https://www.khmertimeskh.com/ February 12, 2022

នាយករដ្ឋមន្ត្រី ប្រាយុទ្ធ ចាន់អូចា បានមានប្រសាសន៍កាលពីថ្ងៃសុក្រថា ជនចំណាកស្រុកខុសច្បាប់ដែលត្រូវបានចាប់បានពេលលួចឆ្លងព្រំដែន គួរតែត្រូវបានចុះឈ្មោះដើម្បីធ្វើការដោយស្របច្បាប់នៅក្នុងប្រទេសថៃ ដែលកង្វះកម្លាំងពលកម្ម និងកំពុងគំរាមកំហែងដល់ការស្តារសេដ្ឋកិច្ចឡើងវិញ។ ពលករចំណាកស្រុកកម្ពុជាត្រូវបានបញ្ជូនទៅបន្ទប់ចំនួន ២៩១ ដែលអាចដាក់កម្មករចំនួន ១,០៣៨ នាក់ នៅខេត្តស៊ីសាកេត ខេត្តសុរិន្ទ ខេត្តស្រះកែវ និងខេត្តត្រាត។ លោកនាយករដ្ឋមន្រ្តីបានផ្តល់ការណែនាំក្នុងពេលធ្វើជាប្រធានមជ្ឈមណ្ឌលគ្រប់គ្រងស្ថានការណ៍កូវីដ-១៩ កាលពីថ្ងៃសុក្រ ដើម្បីពិចារណាលើវិធានការអនុញ្ញាតឱ្យពលករពីកម្ពុជា មីយ៉ាន់ម៉ា និងឡាវ អោយចូលប្រទេសថៃឡើងវិញ ទោះបីជាស្ថិតក្នុងស្ថានភាពកូវីដ-១៩ ក៏ដោយ។

អ្នកនាំពាក្យ CCSA លោក Taweesilp Visanuyothin បានមានប្រសាសន៍ថា លោកប្រាយុទ្ធ បានចោទសួរថា ហេតុអ្វីបានជានៅតែមានអ្នកស្វែងរកការងារពីប្រទេសជិតខាងទាំងបី ត្រូវបានចាប់ខ្លួនជារៀងរាល់ថ្ងៃ សម្រាប់ការព្យាយាមលួចចូលមកក្នុងព្រះរាជាណាចក្រថៃ។ លោកនាយករដ្ឋមន្ត្រីបានថ្លែងថា ស្ថាប័នពាក់ព័ន្ធរបស់ រដ្ឋាភិបាលគួរតែសម្របសម្រួល ដើម្បីរកមធ្យោបាយឲ្យពលករទាំងនេះចូលរួមជាមួយកម្លាំងពលកម្មថៃ ដោយស្របច្បាប់។ យោងតាមសហព័ន្ធឧស្សាហកម្មថៃ បច្ចុប្បន្នប្រទេសថៃកំពុងប្រឈមនឹងការខ្វះខាតពលករចំណាកស្រុកប្រមាណ ៨០ ម៉ឺននាក់ដែលត្រូវការសម្រាប់វិស័យផលិតកម្ម សេវាកម្ម និងទេសចរណ៍។ អ្នកនាំពាក្យមិនបាននិយាយថា តើជនចំណាកស្រុកខុសច្បាប់ដែលត្រូវបានចាប់ខ្លួនរួចហើយនឹងត្រូវបញ្ជូនត្រឡប់ទៅប្រទេសរបស់ពួកគេវិញឬអត់នោះទេ។ បច្ចុប្បន្នពួកគេប្រឈមនឹងការផាកពិន័យនិងនិរទេស។

ក្រសួងការងារបានរាយការណ៍ថា ខ្លួនមានបន្ទប់ចត្តាឡីស័កចំនួន ៤៧៦ នៅ ១៧ ទីតាំងសម្រាប់អ្នកស្វែងរកការងារពីប្រទេសមីយ៉ាន់ម៉ា និងកម្ពុជា។ អ្នកនាំពាក្យរូបនេះបានបន្ថែមថា ពលករអនុវត្តវិធានការរឹតបន្តឹងការធ្វើចត្តាឡីស័កដូចគ្នា នឹងអ្នកធ្វើដំណើរបរទេសដទៃទៀតដែរ។ សម្រាប់ជនចំណាកស្រុកមីយ៉ាន់ម៉ា គឺមានមណ្ឌលចត្តាឡីស័កចំនួនប្រាំមួយនៅខេត្តឈៀងរ៉ៃ តាក កាន់ឆាណាបូរី និងរ៉ាណុង ដែលមាន ១៨៥ បន្ទប់ និងអាចដាក់កម្មករបាន ៣៣០នាក់ ។ អ្នកនាំពាក្យមិនបានផ្តល់ទិន្នន័យស្តីពីកន្លែងធ្វើចត្តាឡីស័កសម្រាប់ពលករឡាវទេ។ Nation Thailand