https://khmernote.com.kh/ December 9, 2021 srey nuch

ខេត្តបាត់ដំបង៖ យោងតាមការចុះផ្សាយរបស់ ក្រសួងព័ត៌មាន នៅថ្ងៃទី០៩ ខែធ្នូ ឆ្នាំ២០២១ បានឲ្យដឹងថា ជាការសាកល្បង ដំបូងដោយមានខាងអាជ្ញាធរកម្ពុជា និងអាជ្ញាធរថៃ បានសហការនាំយកពលករកម្ពុជាតាម រយៈក្រុមហ៊ុនបានបញ្ជូនពលករកម្ពុជាតាមច្រកទ្វារព្រំដែន ដូង-បានឡែម បានតិចតួចនៅឡើយ ទៅធ្វើការនៅខេត្តចាន់បូរីប្រទេសថៃ ដោយតម្រូវឱ្យធ្វើតាមលក្ខខណ្ឌរបស់អាជ្ញាធរថៃ។

លោក ប្រាក់ សំដារ៉ា នាយរងអន្តោប្រវេសន៍ប្រចាំច្រកអន្តរជាតិបានឡែម (ច្រកដូង) បានឱ្យដឹងថា ដំណើរការបញ្ជូនពលករកម្ពុជាទៅធ្វើការនៅខេត្តចាន់បូរី ប្រទេសថៃ តាមរយៈច្រកអន្តរជាតិ ដូងនេះចាប់ផ្តើមពី ថ្ងៃទី០៨ ខែធ្នូ មកដល់រសៀលថ្ងៃទី ០៩ខែធ្នូ ទើបបានប្រមាណ២០នាក់ប៉ុណ្ណោះ តាមរយៈក្រុមហ៊ុន ដែលមានថៅកែជាជនជាតិថៃ ជាអ្នកចាំធានា។ មន្រ្តីអន្តោប្រវេសន៍ខាងលើបានបន្ថែមថា ការបញ្ជូនពលករទៅធ្វើការនៅប្រទេសថៃតាមរយៈក្រុមហ៊ុន ដោយ មាន ថៅកែថៃមកធានានេះ ជាការសាកល្បងសម្រាប់ ខេត្តបាត់ដំបង និងខេត្តចាន់បូរីប្រទេសថៃប៉ុណ្ណោះ បើសិនជាដំណើរការល្អ ខាងភាគីថៃនឹងទទួលពលករមកធ្វើការនៅខេត្តចាន់បូរីនេះ ចំនួន២ម៉ឺននាក់ ។ ទោះបីយ៉ាងណាលោកបញ្ជាក់ថា មកទល់ពេលនេះមិនសូវមានពលករខ្មែរដែលចង់ទៅធ្វើការនៅខេត្តចាន់បូរីប្រទេសថៃ តាមរយៈក្រុមហ៊ុននេះច្រើននៅឡើយទេ គឺមានតិច តួចប៉ុណ្ណោះ ក្នុងរយៈពេលពីរថ្ងៃនេះ។

គួររំលឹកថា ក្នុងកិច្ចប្រជុំពិភាក្សា ដើម្បីពង្រឹងកិច្ចសម្ព័ន្ធមេត្រីភាពសហប្រតិបត្ដិការរវាងព្រះរាជាណាចក្រកម្ពុជា និងព្រះរាជាណាចក្រថៃ កាលពីថ្ងៃទី២ ខែវិច្ឆិកា ឆ្នាំ២០២១ ឯកឧត្ដម សុថេងយ៉ាំ អភិបាលខេត្ដចាន់បុរីបានបញ្ជាក់ថា ពលករកម្ពុជាដែលអាចឆ្លងដែនទៅបម្រើការងារនៅប្រទេសថៃត្រូវគោរពតាមលក្ខខណ្ឌដូចជា ពលករត្រូវមានថៅកែជាជនជាតិថៃធានា និងកំណត់កាលបរិច្ឆេទធ្វើ ដំណើរឱ្យបានជាក់លាក់ ពលករត្រូវភ្ជាប់មកនូវលិខិតធ្វើដំណើរឆ្លងដែនដែលចេញដោយប្រទេសកម្ពុជា ឬលិខិតផ្សេងៗដែលចេញដោយក្រសួងការងារ និងតម្រូវឱ្យពលករភ្ជាប់មកជាមួយនូវឯកសារភស្ដុតាងបញ្ជាក់ថាធ្វើតេស្ដអវិជ្ជមានជំងឺកូវីដ១៩ (RT-PCR/RTK) មិនឱ្យលើស ៧២ម៉ោងនោះទេ ព្រមនឹងបណ្ណចាក់វ៉ាក់សាំងបាន ២លើកដែលយ៉ាង ហោចណាស់ ត្រូវបានចាក់វ៉ាក់លើសពី ១៤ថ្ងៃឡើង ។ ឯកឧត្ដមបន្ថែមថា ពលករកម្ពុជាតម្រូវឱ្យធ្វើចត្តាឡីស័កយ៉ាងតិចបំផុត ៧ថ្ងៃ និងត្រូវតេស្ដរកជំងឺកូវីដ១៩ ២លើកក្នុងពេលកំពុងធ្វើចត្តាឡីស័ក ដោយលើកទី១ ត្រូវតេស្ដនៅថ្ងៃដំបូងនៃការធ្វើចត្តាឡីស័ក និងតេស្ដលើកទី២ នៅថ្ងៃទី៦ ឬទី៧ នៃការធ្វើចត្តាឡីស័ក បើសិនជាការធ្វើចត្តាឡីស័កឆ្លងកាត់ការតេស្ដរកឃើញថាអវិជ្ជមានជំងឺកូវីដ១៩ ពលករកម្ពុជាអនុញ្ញាតឱ្យបម្រើការងារនៅក្នុងប្រទេសថៃបានរយៈពេល៣០ថ្ងៃប៉ុណ្ណោះក្នុងការបោះត្រាម្ដង៕