https://www.khmertimeskh.com/ August 21, 2022

នៅពេលណាដែលនាងបិទភ្នែក Doan Thi Ngoc Diep ឃើញទឹក និងឮសំឡេងដំបងវាយមនុស្ស។ Diep ស្ថិតក្នុងចំណោមជនជាតិវៀតណាម ៤០នាក់ ដែលបានហែលឆ្លងទន្លេពីប្រទេសកម្ពុជាទៅកាន់ប្រទេសវៀតណាមកាលពីព្រឹកថ្ងៃព្រហស្បតិ៍ ដើម្បីគេចពីកាស៊ីណូដែលពួកគេត្រូវបានគេបោកបញ្ឆោតឱ្យធ្វើការ ហើយដែលពួកគេបាននិយាយថាជា “នរក”។ មានអ្នករត់គេចខ្លួនចំនួន ៤២នាក់ ប៉ុន្តែម្នាក់ត្រូវបានឆ្មាំកាស៊ីណូចាប់បាន ហើយម្នាក់ទៀតត្រូវបានគេប្រទះឃើញស្លាប់។ Diep អាយុ ២០ ឆ្នាំបានប្រាប់ VnExpress ថា “គ្មាននរណាម្នាក់ក្នុងចំនោមពួកយើងអាចគេងលក់កាលពីយប់មិញទេវាគួរឱ្យតក់ស្លុតណាស់” ។

នាង និងស្វាមីកំពុងស្នាក់នៅផ្ទះសហគមន៍មួយក្នុងខេត្ត An Giang ភាគខាងត្បូងប្រទេសវៀតណាម បន្ទាប់ពីបានភៀសខ្លួនចេញពីកាស៊ីណូក្នុងខេត្តកណ្តាលរបស់កម្ពុជា។ កាស៊ីណូដែលគ្រប់គ្រងដោយជនជាតិចិន ស្ថិតនៅតាមដងទន្លេ Binh Di ដែលជាព្រំដែនធម្មជាតិដែលមានទទឹងប្រហែល ៧០ ម៉ែត្រក្នុងអំឡុងរដូវវស្សារវាងប្រទេសកម្ពុជា និងវៀតណាម។ ជនជាតិវៀតណាមបានរៀបចំផែនការរត់គេចខ្លួនអស់រយៈពេលពីរយប់ ដោយចាប់ផ្តើមរត់គេចនៅពេលព្រឹកនៅពេលដែលទ្វារកាស៊ីណូបើក ហើយមានអ្នកគ្រប់គ្រងតែ៧ទៅ៨នាក់ប៉ុណ្ណោះដែលកំពុងបំពេញភារកិច្ច។

Diep បាននិយាយថា បន្ទាប់ពីធ្វើការបានមួយម៉ោងនៅម៉ោងប្រហែល ១០ ព្រឹក ពួកគេបានរត់ទៅកាន់ទ្វារ។ អ្នកមានកម្លាំងខ្លាំងនៅពីមុខដើម្បីវាយអ្នកយាម ដើម្បីអោយស្ត្រីៗរត់គេចខ្លួន។ យុវជនមួយក្រុមទៀតនៅខាងក្រោយ ដោយគប់ស្រាក្រឡុក Molotov ទៅកាន់អ្នកយាម។ ដំបូងឡើយ អ្នកយាមមានការភ្ញាក់ផ្អើល ប៉ុន្តែវាចំណាយពេលត្រឹមតែមួយនាទីសម្រាប់បុរសមាន “សាច់ដុំ” បង្ហាញខ្លួនជាមួយនឹងដំបងដែក ហើយដេញតាមជនជាតិវៀតណាម ដែល ព្យាយាមរត់គេចខ្លួន ។ ម្នាក់ក្នុងចំណោមពួកគេត្រូវបានគេចាប់បាន ខណៈអ្នកផ្សេងទៀតលោតចូលទឹកទន្លេ។ ពួកគេខ្លះមិនចេះហែលទឹកទេ តែនៅតែលោតចូល ហើយក៏ត្រូវបានអ្នកផ្សេងជួយអោយដល់ត្រើយម្ខាង។ ពួកគេបានទៅដល់ប៉ុស្តិ៍ការពារព្រំដែន Long Binh ដោយមិនមានរបួស ហើយត្រូវបានបញ្ជូនទៅផ្ទះសហគមន៍ដែលពួកគេបានទទួលការថែទាំ ហើយត្រូវបានប៉ូលិសសាកសួរ។ ក្រសួងការបរទេសវៀតណាមបានស្នើឱ្យអាជ្ញាធរកម្ពុជាជួយស៊ើបអង្កេតករណីនេះ។ Diep បាននិយាយអំពីរយៈពេល៤ខែរបស់នាងនៅកាស៊ីណូថា៖ «វាជានរក។ យើងត្រូវបានគេបោកបញ្ឆោត និងលក់ទៅប្រទេសកម្ពុជា»។ ស្ត្រីមកពីខេត្ត Cao Bang ភាគខាងជើងបាននិយាយថា គាត់និងប្តីបានទៅធ្វើការនៅរោងចក្រមួយនៅ Bac Ninh កាលពីបីឆ្នាំមុន ប៉ុន្តែប្រាក់ចំណូលមិនគ្រប់គ្រាន់ទេ ដូច្នេះហើយពួកគេសម្រេចចិត្តលាឈប់នៅខែមេសា ដើម្បីស្វែងរកការងារផ្សេងទៀត។ ពួកគេបានស្វែងរកការផ្សាយពាណិជ្ជកម្មការងារនៅលើ Facebook ហើយបានរកឃើញការងារមួយដែលសន្យាថាអោយប្រាក់ខែ ២៥ លានដុង (១,០៧០ ដុល្លារ) ក្នុងមួយខែ។ “ឈ្មួញកណ្តាលបាននិយាយថាវាជាការងារធ្វើតាមកុំព្យូទ័រនៅក្នុងបន្ទប់ម៉ាស៊ីនត្រជាក់” ។ ប្តីប្រពន្ធមួយគូនេះត្រូវបានទាក់ទាញដោយប្រាក់ដែលច្រើនជាង៤ដងនៃការងារពីមុនរបស់ពួកគេហើយបានវេចខ្ចប់កាបូបរបស់ពួកគេ និងជិះឡានក្រុងតាមដែលមេខ្យល់ណែនាំ។

Diep បាននិយាយថា ពួកគេធ្វើដំណើររយៈពេលបីថ្ងៃ ហើយបានប្តូរឡានក្រុងចំនួន ៥ ដងមុនពេលពួកគេមកដល់ប្រទេសកម្ពុជា។ ថ្ងៃនៃការរងការគំរាមកំហែង និងការកេងប្រវ័ញ្ចរបស់ពួកគេបានចាប់ផ្តើមនៅពេលនោះ។នៅក្នុងខែដំបូង Diep ត្រូវបានណែនាំឱ្យប្រើគណនីក្លែងក្លាយតាមអ៊ីនធឺណិតដើម្បីបញ្ឆោតមនុស្សឱ្យដាក់ប្រាក់ទៅក្នុងកម្មវិធីស្វែងរកដៃគូរ (dating game)។ នាងបាននិយាយថា នាងកំពុងបោកប្រាស់មនុស្ស ប៉ុន្តែ «បើខ្ញុំមិនធ្វើទេ ខ្ញុំនឹងត្រូវគេវាយ ជីវិតខ្ញុំនឹងប្រឈមនឹងគ្រោះថ្នាក់»។ នាងត្រូវបានគេតម្រូវឱ្យរកប្រាក់បាន ៣០០ លានដុងក្នុងមួយខែពីការបោកប្រាស់ ហើយបន្ទាប់ពីនាងមិនអាចសម្រេចបានតាមការកំណត់អស់រយៈពេលជាច្រើនខែនាងត្រូវបានគេព្រមានថានាងនឹងត្រូវបញ្ជូនទៅ “បន្ទប់អគ្គីសនី” ។ នោះបានបង្ខំនាងឱ្យធ្វើការ ១៤ ម៉ោងក្នុងមួយថ្ងៃ។ នាងបានស្ទាក់ស្ទើរនៅពេល ដែលនាងបានឮអំពីផែនការរត់គេចខ្លួនចាប់តាំងពីអ្នកចាប់ខ្លួននាងបានសន្យាថានឹងដោះលែងនាងក្នុងរយៈពេល២ខែទៀត។

នាងបានគិតអំពីរឿងនេះមួយសន្ទុះ ហើនាងបានគិតថាថានាងទំនងជាត្រូវបានលក់ទៅឱ្យកាស៊ីណូមួយផ្សេងទៀត ឬអាចត្រូវគេសម្លាប់។ នាងបាននិយាយថា នាងនិងមនុស្សជាច្រើននាក់ទៀតបានសម្រេចរត់គេចខ្លួនដោយមានគំនិតមួយថា «យើងស្លាប់នៅផ្ទះប្រសើរជាង»។ ការកេងប្រវ័ញ្ចជំរុញឱ្យកម្មករវៀតណាមរត់ចេញពីកាស៊ីណូនរកនៅកម្ពុជា Pham Nguyen Anh Tuan អាយុ៣០ ឆ្នាំគឺជាអ្នកផ្តួចផ្តើមផែនការរត់គេចខ្លួន។ គាត់បាននិយាយថា គាត់បានទទួលយកការងារកាស៊ីណូដោយសង្ឃឹមថានឹងជម្រះបំណុលល្បែងរបស់គាត់។ «ប៉ុន្តែពួកគេមិនបាននិយាយថាការងារនេះនឹងនៅក្នុងប្រទេសកម្ពុជាទេ ពួកគេនិយាយថាវានៅក្នុងខេត្តតៃនិញ [ជាប់ព្រំដែនកម្ពុជា]។ “ហើយខ្ញុំមិនបានគិតថានេះជាការងារបោកប្រាស់មនុស្សនោះទេ”។ Tuan មិនអាចរកប្រាក់គ្រប់គ្រាន់ពីការឆបោកក្នុងរយៈពេលប៉ុន្មានខែដំបូងឡើយ ដូច្នេះហើយត្រូវបានគេលក់ទៅឱ្យថៅកែផ្សេងៗគ្នា។ គាត់បានធ្វើការឱ្យថៅកែទី៣របស់គាត់អស់រយៈពេល ៤ ខែហើយអាចទទួលបានប្រាក់ខែប៉ុន្តែខឹងដែលជនជាតិវៀតណាមផ្សេងទៀតត្រូវបានគេកេងប្រវ័ញ្ចនិងសូម្បីតែធ្វើទារុណកម្ម។

ជនជាតិវៀតណាមម្នាក់បានធ្លាក់ខ្លួនឈឺ និងមិនអាចរកប្រាក់បានច្រើនសម្រាប់កាស៊ីណូ ដូច្នេះហើយថៅកែចិនគ្រោងនឹងលក់ពួកគេ។ Tuan បានសុំថៅកែឲ្យអ្នកនោះទៅផ្ទះវិញ ដោយសន្យាថាគាត់និងជនជាតិវៀតណាមម្នាក់ទៀតនឹងចេញថ្លៃដោះលែងគាត់។ ប៉ុន្តែ បុរសនោះបានបដិសេធសំណើរបស់គាត់ដោយនិយាយថាគាត់និងអ្នកផ្សេងទៀតគ្មានសិទ្ធិចរចានោះទេ។ គាត់តូចចិត្តហើយពិភាក្សាអំពីការរត់គេចជាមួយអ្នកដែលនៅសល់។ ខណៈអ្នកខ្លះយល់ព្រមរត់ អ្នកខ្លះទៀតថានឹងជួយ។ លោក Tuan បាននិយាយថា៖ «ក្រៅពីអ្នកដែលបានបាត់ខ្លួន និងម្នាក់ទៀតដែលត្រូវបានចាប់នោះ យើងមានការព្រួយបារម្ភខ្លាំងណាស់សម្រាប់អ្នកដែលបានជួយយើងអោយរត់រួច»។ ជនជាតិវៀតណាមជាច្រើនត្រូវបានបោកបញ្ឆោតឱ្យចូលមកប្រទេសកម្ពុជាដើម្បីធ្វើការនៅកាស៊ីណូ និងកន្លែងស្រដៀងគ្នាផ្សេងទៀតដែលពួកគេតែងតែត្រូវបានកេងប្រវ័ញ្ច។ បើពួកគេចង់ត្រឡប់ទៅប្រទេសវៀតណាមវិញ ពួកគេត្រូវបង់ប្រាក់ដល់កាស៊ីណូរហូតដល់ ៣ ម៉ឺនដុល្លារ។ ក្នុងឆមាសទី១នៃឆ្នាំនេះ អាជ្ញាធរវៀតណាម និងកម្ពុជាបានសហការគ្នាជួយសង្គ្រោះមនុស្សជាង ២៥០នាក់នោះ។ VnExpress