https://www.kampucheathmey.com/ ថ្ងៃសៅរ៍ ១០ កក្កដា ២០២១ដោយ Sorn Phanith

ស្ត្រីខ្មែរម្នាក់ខំប្រឹងរត់គេចចេញពីបិសាចតណ្ហា ទាំងខ្លួនកំពុងចោមពុង ដោយការរត់នេះគឺនៅលើទីសាធារណៈ រហូតធ្វើឲ្យមហាជនមួយចំនួនគិតថា នាងគឺជាមនុស្សវិកលចរិតថែមទៀតផង ព្រោះភាសាថៃក៏នាងមិនចេះមួយម៉ាត់។ យោងតាមការផ្សាយរបស់បណ្តាញព៌ត័មានក្នុងប្រទេសថៃបានបញ្ជាក់ថា ហេតុការណ៍បានកើតឡើងកាលពីថ្ងៃទី៩ ខែកក្កដា ឆ្នាំ២០២១ ត្រង់ចំណុចភូមិ១៦ ឃុំសារ៉ាដែង ស្រុកបាងណាំព្រៀវ ខេត្តឆ:ឈើងសៅ ប្រទេសថៃ។ ព័ត៌មានបានសង្កត់ធ្ងន់ថា នៅពេលនោះគេសង្កេតឃើញមាននារីម្នាក់ ដែលនៅលើរាងកាយមានតែសំពត់ចោមពុង គ្មានអាវ គ្មានស្បែកជើង បានរត់សុំឲ្យពលរដ្ឋនៅក្នុងតំបន់នោះជួយ ប៉ុន្តែអ្វីគ្មានបានការដោយសារតែនាងនិយាយទៅកាន់អ្នកដទៃគ្មានអ្នកណាស្តាប់បានមួយម៉ាត់ ដោយគេគិតថានាង គឺជាមនុស្សសតិមិនគ្រប់ ឬក៏ជាមនុស្សវិកលចរិត។

ដោយមិនអស់ចិត្តនឹងកាយវិការរបស់នាងទើបមានអ្នកភូមិម្នាក់ បានស្រែកហៅពលករខ្មែរដែលធ្វើការនៅក្បែនោះមកស្តាប់ ទើបដឹងថានាង គឺជានារីខ្មែរដែលខំចំណាយប្រាក់អស់ចំនួន ៦.២០០ បាត ដើម្បីឲ្យមេខ្យល់នាំនាងទៅរកស្វាមី ដែលកំពុងធ្វើការនៅក្នុងស្រុកណាឌី ខេត្តប្រាជីនបូរី។ ការចំណាយប្រាក់ទាំងនេះ គឺនាងត្រូវបានគេនាំឆ្លងតាមច្រករបៀងចូលទៅកាន់ស្រុកអារញ្ញប្រាថេត ទើបមានរថយន្តនីសាន់មួយគ្រឿងចាំដឹកបន្ត ដោយមានគ្នាសរុបជាង២០នាក់ ហើយនាងមានឈ្មោះ ផៃ សុភា អាយុ៣២ឆ្នាំ។

នាងបានរៀបរាប់ថា នៅពេលដែលរថយន្តទម្លាក់ពលករតាមផ្លូវអស់ គឺសល់តែនាងម្នាក់គត់ទើបតៃកុងរថយន្តបាននិយាយជាភាសាខ្មែរថា ពីឆៈឈើងសៅទៅដល់ខេត្តប្រាជីនបុរី គឺមានចម្ងាយឆ្ងាយណាស់ទៅមិនដល់ទេ ដូច្នេះនាងត្រូវសម្រាកនៅផ្ទះសំណាក់មួយយប់សិនហើយ គឺនៅពេលនោះហើយ ខណៈដែលនាងកំពុងចោមពុងបម្រុងងូតទឹកស្រាប់តែអ្នកបើករថយន្តចង់ចូលទៅចាប់នាងរំលោភ ទើបនាងខំប្រឹងរត់ចេញឲ្យគេជួយតែម្តង។ក្រោយពេលកើតហេតុពលរដ្ឋថៃ បានប្តឹងទៅក្រុមតម្រួតរួចហើយដើម្បីតាមប្រមាញ់យកអ្នកបើករថយន្តនោះមកផ្ដន្ទាទោស ព្រោះគេបានស្គាល់ស្លាកលេខរួចហើយ ដោយឡែកស្ត្រីខ្មែរក៏ត្រូវបានអ្នកភូមិជួយទាក់ទងតាមទូរសព្ទប្រាប់អស់ហើយ ដោយបច្ចុប្បន្នបញ្ហាដែលសំខាន់ជាងគេដែលពលរដ្ឋថៃបារម្ភ គឺនាងបានឆ្លងចូលទឹកដីថៃគ្មានច្បាប់អនុញ្ញាតនិងមិនទាន់បានពិនិត្យកម្តៅនិងធ្វើតេស្តរកមេរោគកូវីដ-១៩នៅឡើយ៕អត្ថបទ៖ សោ និយមរ័ត្ន