ ក្នុងពេលរួមភេទ ដូចជា ក្តិច ខ្ញាំ ខាំ ច្របាច់ មួលកដៃ និងវ៉ៃបែកមាត់ លើរូបនាងជាញឹកញាប់ រហូតដល់នាងបែកចិត្តទៅភ្ជាប់ពាក្យជាមួយអ្នកថ្មី ។ ក្រោយពេលជនសង្ស័យ បានដឹងថា នាងមានគូដណ្តឹង ជនសង្ស័យក៏បានប្រើហិង្សាលើរូប នាងចំនួន៦ដង និងគំរាមបង្ហោះវីដេអូរួមភេទជាមួយគ្នាផងដែរ។

នៅថ្ងៃទី១៥ ខែកញ្ញា ឆ្នាំ២០១៨ ខណៈដែលនារីរងគ្រោះ និងជនសង្ស័យនៅជាមួយគ្នា ស្រាប់តែគូដណ្តឹងនារីរងគ្រោះ បានឆាតមក ក៏ត្រូវជនសង្ស័យឆែកឃើញ បណ្តាលឲ្យមានការឈ្លោះប្រកែកគ្នា ហើយជនសង្ស័យបានឆាតទៅគំរាម គូដណ្តឹងនារីរងគ្រោះ ឲ្យឈប់ទាក់ទងនាងជាបន្ទាន់ បើមិនដូច្នោះទេ រូបគេនឹងធ្វើអ្វីមួយ ចំពោះគូដណ្តឹងនារីរងគ្រោះជាក់ជាមិនខាន ហើយបន្ទាប់មក ជនសង្ស័យបានបង្ខាំងនារីរងគ្រោះទុកក្នុងបន្ទប់ខុនដូ មិនឲ្យចេញទៅណា ព្រមទាំងបានចាប់បោចសក់ និងរុញផ្ទប់នារីរងគ្រោះទៅនឹងជញ្ជាំង ហើយបានខាំទៅលើជនរងគ្រោះ២កន្លែង គឺដៃ១កន្លែង និងខាំកំប៉េះគូថ១កន្លែង បន្ទាប់មកជនសង្ស័យបានកាត់ក្រណាត់អាវយឺតជាកង់ៗ បំរុងយកមក ចងដៃ ចងជើងនាង តែដោយសារនារីរងគ្រោះអង្វរពេក ទើបរូបគេមិនបានចង ហើយក៏បង្ខំនារីរងគ្រោះឲ្យទូរស័ព្ទទៅនិយាយជាមួយគូដណ្តឹង ថាពួកគេទាំង២នាក់ រស់នៅជាមួយគ្នាជារៀងរាល់ថ្ងៃ បើនាងមិនទូរស័ព្ទទៅទេ ជនសង្ស័យគំរាមថា នឹងយកកន្ត្រៃមកកាត់សក់ចេញឲ្យអស់ ហើយសម្លាប់ចោលតែម្តង ទើបនារីរងគ្រោះបង្ខំចិត្តទូរស័ព្ទទៅគូដណ្តឹង និយាយតាមការគំរាមរបស់ជនសង្ស័យ ហើយ ជនសង្ស័យបានបង្ខាំងនាងទុកនៅក្នុងបន្ទប់ខុនដូ និងយកកាំបិតចុងស្រួច សស្ញាចមួយ គំរាមនាងមិនឲ្យចេញទៅណាជាដាច់ខាត។

លុះដល់ថ្ងៃទី១៦ ខែកញ្ញា ឆ្នាំ២០១៨ ម្តាយមីងរបស់នារីរងគ្រោះ បានបាត់ដំណឹងក្មួយស្រីពេញមួយយប់ ក៏បានដាក់ពាក្យបណ្តឹង មកកាន់បញ្ជាការដ្ឋានកងរាជអាវុធហត្ថរាជធានីភ្នំពេញឲ្យជួយស្រាវជ្រាវ រហូតឈានទៅដល់រកឃើញទីតាំងបង្ខាំងទុកផ្ទាល់ ដោយមានការសហការជាមួយសមត្ថកិច្ចអាវុធហត្ថខណ្ឌចំការមន។ ពេលដែលសមត្ថកិច្ចអាវុធហត្ថចុះទៅដល់ ជនសង្ស័យមិនព្រមបើកទ្វារនោះទេ ថែមទាំងគំរាមសមត្ថកិច្ចថា រូបគេនឹងសម្លាប់នារីរងគ្រោះចោល ក្នុងបន្ទប់ទៀតផង បន្ទាប់មកជនសង្ស័យបានយក ស្ព្រាយបាញ់ទៅ លើទ្វារកញ្ចក់ មិនឲ្យសមត្ថកិច្ចមើលឃើញដល់ក្នុងបន្ទប់ បម្រុងរត់គេចខ្លួន តែមិនអាចចេញទៅណារួច ក៏ត្រូវបានកម្លាំងសមត្ថកិច្ចអាវុធហត្ថទម្លាយ ទ្វារចូលទៅឃាត់ខ្លួន និងរំដោះជនរងគ្រោះបានតែម្តង។ បន្ថែមពីករណីលើនេះទៅទៀត តាមការធ្វើតេស្តិ៍ទឹកនោមរបស់ជនសង្ស័យ សមត្ថកិច្ចអាវុធហត្ថរាជធានីភ្នំពេញ បានរកឃើញថា ជនសង្ស័យដែលជា មនុស្សកំណាចឃោរឃៅម្នាក់នេះ មានជាប់សារធាតុញៀនផងដែរ ៕