https://www.khmertimeskh.com/ Khmer Times September 23, 2021

ប៉ូលីសអន្តោប្រវេសន៍រំពឹងថា ពលករខុសច្បាប់មកពីប្រទេសជិតខាង នឹងវិលត្រឡប់មកប្រទេសថៃវិញ ខណៈប្រទេសនេះនឹងចាប់ផ្តើមបើកអាជីវកម្មច្រើនឡើងវិញ។ លោកឧត្តមសេនីយ៍ទោ Archayon Kraithong អ្នកនាំពាក្យការិយាល័យអន្តោប្រវេសន៍ បាននិយាយកាលពីថ្ងៃពុធថា និន្នាការនៃការចូលមកប្រទេសថៃដោយខុសច្បាប់បានកើនឡើង ខណៈពួកគេត្រូវបានទាក់ទាញអោយត្រលប់ទៅវិញដោយសារអាជីវកម្មបានបើកឡើងវិញបន្ទាប់ពីរដ្ឋាភិបាលបានបន្ធូរបន្ថយវិធានការរឹតត្បិត។ លោកបាននិយាយនៅក្នុងបទសម្ភាសន៍ជាមួយវិទ្យុជូឡានៃសាកលវិទ្យាល័យជូឡាឡុងកនថា កម្មករមកពីប្រទេសជិតខាងជាពិសេសពលករមកពីប្រទេសកម្ពុជាមានបំណងវិលត្រឡប់មករកការងារធ្វើនៅប្រទេសថៃវិញ។ លោកបានបន្ថែមថា“ មួយចំនួនធំនៃអ្នកដែលត្រូវចាប់ខ្លួននៅព្រំដែនមានប័ណ្ណការងារ។

ប្រទេសថៃបានបិទព្រំដែនគោកទាំងអស់ ហើយអនុញ្ញាតអោយតែជនជាតិថៃវិលត្រឡប់មកវិញនិងទំនិញពាណិជ្ជកម្មឆ្លងដែនចូលប៉ុណ្ណោះ។ ពលករបរទេសក៏មិនត្រូវបានអនុញ្ញាតអោយចាកចេញទៅប្រទេសកំណើតរបស់ពួកគេផងដែរ។”ថ្វីបើមានការបិទព្រំដែនក៏ដោយក៏ពលករចំណាកស្រុកជាច្រើនបានរត់ចេញពីប្រទេសកាលពីខែមុនដោយសារពួកគេគ្មានការងារធ្វើក្នុងកំឡុងពេលជាប់គាំងនៅក្នុងប្រទេសថៃឬពួកគេចង់វិលត្រឡប់ទៅប្រទេសរបស់ពួកគេវិញដើម្បីចាក់វ៉ាក់សាំង។

ឧត្ដមសេនីយ៍ទោ Archayon បាននិយាយថានិន្នាការនេះត្រូវបានបញ្ច្រាស់វិញនៅខែនេះដោយសារមានមនុស្សជាច្រើនទៀតត្រូវបានចាប់ខ្លួនដោយព្យាយាមលួចចូលប្រទេស ដោយលោកមិនបានផ្តល់តួលេខទេ។ ប៉ុន្តែទិន្នន័យពីមជ្ឈមណ្ឌលគ្រប់គ្រងស្ថានភាពកូវីដ-១៩ មិនបានបង្ហាញពីការកើនឡើងគួរឱ្យកត់សម្គាល់នៃអ្នកចូលខុសច្បាប់ទេ។ ស្ថាប័ននេះបង្ហាញថាមានជនបរទេសចំនួន ៤,៦០០ នាក់មកពីប្រទេសជិតខាងទាំងបួនត្រូវបានចាប់ខ្លួនកាលពីខែមុនហើយមាន ៤,១០០ នាក់ត្រូវបានចាប់ខ្លួនក្នុងរយៈពេល ២១ ថ្ងៃដំបូងនៃខែនេះ។ ពលករ ចំណាកស្រុកភាគច្រើនមកពីប្រទេសកម្ពុជាដែលលួចចូលមកប្រទេសថៃវិញដើម្បីរកការងារត្រូវបានសម្របសម្រួលដោយមេខ្យល់ដែលមានការរៀបចំល្អទាំងការរត់ពន្ធកម្មករឆ្លងដែនក៏ដូចជាការស្វែងរកនិយោជក ដោយមេខ្យល់ទាំងនោះនិយាយថានៅទីនោះមានប្រាក់ឈ្នួលខ្ពស់ជាង។ អ្នកឆ្លងព្រំដែនភាគច្រើនគឺជាពលករខុសច្បាប់ ខណៈដែលអ្នកខ្លះមានទិដ្ឋាការត្រឹមត្រូវនិងលិខិតអនុញ្ញាតអោយធ្វើការងារ ទោះបីជាចំនួនពិតប្រាកដនៃប្រភេទពលករនីមួយៗមិនត្រូវបានបញ្ជាក់ក៏ដោយ៕ bangkokpost