https://www.khmertimeskh.com/501162307//?p=1162307 Khmer Times October 4, 2022

សមាជិកសភាបក្សប្រឆាំងមួយរូបបានអំពាវនាវឱ្យរដ្ឋបាលសហព័ន្ធគឺលោក Putrajaya ហាមប្រាមជនជាតិម៉ាឡេស៊ីជាបណ្តោះអាសន្នពីការត្រូវបានជ្រើសរើសឱ្យធ្វើការនៅក្នុងប្រទេសកម្ពុជារហូតដល់ក្រុមអ្នកឆបោកការងារនៅទីនោះត្រូវបានចាប់ខ្លួន។ ខណៈដែលកោតសរសើររអាជ្ញាធរក្នុងការជួយសង្គ្រោះជនរងគ្រោះម៉ាឡេស៊ីចំនួន២៦១ នាក់ពីការបោកប្រាស់ការងារនៅប្រទេសកម្ពុជាមកទល់ពេលនេះ សមាជិកសភា Bukit Mertajam លោក Steven Sim បាននិយាយថា វាមិនច្បាស់ទេថា តើពលរដ្ឋប៉ុន្មាននាក់ត្រូវបានបង្ខាំងដោយក្រុមឆបោកនៅទីនោះ។លោកបានបន្តថា មានអ្នកខ្លះអះអាងថាចំនួនពិតមានរាប់ពាន់នាក់ ដោយបន្ថែមថាពួកគេជាជនរងគ្រោះដោយការជួញដូរមនុស្ស។ លោកបានថ្លែងក្នុងការអំពាវនាវឲ្យផ្អាកនេះថា៖ «ជីវិតរបស់ប្រជាជនម៉ាឡេស៊ីមិនគួរត្រូវបានយកមកលេងសើចទេ ប្រសិនបើរដ្ឋាភិបាលកម្ពុជាមិនអាចធានាការពាសុវត្ថិភាពរបស់ប្រជាជនយើងនៅពេលពួកគេនៅទីនោះ»។ នៅក្នុងសេចក្តីថ្លែងការណ៍មួយ Sim ក៏បាននិយាយផងដែរថា គួរតែមានយន្តការពិសេសមួយសម្រាប់ការរាយការណ៍ករណីបែបនេះ ដែលពាក់ព័ន្ធនឹងភ្នាក់ងារផ្សេងៗ ដើម្បីធានាការវិលត្រឡប់ប្រកបដោយសុវត្ថិភាពនៃជនរងគ្រោះ និងការគាំទ្រសម្រាប់សមាជិកគ្រួសាររបស់ពួកគេ។

លេខាធិការរៀបចំ DAP បានជំរុញឱ្យនគរបាលចាត់វិធានការប្រឆាំងនឹងភ្នាក់ងារក្នុងស្រុកដែលពាក់ព័ន្ធនឹងការបោកប្រាស់ជនរងគ្រោះ និងអ្នកផ្សាយពាណិជ្ជកម្មដែលបានផ្សព្វផ្សាយការងារក្លែងក្លាយជាសាធារណៈ។ លោកបាននិយាយថា អាជ្ញាធរនៅទូទាំងអាស៊ីអាគ្នេយ៍ត្រូវចាត់វិធានការតឹងរ៉ឹង ដើម្បីដោះស្រាយបញ្ហានេះ ដោយតំបន់នេះទទួលបានឈ្មោះជាចំណុចក្តៅនៃការជួញដូរមនុស្ស។ លោកបានបន្ថែមថា គួរតែមានការអនុវត្ត និងគោលនយោបាយការពារកម្មករតឹងរ៉ឹង ជាងមុន បើមិនដូច្នេះទេ យើងនឹងមើលឃើញការធ្លាក់ចុះនៃការធ្វើអាជីវកម្ម និងការវិនិយោគ។ លោកបានបន្តថា៖ «ប្រទេសម៉ាឡេស៊ីត្រូវតែនាំមុខក្នុងកម្រិតអាស៊ានបង្កើតកិច្ចសហប្រតិបត្តិការក្នុងតំបន់ដើម្បីប្រឆាំងនឹងការជួញដូរមនុស្ស»។

កាលពីថ្ងៃសុក្រ Bukit Aman បាននិយាយថា នៅមានជនជាតិម៉ាឡេស៊ីរងគ្រោះដោយសារការឆបោកការងារចំនួន១៧៤ នាក់ដែលកំពុងជាប់គាំងនៅបរទេស។ របាយការណ៍ចំនួន ២២៤ត្រូវបានបញ្ជូនទៅនគរបាលចាប់តាំងពីឆ្នាំមុនដែលពាក់ព័ន្ធនឹងជនរងគ្រោះចំនួន២៨៤នាក់។

យោងតាមនគរបាលបានឲ្យដឹងថា ជនរងគ្រោះប្រមាណ ១១០ នាក់ត្រូវបានជួយសង្គ្រោះ និងនាំត្រឡប់មកប្រទេសម៉ាឡេស៊ីវិញ។ ឆ្លើយតបទៅនឹង Sim ដែលមិនមានភាពប៉ិនប្រសព្វខាងនយោបាយ និងការទូត មន្ត្រីដែលដឹងពីនីតិវិធីទិដ្ឋាការការងារនៅស្ថានទូតកម្ពុជានៅទីក្រុងគូឡាឡាំពួរ បាននិយាយថា ការលើកឡើង និងការអំពាវនាវរបស់អ្នកនយោបាយនេះគ្រាន់តែជាការឃោសនា ដើម្បីព្យាយាមបង្កើតឱកាសនយោបាយដើម្បីផលប្រយោជន៍ផ្ទាល់ខ្លួនប៉ុណ្ណោះ។ “ជនជាតិម៉ាឡេស៊ីដែលមានការងារស្របច្បាប់ដែលបានធ្វើដំណើរមកកម្ពុជាទទួលបានទិដ្ឋាការត្រឹមត្រូវដោយបានផ្តល់ឯកសារពេញលេញដល់ផ្នែកទីប្រឹក្សានៃស្ថានទូតកម្ពុជា ហើយនេះរួមបញ្ចូលទាំងឯកសារចុះបញ្ជីពន្ធរបស់ក្រុមហ៊ុន លិខិតការងារ វិញ្ញាបនបត្រចុះបញ្ជីក្រុមហ៊ុន និងឯកសារពាក់ព័ន្ធ។

មន្ត្រីសុំមិនបញ្ចេញអត្តសញ្ញាណម្នាក់បាននិយាយថា៖ «វាជារឿងអកុសលដែលអ្នកនយោបាយនេះព្យាយាម ចង់បានផលប្រយោជន៍ពីភាពល្ងង់ខ្លៅរបស់ខ្លួន ជំនួសឲ្យការអប់រំយុវជនឲ្យអនុវត្តនីតិវិធីការងារឲ្យបានត្រឹមត្រូវរបស់ប្រទេសកម្ពុជា គាត់កំពុងប្រកាន់យកវិធីសាស្ត្រយកចិត្តសាធារណជនដើម្បីអំពាវនាវឲ្យមានការហាមប្រាម»៕