https://www.khmertimeskh.com/501144454//?p=1144454 Khmer Times September 4, 2022

ក្រសួងការបរទេសវៀតណាមបាននិយាយថា ជនជាតិវៀតណាមចំនួន ៨៩ នាក់ត្រូវបានជួយសង្គ្រោះ និងធ្វើមាតុភូមិនិវត្តន៍ពីប្រទេសកម្ពុជា បន្ទាប់ពីត្រូវបានគេបោកបញ្ឆោតឱ្យទទួលយក “ការងារងាយស្រួលដែលមានប្រាក់ខែខ្ពស់” ដោយក្រុមជួញដូរមនុស្ស។ ក្រសួងបានរាយការណ៍ថា ក្នុងចំណោមបុគ្គលដែលត្រូវបានជួយសង្គ្រោះ មាន ៦៣នាក់ បានចូលប្រទេសវៀតណាមកាលពីថ្ងៃទី ២៩ ខែសីហា តាមរយៈប៉ុស្តិ៍ការពារព្រំដែន Ha Tien ក្នុងខេត្ត Kien Giang ភាគនិរតីនៃប្រទេសវៀតណាម ដោយសារកិច្ចសហប្រតិបត្តិការរវាងអគ្គកុងស៊ុលវៀតណាមប្រចាំក្រុងព្រះសីហនុ និងអាជ្ញាធរពាក់ព័ន្ធកម្ពុជា។ ក្រសួងបាននិយាយថា បីថ្ងៃក្រោយមក ក្នុងកិច្ចខិតខំប្រឹងប្រែងចុងក្រោយរបស់ខ្លួនក្នុងការជួយសង្គ្រោះជនរងគ្រោះដោយការជួញដូរមនុស្សពីប្រទេសកម្ពុជា ស្ថានទូតវៀតណាមនៅទីក្រុងភ្នំពេញបានធ្វើមាតុភូមិនិវត្តន៍ពលរដ្ឋវៀតណាមចំនួន ២៦ នាក់បន្ថែមទៀតតាមរយៈច្រកព្រំដែន Tinh Bien ក្នុងខេត្ត An Giang របស់វៀតណាម។

បុគ្គលទាំងនេះរួមមានជនជាតិវៀតណាម ១១នាក់ ដែលត្រូវបានជួយសង្គ្រោះពីកាស៊ីណូ Rich World ដែលមានមូលដ្ឋាននៅខេត្តកណ្តាល ជាទីដែលជនជាតិវៀតណាមចំនួន ៤២នាក់ បានរត់ចេញ និងព្យាយាមហែលឆ្លងទន្លេ Binh Di ចូលទៅក្នុងខេត្ត An Giang កាលពីថ្ងៃទី ១៨ ខែសីហា។ ក្នុងចំណោមអ្នករត់គេចខ្លួនទាំងនេះ ៤០នាក់បានទៅដល់ប្រទេសវៀតណាម ម្នាក់បានស្លាប់ក្នុងអំឡុងពេលឆ្លងទន្លេ ហើយអ្នកដែលនៅសល់ត្រូវបានចាប់ខ្លួនដោយឆ្មាំកាស៊ីណូ ទោះបីជាយ៉ាងណា ក្រោយមកគាត់ត្រូវបានជួយសង្គ្រោះ និងធ្វើមាតុភូមិនិវត្តន៍។ ដូច្នេះ ជនជាតិវៀតណាមសរុបចំនួន ៨៩នាក់ ត្រូវបានជួយសង្គ្រោះ និងនាំយកពីកម្ពុជាមកប្រទេសវិញក្នុងរយៈពេលមួយសប្តាហ៍កន្លងមកនេះ។

ក្រសួងបាននិយាយនៅក្នុងសេចក្តីថ្លែងការណ៍មួយកាលពីថ្ងៃព្រហស្បតិ៍ថា “ភ្នាក់ងារតំណាងវៀតណាមនៅកម្ពុជាកំពុងផ្ទៀងផ្ទាត់អត្តសញ្ញាណពលរដ្ឋវៀតណាមផ្សេងទៀត ដែលត្រូវបានជួយសង្គ្រោះដោយអាជ្ញាធរកម្ពុជា ប៉ុន្តែមិនមានឯកសារអត្តសញ្ញាណផ្ទាល់ខ្លួន ដើម្បីធានាថាបុគ្គលទាំងនេះត្រូវបានធ្វើមាតុភូមិនិវត្តន៍ឱ្យបានឆាប់តាមដែលអាចធ្វើទៅបាន” ។ តាមរយៈការសហការជាមួយអាជ្ញាធរកម្ពុជា ទីភ្នាក់ងារនេះបានធ្វើមាតុភូមិនិវត្តន៍ប្រជាពលរដ្ឋជាង ៦០០ នាក់ មកទល់ពេលនេះ ដែលត្រូវបានបោកបញ្ឆោតដោយក្រុមជួញដូរមនុស្សឱ្យមកធ្វើការក្នុងប្រទេសកម្ពុជាក្នុងស្ថានភាពវេទនា។

លោកវរសេនីយ៍ទោ Khong Ngoc Oanh ពីនាយកដ្ឋាននគរបាលព្រហ្មទណ្ឌ នៃក្រសួងសន្តិសុខសាធារណៈ បានប្រាប់កាសែត Tuoi Tre (យុវជន) ថា ជនជាតិវៀតណាមរាប់ពាន់នាក់ប្រហែលជាត្រូវបានរត់ពន្ធចូលមកកម្ពុជាក្នុងការបោកប្រាស់បែបនេះ។ លោក Oanh បាននិយាយថា ជនជាតិវៀតណាមដែលត្រូវបានជួយសង្គ្រោះទាំងអស់បានចូលរួមក្នុងការងារខុសច្បាប់ ឬក្លាយជាជនរងគ្រោះនៃពលកម្មដោយបង្ខំ ឬការកេងប្រវ័ញ្ចកម្លាំងពលកម្ម ដោយលោកបន្ថែមថា វាមានការលំបាកសម្រាប់អាជ្ញាធរក្នុងការផ្ទៀងផ្ទាត់ករណី ការពារ និងសង្គ្រោះជនរងគ្រោះទាំងនោះ។

ក្រសួងការបរទេសបាននិយាយថា ខ្លួន និងភ្នាក់ងារតំណាងវៀតណាមផ្សេងទៀតនៅក្នុងប្រទេសកម្ពុជានឹងបន្តកិច្ចខិតខំប្រឹងប្រែងរបស់ពួកគេដើម្បីកំណត់អត្តសញ្ញាណ ជួយសង្គ្រោះ និងធ្វើមាតុភូមិនិវត្តន៍ពលករវៀតណាមដែលត្រូវបានបោកបញ្ឆោតចូលមកកម្ពុជាដើម្បីធ្វើការជាកម្មករខុសច្បាប់ ឬដោយបង្ខំ។ យោងតាមក្រសួងបានឲ្យដឹងថា មនុស្សដែលត្រូវបានគេបោកប្រាស់និងបញ្ជូនមកប្រទេសកម្ពុជាក្នុងករណីបោកប្រាស់ការងារបែបនេះមកពីប្រទេសជាច្រើនផ្សេងគ្នានេះ។ ក្រសួងបញ្ជាក់ថា អាជ្ញាធរកម្ពុជាបានបើកការចុះត្រួតពិនិត្យ និងឆ្មក់ចូលជាច្រើនកន្លែងលើគ្រឹះស្ថានដែលជួលពលករបរទេស ដើម្បីជួយសង្គ្រោះជនរងគ្រោះពីការជួញដូរមនុស្ស ខណៈដែលប្រទេសពាក់ព័ន្ធបាននិងកំពុងព្យាយាមបង្ក្រាបសកម្មភាពដែលទាក់ទាញ និងបញ្ជូនមនុស្សមកកម្ពុជាដោយការឆ្លងព្រំដែនខុសច្បាប់។ Tuoi Tre News