ពលករខ្មែរជាង១០០នាក់ បានវិលត្រឡប់មកកាន់ខេត្តព្រះវិហារ ហើយដាក់ឲ្យនៅដាច់ដោយឡែក
http://kampucheathmey.com/ 23/3/2020 11:23 Am
ព្រះវិហារ ៖ ពលករខ្មែរចំនួនជាង១០០នាក់ គិតត្រឹមម៉ោង៨និង៣០នាទីព្រឹក បានវិលត្រឡប់មកកាន់ស្រុកកំណើតវិញ ហើយដោយមានការចុះណែនាំផ្ទាល់ពីមន្ត្រីមន្ទីរសុខាភិបាលខេត្ត និងអាជ្ញាធរ បានដាក់បងប្អូនទាំងនោះ ឲ្យនៅដោយឡែក។ នេះបើតាមប្រភពពីមន្ទីរព័ត៌មានខេត្តព្រះវិហារ គោរពរាយការណ៍ជូនលោកខៀវ កាញារីទ្ធ ហើយត្រូវបានលោករដ្ឋមន្ត្រីរូបនេះ ធ្វើការផ្សព្វផ្សាយនៅលើហ្វេសប៊ុកផ្លូវការរបស់ខ្លួននៅព្រឹកថ្ងៃទី២៣ ខែមីនា ឆ្នាំ២០២០។ មន្ទីរព័ត៌មានខេត្តព្រះវិហារ បានគោរពរាយការណ៍ជូនរដ្ឋមន្ត្រីក្រសួងព័ត៌មានដូច្នេះថា «ឯកឧត្តមរដ្ឋមន្ត្រីជូនជ្រាប ៖ ចំនួនប្រជាពលករខ្មែរ ១១៨នាក់ ស្រី៦៣នាក់ ដែលបានវិលត្រឡប់មកកាន់ស្រុកកំណើតវិញគិត ត្រឹមម៉ោង ៨:៣០នាទី ថ្ងៃទី២៣ ខែមីនា ឆ្នាំ ២០២០ ដែលមានដូចខាងក្រោម ៖
១/ស្រុករវៀងចំនួន១៨នាក់ ស្រី ១៤នាក់ មកពីប្រទេស (ថៃ១៣, ចិន០២នាក់,ម៉ាឡេស៊ី០៣នាក់) ។
២/ស្រុកគូលែនចំនួន១៣នាក់ ស្រី0៥នាក់ (ថៃ១១នាក់,ម៉ាឡេស៊ី០១នាក់ និងកូរ៉េ០១នាក់) ។
៣/ក្រុងព្រះវិហារចំនួន០៦នាក់ ស្រី០៥នាក់ (ថៃ) ។
៤/ស្រុកជ័យសែនចំនួន០៤នាក់ ស្រី០២នាក់ (ថៃ) ។
៥/ស្រុកត្បែងមានជ័យចំនួន០៥នាក់ ស្រី០២ (ថៃ) ។
៦/ស្រុកសង្គមថ្មីចំនួន៣០នាក់ ស្រី១២នាក់ (ថៃ) ។
៧/ស្រុកឆែបចំនួន៣១នាក់ ស្រី២២នាក់(ថៃ) ។
៨/ស្រុកជាំក្សាន្តចំនួន១១នាក់ ស្រី០៣នាក់។
ប្រភពបន្តថា «ដោយមានការចុះណែនាំផ្ទាល់ពីមន្ត្រីមន្ទីរសុខាភិបាលខេត្ត និងអាជ្ញាធរ បានដាក់បងប្អូនទាំងនោះឲ្យនៅដោយឡែក។ ដោយក្តីគោរពដ៏ខ្ពង់ខ្ពស់»។ គួរបញ្ជាក់ថា អ្នកឆ្លងជំងឺកូវីដ១៩ នៅកម្ពុជា គិតត្រឹម ម៉ោង១០ព្រឹក ថ្ងៃទី២៣ ខែមីនា ឆ្នាំ២០២០ មានចំនួនសរុប៨៦នាក់ហើយ ក្នុងនោះបានជាសះស្បើយ២នាក់ (ចិន១នាក់ អង់គ្លេស១នាក់)៕ សម្រួលដោយ ៖ មនោ