https://www.khmertimeskh.com/ November 19, 2021 Khmer Times

សាលាក្រុងបានចាប់ផ្តើមធ្វើបច្ចុប្បន្នភាពមូលដ្ឋានទិន្នន័យ របស់ខ្លួនអំពីពលករចំណាកស្រុកមកពីប្រទេសកម្ពុជា ឡាវ និងមីយ៉ាន់ម៉ា ដែលបច្ចុប្បន្នកំពុងរស់នៅ និងធ្វើការនៅទីក្រុងបាងកក ដោយតម្រូវឱ្យទាំងកម្មករ និងនិយោជករបស់ពួកគេបញ្ជូនព័ត៌មានផ្ទាល់ខ្លួន និងព័ត៌មានការងាររបស់ពួកគេឡើងវិញ។

លោក Khachit Chatchawanit ស្មៀនសាលាក្រុងបាននិយាយថា នៅពេលដែលស្ថានការណ៍ជំងឺកូវីដ-១៩ បានថមថយ ការធ្វើបច្ចុប្បន្នភាពនៃមូលដ្ឋានទិន្នន័យពលករចំណាកស្រុកបានចាប់ផ្តើមកាលពីថ្ងៃច័ន្ទ ដើម្បីប្រមូលព័ត៌មានថ្មីៗអំពីពលករចំណាកស្រុក ដែលនេះមានសារៈសំខាន់សម្រាប់ការគ្រប់គ្រងការងាររបស់កម្មករទាំងនេះខណៈដែលនៅតែបន្តដោះស្រាយជាមួយនឹងជំងឺរាតត្បាត។លោកបានបន្តថាផ្នែកចុះឈ្មោះពលករចំណាកស្រុកនៅការិយាល័យស្រុកទាំង ៥០ ឥឡូវនេះកំពុងទទួលចុះឈ្មោះកម្មករយ៉ាងច្រើនបំផុត ៣០ នាក់ក្នុងមួយថ្ងៃចាប់ពីថ្ងៃច័ន្ទដល់ថ្ងៃសុក្រ ហើយច្រើនបំផុត ៥០ នាក់ជារៀងរាល់ថ្ងៃសៅរ៍។ លោកបាននិយាយទៀតថា អ្នកដែលមានបំណងមកកាន់ការិយាល័យខណ្ឌទាំងនេះ ដើម្បីធ្វើបច្ចុប្បន្នភាពព័ត៌មានរបស់ខ្លួន គឺតម្រូវឱ្យណាត់ជាមុន ដើម្បីធានាថាការិយាល័យមិនមានមនុស្សច្រើនពេក។ លោកបាននិយាយថា ថៅកែដែលជួលកម្មករកម្ពុជា ឡាវ និងមីយ៉ាន់ម៉ា ក៏តម្រូវឱ្យដាក់សំណើរបស់ពួកគេតាមអនឡាញដើម្បីធ្វើបច្ចុប្បន្នភាពព័ត៌មានការងារ និងសម្រាប់អត្តសញ្ញាណប័ណ្ណថ្មីសម្រាប់ពលករចំណាកស្រុករបស់ពួកគេ។

លោកបានបន្តថា ចាប់ពីថ្ងៃទី២២ ខែវិច្ឆិកា តទៅ ការដាក់ពាក្យនឹងត្រូវអនុញ្ញាតឲ្យធ្វើឡើងតាមគេហទំព័រ http://nonthaiidbkk.bangkok.go.th។ លោកបាននិយាយថា រដ្ឋបាលក្រុងបាងកកក៏មានគម្រោងប្រើប្រាស់កម្មវិធីទូរស័ព្ទដូចជា Thai Chana និង Mor Chana ដើម្បីតាមដានពលករចំណាកស្រុកសម្រាប់ជួយដល់ការគ្រប់គ្រងជំងឺកូវីដ-១៩ ។ លោកបាននិយាយទៀតថា កម្មវិធីទាំងនេះនឹងផ្តល់ភាពកាន់តែងាយស្រួលសម្រាប់កម្មករ និងថៅកែរបស់ពួកគេផងដែរ ដោយសារតែពួកគេមិនចាំបាច់ផ្តល់ឯកសារការធ្វើដំណើររបស់ពួកគេដោយផ្ទាល់ដៃដូចដែលពួកគេធ្លាប់ធ្វើពីមុនមក។ លោកបាននិយាយថា ទាំងថៅកែ និងកម្មករចំណាកស្រុករបស់ពួកគេនៅតែតម្រូវឱ្យអនុវត្តតាមវិធានការត្រួតពិនិត្យជំងឺកូវីដ-១៩ យ៉ាងតឹងរ៉ឹង រួមទាំងវិធានការកំណត់ជំងឺកូវីដ-១៩ ផងដែរ។ ប្រភពៈ Bangkokpost