https://cen.com.kh/ Posted ByLeng KhunMay 6, 2022

ថ្មីៗនេះ (ថ្ងៃទី៤ ខែឧសភា ឆ្នាំ២០២២) តាមរយៈគណនីហ្វេសប៊ុកឈ្មោះ Nor Inee បានបង្ហោះវីដេអូចំនួន២ឃ្លីប បង្ហាញស្រ្តីខ្មែរឥស្លាមម្នាក់ បានលើកដៃសំពះសុំអង្វរដល់ថ្នាក់ដឹកនាំនៃក្រសួងពាក់ព័ន្ធ មេត្តាជួយគាត់ផង បន្ទាប់ពីក្រុមហ៊ុនខ្មែរមួយបញ្ជូនគាត់មកកាន់ប្រទេសអារ៉ាប់ ពុំអើពើជួយដោះស្រាយឲ្យគាត់បានវិលត្រឡប់មកផ្ទះវិញ។ ស្រ្តីរងគ្រោះរូបនេះ ដែលមានឈ្មោះ សាលេស ម៉ាស់ បានរៀបរាប់ឲ្យដឹងថា គាត់រស់នៅភូមិស្រះ ឃុំពពេល ស្រុកពញាក្រែក ខេត្តត្បូងឃ្មុំ។ គាត់បានមកធ្វើការនៅប្រទេសអារ៉ាប់ អស់រយៈពេល ៣ ឆ្នាំហើយ ដោយមកតាមរយៈក្រុមហ៊ុនមួយឈ្មោះ តាជី ស្រីម៉ាន់ (នៅគីឡូលេខ៧)។ ក្នុងនោះ គាត់បានបញ្ចេញឲ្យដឹងថា ថៅកែរបស់គាត់ធ្វើបាប ដោយអត់ឲ្យដេក ហូបចុកគ្រប់គ្រាន់ទេ និងសូម្បីហាមមិនឲ្យទូរស័ព្ទប្រើ និងប្រើទង្វើដ៏មិនគប្បីផ្សេងៗទៀត ដែលធ្វើឲ្យគាត់មិនអាចទ្រាំតទៅទៀតបាន។ គាត់បន្តថា ថៅកែរបស់គាត់ បានបញ្ជូនគាត់មកដាក់នៅក្រុមមួយឈ្មោះ រីហ្សត អស់រយៈពេល ៥ ខែហើយ ប៉ុន្តែ បើទោះជាគាត់បានព្យាយាមទាក់ទងខាងក្រុមហ៊ុនខ្មែរឲ្យជួយដោះស្រាយយ៉ាងណា ក៏ខាងក្រុមហ៊ុនខ្មែរខាងលើមិនឆ្លើយតបនោះទេ។ អាស្រ័យហេតុនេះ គាត់ក៏សូមថ្នាក់ដឹកនាំនៃក្រសួងពាក់ព័ន្ធ ជាពិសេស ឯកឧត្តម អូស្មាន ហាស្សាន់ ទេសរដ្ឋមន្ដ្រីទទួលបន្ទុកបេសកកម្មពិសេស មេត្តាជួយដល់រូបគាត់បានវិលត្រឡប់មកស្រុកវិញផង៕ លឹម ហុង