https://www.khmertimeskh.com/ November 14, 2021

យោងតាមការសិក្សាដោយនាយកដ្ឋានការងាររបស់ប្រទេសថៃនៅក្នុងខែឧសភា បានរកឃើញថា ប្រតិបត្តិករអាជីវកម្មថៃ ត្រូវការពលករកម្ពុជាចំនួន ១៣០,១៣៨ នាក់, ពលករមីយ៉ាន់ម៉ា ចំនួន២៥៦,០២៩ នាក់ និងពលករឡាវចំនួន ៣៨,៥៣៦ នាក់ សម្រាប់អាជីវកម្មរបស់ពួកគេ។ ការងារភាគច្រើនគឺនៅក្នុងវិស័យកសិកម្ម ចិញ្ចឹមសត្វ សំណង់ សេវាកម្មបដិសណ្ឋារកិច្ច និងវិស័យកាត់ដេរ។

សហព័ន្ធឧស្សាហកម្មថៃ (FTI) បាននិយាយថា ខ្លួនរំពឹងថានឹងត្រូវការពលករពី ៣០០,០០០ ទៅ ៥០០,០០០នាក់ បន្ទាប់ពីរដ្ឋាភិបាលបានអនុវត្តវិធានការបិទប្រទេស ដើម្បីទប់ស្កាត់ការរីករាលដាលនៃមេរោគ។ សហព័ន្ធឧស្សាហកម្មថៃ (FTI) មានការព្រួយបារម្ភថា ពលករចំណាកស្រុកដែលចូលប្រទេសថៃដោយលួចលាក់និងមិនបានធ្វើតេស្តរកមេរោគកូវីដ-១៩ អាចបង្ករឱ្យមានការឆ្លងថ្មីជាចង្កោម ។ វិស័យឯកជនកំពុងអំពាវនាវឱ្យរដ្ឋាភិបាលពន្លឿនការអនុញ្ញាតឱ្យពលករចំណាកស្រុកដែលចាក់វ៉ាក់សាំងបង្ការរួចចូលធ្វើការវិញ ក្រោមអនុស្សរណៈយោគយល់គ្នា (MoU) ដែលត្រូវបានចុះហត្ថលេខាជាមួយប្រទេសជិតខាង។

លោក Tanit Sorat អនុប្រធានសហភាពនិយោជកនៃពាណិជ្ជកម្ម និងឧស្សាហកម្មថៃបាននិយាយថា រដ្ឋាភិបាលគួរតែអនុញ្ញាតឱ្យពលករដែលចាក់វ៉ាក់សាំងរួចមកពីប្រទេសមីយ៉ាន់ម៉ា ឡាវ និងកម្ពុជា ក្រោមអនុស្សរណៈយោគយល់គ្នា MoU ចូលប្រទេសថៃក្នុងខែនេះជំនួសឱ្យខែធ្នូ។ លោកបានបន្តថា៖ «តម្រូវការកម្លាំងពលកម្មបរទេសកំពុងកើនឡើងនៅពេលនេះ បន្ទាប់ពីប្រទេសថៃបានបើកដំណើរការឡើងវិញនៅថ្ងៃទី១ ខែវិច្ឆិកា»។ «កំណើននៃការនាំចេញ និងការនាំចូលក៏បណ្ដាលអោយខ្វះខាតយ៉ាងខ្លាំងនៃពលករគ្មានជំនាញ»។ លោក Tanit បាននិយាយថា កិច្ចប្រជុំរួមគ្នារវាងក្រសួងការងារ និងទីភ្នាក់ងារពាក់ព័ន្ធនាពេលថ្មីៗនេះ បានយល់ព្រមពន្យារពេលអនុវត្ត MoU សម្រាប់ពលករបរទេសដែលចាក់វ៉ាក់សាំងរួចមកពីប្រទេសជិតខាងទាំងបីប្រទេសរហូតដល់ខែធ្នូ។

លោកបានមានប្រសាសន៍ថា “MOU គួរតែត្រូវបានចុះហត្ថលេខា និងអនុវត្តនៅក្នុងខែនេះ ដោយសារតែនីតិវិធីពិនិត្យពិនិត្យពលករដែលចាក់វ៉ាក់សាំងរួចចំណាយពេលយូរ”។ យោងតាមលោក Tanit សហព័ន្ធនិយោជកបានស្នើឱ្យនិយោជកទទួលបន្ទុកក្នុងការផ្តល់វ៉ាក់សាំងសម្រាប់ពលករបរទេស និងឧបត្ថម្ភធនលើការចំណាយសម្រាប់វិធានការចត្តាឡីស័ករយៈពេល១៤ ថ្ងៃមុនពេលពួកគេចាប់ផ្តើមធ្វើការ។ លោកក៏បានស្នើឲ្យរដ្ឋាភិបាលកែប្រែបទប្បញ្ញត្តិដែលអនុញ្ញាតឲ្យបុគ្គលិកផ្លាស់ប្តូរការងារបន្ទាប់ពីធ្វើការបានតែមួយខែប៉ុណ្ណោះ។ លោក Tanit បាននិយាយថា ពលករចំណាកស្រុកដើរតួនាទីយ៉ាងសំខាន់ក្នុងសេដ្ឋកិច្ច ដោយនិយាយថា ប្រជាជនថៃមានការស្ទាក់ស្ទើរក្នុងការងារក្នុងវិស័យឧស្សាហកម្មមួយចំនួន។ លោកបន្តថា តម្រូវការពលករបរទេសទំនងជាមានចំនួនលើសពីការព្យាកររបស់ក្រសួងការងារដែលរំពឹងថាប្រទេសថៃត្រូវការពលករបរទេសចំនួន ៤២០,០០០ នាក់។លោកបានព្យាករណ៍ថា តម្រូវការនឹងកើនឡើងបន្ថែមទៀតនៅឆ្នាំក្រោយ។