http://kampucheathmey.com/ 27/11/2019 2:29 Pm

ភ្នំពេញ ៖ ស្ត្រីចំណាស់ម្នាក់ និងបុរសម្នាក់ ត្រូវបាននគរបាលប្រឆាំងការជួញដូរមនុស្សក្នុងប្រទេសចាប់ខ្លួនបញ្ជូនឡើងតុលាការកាលពីថ្ងៃទី២៧ ខែវិច្ឆិកា ឆ្នាំ២០១៩នេះ ពាក់ព័ន្ធករណីលួងលោមក្មេងស្រីៗអាយុ១៣ឆ្នាំ ១៤ឆ្នាំ ១៥ឆ្នាំ លក់ខ្លួនឲ្យជនបរទេសនៅតាមសណ្ឋាគារ។ ជនសង្ស័យ ដែលសមត្ថកិច្ចចាប់ខ្លួនឈ្មោះអ៊ឹម សុផល ហៅយាយមី អាយុ៧៥ឆ្នាំ និងឈ្មោះ ព្រឿង ចាន់ ភេទប្រុស អាយុ៤៥ឆ្នាំ។ ជនសង្ស័យទាំង២នាក់ ត្រូវបានសមត្ថកិច្ចចាប់ខ្លួនកាលពីថ្ងៃទី២៥ ខែវិច្ឆិកា ឆ្នាំ២០១៩ នៅផ្ទះលេខ ១៨៤ ផ្លូវលេខ៤៥០ ភូមិ១ សង្កាត់ ទួលទំពួង ខណ្ឌចម្ការមន។

ពាក់ព័ន្ធការចាប់ខ្លួន ខាងលើនេះ តាមចម្លើយសារភាពរបស់យាយ មី បានឲ្យដឹងថា គាត់ពិតជាបាននាំក្មេងស្រីឲ្យទៅរួមភេទជាមួយភ្ញៀវនៅតាមផ្ទះសំណាក់ សណ្ឋាគារ ដោយទទួលបានប្រាក់ចំនួន១០០ដុល្លារ ហើយខ្លួនដកយកតែ១០ដុល្លារ ឲ្យទៅក្មេងស្រី៩០ដុល្លារ តាមតម្រូវការរបស់ភ្ញៀវ១ថ្ងៃម្ដង ឬ២ថ្ងៃម្ដង ដោយជិះផាសអាប់ នាំក្មេងស្រីទៅប្រគល់ឲ្យឈ្មោះ ឆាង ដែលជាអ្នកទាក់ទងភ្ញៀវតាមសណ្ឋាគារនានា។

ចំណែកឈ្មោះ ព្រឿង ចាន់ បានសារភាពថា ខ្លួនជាអ្នកទាក់ទងភ្ញៀវតាមសណ្ឋាគារជាមួយឈ្មោះ ឈុន ប៊ុនឆាង ហៅ ឆាង ដើម្បីផ្ដល់សេវាផ្លូវភេទដែលយាយមីនាំមក ដោយក្នុងមួយម៉ូយខ្លួនអាចបានប្រាក់កម្រៃ១០០ដុល្លារទៅ១៥០ដុល្លារ ចែកគ្នាស្មើជាមួយឈ្មោះ ឆាង។

សូមបញ្ជាក់ថា ក្នុងប្រតិបត្តិការបង្ក្រាបអំពើលក់ដូរក្មេងស្រីនេះ សមត្ថកិច្ចក៏បានរំដោះក្មេងស្រី៣នាក់ផងដែរ ក្នុងនោះមានម្នាក់អាយុ១៣ឆ្នាំ ម្នាក់ទៀតអាយុ១៤ឆ្នាំ និងម្នាក់ទៀតអាយុ១៥ឆ្នាំប៉ុណ្ណោះ។ ពួកគេសុទ្ធតែជាក្មេងស្រីមិនទាន់គ្រប់អាយុ ដែលអាណាព្យាបាលនាំមកឲ្យធ្វើការរត់តុកាហ្វេនាក្រុងភ្នំពេញ ហើយក៏ត្រូវក្រុមមនុស្សចាស់ឆ្លៀតឱកាសបោកបញ្ឆោតឲ្យលក់ខ្លួន លក់ព្រហ្មចារីឲ្យភ្ញៀវតាមនៅតាមសណ្ឋាគារនានា។ រឿងក្ដីនេះ ព្រះរាជអាជ្ញាអមតុលាការកំពុងសាកសួរជនសង្ស័យនៅឡើយ៕ មករា