ពលករខ្មែរ ៣រូប ត្រឡប់ពីថៃ ឆ្លងកូវីដបំប្លែងថ្មី B.1.617 ជាប្រភេទឆ្លងខ្លាំង និងមេរោគគួរឲ្យព្រួយបារម្ភ
https://kohsantepheapdaily.com.kh/ ០៤ ខែ មិថុនា ឆ្នាំ ២០២១ ម៉ោង ២១:៥៤
រាជធានីភ្នំពេញ ៖ ក្រសួងសុខាភិបាលនៃព្រះរាជាណាចក្រកម្ពុជា នៅថ្ងៃទី០៤ មិថុនា ២០២១នេះ បានប្រកាសរកឃើញមេរោគកូវីដ-១៩ បំប្លែងខ្លួនថ្មី ប្រភេទ B.1.617 ឬ delta Variant នៅក្នុងខ្លួនពលករខ្មែរចំនួន ៣រូប ដែលត្រឡប់មកពីប្រទេសថៃ ដែលជាប្រភេទមេរោគឆ្លងខ្លាំងបំផុត និងមេរោគគួរឲ្យព្រួយបារម្ភបំផុត ។
ពលករទាំង៣នាក់ ត្រឡប់មកពីប្រទេសថៃ តាមច្រកអូស្មាច់ រួមមាន ៖
ទី១. ភេទស្រី អាយុ ២៧ឆ្នាំ កំពុងសំរាកព្យាបាលនៅមន្ទីរពេទ្យខេត្តឧត្តរមានជ័យ
ទី២. ភេទប្រុស អាយុ ៤៦ឆ្នាំ កំពុងសំរាកព្យាបាលនៅមន្ទីរពេទ្យឯកភ្នំ ខេត្តបាត់ដំបង
និងទី៣. ភេទស្រី អាយុ ៤៣ឆ្នាំ កំពុងសំរាកព្យាបាលនៅមន្ទីរពេទ្យមោងឫស្សី ខេត្តបាត់ដំបង ។
ជាការកត់សម្គាល់ឃើញថា រហូតមកដល់ពេលនេះ វីរុសបំប្លែងថ្មី ប្រភេទ B.1.617 ដែលពិភពលោកមានការព្រួយបារម្ភខ្លាំង ត្រូវបានគេរកឃើញនៅបណ្តាប្រទេសចំនួន ៧ហើយ នៅក្នុងតំបន់អាស៊ាន (ប្រទេសឥណ្ឌូណេស៊ី ប្រទេសម៉ាឡេស៊ី ប្រទេសហ្វីលីពីន ប្រទេសសិង្ហបុរី ប្រទេសថៃ ប្រទេសវៀតណាម និងប្រទេសកម្ពុជា) និងបណ្តាប្រទេសមួយចំនួនទៀត លើពិភពលោក ។