https://www.khmertimeskh.com/501148231//?p=1148231 Khmer Times September 9, 2022

បុរសជនជាតិវៀតណាមម្នាក់នៅប្រទេសកម្ពុជាបានចំណាយពេលបីឆ្នាំចុងក្រោយ ដើម្បីជួយជនជាតិវៀតណាមដែលត្រូវបានគេកេងប្រវ័ញ្ចក្នុងប្រទេស។ កាលពីបីឆ្នាំមុន លោក ជា សុខ មកពីសមាគមខ្មែរ-វៀតណាម ក្នុងខេត្តព្រះសីហនុ ត្រូវបានស្ត្រីពីរនាក់មកពីតំបន់ខ្ពង់រាបភាគកណ្តាលនៃប្រទេសវៀតណាម ទាក់ទងមកសុំអង្វរលោកឱ្យជួយសង្គ្រោះពួកគេពីកាស៊ីណូនៅខេត្តព្រះសីហនុ។ ពួកគេបាននិយាយថាប្រាក់លោះនឹងត្រូវបានបង់ដោយក្រុមគ្រួសាររបស់ពួកគេនៅវៀតណាម។ សុខ ជា ជនជាតិវៀតណាម ប៉ុន្តែមករស់នៅខេត្តព្រះសីហនុអស់ ៣៥ឆ្នាំបានគិតថា៖ «ដំបូងខ្ញុំគិតថាវាជាការលោះធម្មតា៖ ខ្ញុំនឹងឲ្យលុយទៅកាស៊ីណូ ហើយយកពួកគេមកវិញ។

ប៉ុន្តែពេលដែលខ្ញុំបានជួបពួកគេទល់មុខគ្នាទើបខ្ញុំដឹងថាស្ថានភាពគឺមិនធម្មតាទេ»។ គាត់បានធ្វើដំណើទៅកាន់ទីតាំងដាច់ស្រយាលដែលបង្ហាញដោយ GPS ប្រហែល១០ គីឡូម៉ែត្រពីទីក្រុង។ វាជាផ្ទះមួយនៅកណ្តាលកន្លែងដាច់ស្រយាលគ្មានបង្អួច និងជញ្ជាំងកម្ពស់បីម៉ែត្រ។ មនុស្សដប់នាក់បានកំពុងរង់ចាំគាត់ និងដៃគូរបស់គាត់ សុទ្ធតែមានកាន់អាវុធ។

ទោះបីជាមានការព្រមព្រៀងគ្នាពីមុនក៏ដោយ ក៏ក្រុមនេះបាននិយាយថា សុខ អាចយកតែម្នាក់ក្នុងចំណោមស្ត្រីពីរនាក់ ហើយគាត់ត្រូវបង់ប្រាក់បន្ថែមសម្រាប់ម្នាក់ទៀតដើម្បីត្រូវបានដោះលែង។ គាត់បានបត់យានជំនិះរបស់គាត់ ធ្វើពុតជាចាកចេញ។ ដោយសំអាងលើការខិតខំជំរិតទារប្រាក់ច្រើនជាងការព្រមព្រៀង គាត់បាននិយាយទៅកាន់អ្នកយាមថា៖ «អ្នកមានគ្នាច្រើន តែយើងមានតែពីរនាក់តើអ្នកខ្លាចអ្វី? ពួកគេហាក់ដូចជាជាប់នុយ ហើយបន្ទាប់ពីការចរចាបន្ថែមទៀតបានអនុញ្ញាតឱ្យស្ត្រីទាំងពីរទៅដោយមិនទាមទារប្រាក់បន្ថែម។ សុខ និងដៃគូត្រូវធ្វើឱ្យប្រាកដថាគ្មានអ្នកណាតាមគេមុនពេលពួកគេត្រូវបានដោះលែង។ វាជាលើកទីមួយហើយ ដែលគាត់បានជួយសង្គ្រោះមនុស្សពីកាស៊ីណូនៅកម្ពុជា។ ចាប់តាំងពីពេលនោះមក គាត់ និងមិត្តភក្តិរបស់គាត់នៅក្នុងសមាគមបានជួយជនជាតិវៀតណាមរាប់មិនអស់ឱ្យរួចផុតពីការជួញដូរមនុស្ស ហើយរក្សាសុវត្ថិភាពរហូតដល់ពួកគេអាចត្រឡប់ទៅផ្ទះវិញបាន។

ស្ថានទូតវៀតណាមប្រចាំនៅកម្ពុជា បានឲ្យដឹងថា អាជ្ញាធរវៀតណាមបានធ្វើការជាមួយសមភាគីកម្ពុជា ដើម្បីនាំយកពលរដ្ឋជាង ៦០០នាក់ ដែលត្រូវបានបោកបញ្ឆោតឲ្យមកធ្វើជាពលករខុសច្បាប់នៅកម្ពុជាអោយត្រឡប់ទៅប្រទេសវិញ។ ប៉ុន្តែ សុខ បាននិយាយថា ជនរងគ្រោះជាច្រើនក៏រកផ្លូវគេចខ្លួនដោយមិនទាក់ទងតំណាងការទូតវៀតណាមប្រចាំកម្ពុជា។ ជាឧទាហរណ៍ កាលពីមួយខែមុន គាត់បានជួយជនជាតិវៀតណាមម្នាក់ចេញពីក្រុមហ៊ុនមួយ ដោយបង់ប្រាក់លោះចំនួន ៤,៥០០ ដុល្លារ។ សាច់ញាតិជនរងគ្រោះនៅទីក្រុងហូជីមិញបានប្រើទំនាក់ទំនងផ្ទាល់ខ្លួនដើម្បីជួយសង្គ្រោះមនុស្សជាទីស្រឡាញ់របស់ពួកគេពីទីក្រុងភ្នំពេញ។ ពួកគេបានសុំឲ្យលោក សុខ យកប្រាក់ទៅលោះហើយយកជនរងគ្រោះមកវិញ។ លោក សុខ និយាយថា លោកបានរៀនមេរៀនជាច្រើនពីការខិតខំរបស់លោកក្នុងការជួយសង្គ្រោះពួកគេពីក្រុមជួញដូរមនុស្ស។

ជាឧទាហរណ៍ រាល់ពេលដែលគាត់ធ្វើដំណើរទៅកន្លែងសង្គ្រោះ គាត់ប្រាប់ពីទីតាំងដល់អាជ្ញាធរវៀតណាម និងកម្ពុជា ដើម្បីផ្តល់ជំនួយក្នុងករណីមានអ្វីមួយខុសប្រក្រតី។ លោកនិយាយថា ការចរចាដើម្បីធានាដោះលែងជនរងគ្រោះមិនមែនជារឿងងាយស្រួលនោះទេ ហើយ«លុយតែមួយមុខមិនគ្រប់គ្រាន់ដើម្បីធានាសេរីភាពនោះទេ»។ តម្លៃលោះជាធម្មតានៅចន្លោះ $៣,០០០-៥,០០០។ មានករណីជនរងគ្រោះទាក់ទងទៅក្រុមគ្រួសារ និងប្រគល់លុយទាំងអស់តាមការទាមទារ ហើយត្រូវបានដោះលែង ប៉ុន្តែជាក់ស្តែងពួកគេត្រូវបាន “លក់” ទៅឱ្យអ្នកផ្សេង។សុខ និយាយថា៖ «មានករណីជនរត់គេចខ្លួនដោយខ្លួនឯង ហើយសំណាងល្អត្រូវបានអ្នកស្រុកជួយ។ ពួកគេដឹងថាពួកគេជាជនជាតិវៀតណាមព្យាយាមរត់គេចពីការជួញដូរហើយតែងតែទាក់ទងមកយើងដើម្បីសុំអោយយើងជួយ។លោកថា សមាគមជួយជនរងគ្រោះរកកន្លែងស្នាក់នៅ បំពេញនីតិវិធីច្បាប់ និងជូនដំណឹងដល់អាជ្ញាធរពាក់ព័ន្ធ។ សមាគមក៏ផ្តល់ការព្យាបាលសម្រាប់អ្នកដែលត្រូវបានគេវាយដំ ឬរងរបួសអំឡុងពេលរត់គេចខ្លួនផងដែរ។

យោងតាមស្ថានទូតវៀតណាម អង្គភាពការពារពលរដ្ឋរបស់ខ្លួនទទួលបានសំបុត្រ និងទូរស័ព្ទជាច្រើន ដើម្បីស្វែងរកជំនួយសង្គ្រោះជនជាតិវៀតណាមដែលត្រូវបានបោកបញ្ឆោតឱ្យធ្វើជាពលករខុសច្បាប់។ លោក ស៊ឹម ជី ប្រធានសមាគមបាននិយាយថា ក្រុមឆបោកជួញដូរមនុស្សភាគច្រើនធ្វើសកម្មភាពក្នុងខេត្តមួយចំនួនដូចជា ស្វាយរៀង ព្រះសីហនុ និងកំពង់ស្ពឺ។ ជនជាតិវៀតណាមរាប់ពាន់នាក់ត្រូវបានគេគិតថាត្រូវបាននាំមកកាន់ប្រទេសកម្ពុជានាពេលថ្មីៗនេះ ដើម្បីបង្ខាំង និងបង្ខំឱ្យធ្វើការក្នុងលក្ខខណ្ឌដ៏លំបាក និងដោយគ្មានសំណងដូចដែលពួកគេបានសន្យា។ លោក សុខ បានបន្តថា ជនរងគ្រោះភាគច្រើនគឺមិនទាន់គ្រប់អាយុ ហើយពួកគេត្រូវបាននាំមកកម្ពុជាដោយគ្មានឯកសារត្រឹមត្រូវ។ «អ្នកខ្លះយកលិខិតឆ្លងដែនក្នុងនាមជាភ្ញៀងទេសចរដោយមានសុពលភាពតែមួយខែ។ «ក៏មានអ្នកដែលមិនមានឯកសារអត្តសញ្ញាណផ្ទាល់ខ្លួនដែរ»។ ក្នុងករណីបែបនេះ អាជ្ញាធរវៀតណាម និងកម្ពុជា ត្រូវទាក់ទងអាជ្ញាធរមូលដ្ឋាននៅកន្លែងរស់នៅរបស់ជនរងគ្រោះ ដើម្បីផ្ទៀងផ្ទាត់អត្តសញ្ញាណ និងប្រាប់ពួកគេឲ្យផ្តល់ឯកសារចាំបាច់។ បន្ទាប់មក ទើបអាចរៀបចំការធ្វើមាតុភូមិនិវត្តន៍បាន។ សុខ បន្ថែមថា៖ «ខ្ញុំសង្ឃឹមថាប្រជាជននៅវៀតណាមយល់ពីការជួញដូរមនុស្សទាំងនេះថាមានគ្រោះថ្នាក់ប៉ុណ្ណា។ «ពេលណាម្នាក់ធ្វើដំណើរទៅក្រៅប្រទេស រួមទាំងកម្ពុជាផង ត្រូវស្រាវជ្រាវព័ត៌មានឲ្យបានហ្មត់ចត់ បើមានសញ្ញាគួរឲ្យសង្ស័យ អ្នកមិនគួរទៅទេ ព្រោះគ្មានការងារណាដែលងាយស្រួល និងមានប្រាក់ខែខ្ពស់នោះទេ។ VNExpress