website_news:2022280903

សង្គមស៊ីវិលថាពលករខ្មែរទៅធ្វើការនៅប្រទេសថៃ នៅតែប្រឈមនឹងថៅកែថៃកេងប្រវ័ញ្ចកម្លាំងពលកម្ម

https://www.rfa.org/khmer/news/human-rights/cambodia-migration-workers-09222022050006.html ដោយ អាស៊ីសេរី2022.09.22

សង្គមស៊ីវិលថាពលករខ្មែរធ្វើការនៅប្រទេសថៃ នៅតែប្រឈមនឹងថៅកែថៃកេងប្រវ័ញ្ចកម្លាំងពលកម្ម និងត្រូវអាជ្ញាធរថៃចាប់ខ្លួនដាក់ពន្ធនាគារដោយអយុត្តិធម៌។ មន្ត្រីសង្គមស៊ីវិលនិងពលករខ្មែរ មើលឃើញថា ទុក្ខលំបាករបស់ពលករនេះកើតឡើងដោយសារខ្វះការជួយអន្តរាគមន៍ពីរដ្ឋាភិបាលនិងមន្ត្រីស្ថានទូតខ្មែរប្រចាំនៅប្រទេសថៃ។មន្ត្រីសង្គមស៊ីវិលលើកឡើងថាពលរដ្ឋចំណាកស្រុកទៅធ្វើការនៅប្រទេសថៃមួយចំនួន តែងរងការរើសអើងធ្វើបាប គ្រោះថ្នាក់ចរាចរ ការចោទប្រកាន់ ការកេងប្រវ័ញ្ចកម្លាំងពលកម្មពីថៅកែ និងអាជ្ញាធរថៃចាប់ខ្លួនដាក់ពន្ធនាគារជាដើម។ សាច់ញាតិ និងក្រុមគ្រួសារពលករ តែងជួបទុក្ខលំបាកជីវភាព ក្រោយមេគ្រួសារ និងសមាជិកគ្រួសាររបស់ពួកគេត្រូវបានអាជ្ញាធរថៃ ឃុំខ្លួន ឬចាប់ខ្លួនដោយគ្មានការគាំពារពីអាជ្ញាធរខ្មែរឱ្យបានទាន់ពេលនោះ ឡើយ។

មន្ត្រីគម្រោងនៃអង្គការសង់ត្រាល់ប្រចាំប្រទេសថៃលោក លឹង សុផុន លើកឡើងថា លោកតែងចុះសាកសួរ នៅពេលពលករជួបបញ្ហាផ្សេងៗនៅប្រទេសថៃនៅពេលលោកទទួលបានព័ត៌មានពីពលករ។ លោកបន្តថា ពលករខ្មែរប្រឈមបញ្ហាជាច្រើន រួមមានការកេងប្រវ័ញ្ចកម្លាំងពលកម្ម ពីសំណាក់ថៅកែថៃ ឱ្យធ្វើការលើសម៉ោង មិនបើកប្រាក់ឈ្នួល និងការចោទប្រកាន់ក្នុងរូបភាពផ្សេងៗគ្នា ហើយប្រឈមខ្លាំង គឺពលករដែលឆ្លងដែនទៅធ្វើការដោយខុសច្បាប់។ លោកបន្តទៀតថា ពលករតែងត្អូញត្អែរពីការធ្វើឯកសារការងារមានតម្លៃថ្លៃ ហើយកង្វះខាតការងារធ្វើមួយរយៈចុងក្រោយនេះ។ លោក លឹង សុផុន សង្កេតឃើញថា ការងារក្នុងប្រទេសថៃមានការថយចុះ ។

លោក លឹង សុផុន បញ្ជាក់ថា ពលករមួយចំនួនតែងរងការចោទប្រកាន់ និងត្រូវថៅកែថៃប្ដឹងចាប់ដាក់ពន្ធនាគារនៅប្រទេសថៃ។ លោកថា បញ្ហាទាំងនេះភាគច្រើនកើតឡើងដោយសារ ពលករគ្មានចំណេះដឹងផ្លូវច្បាប់និងខ្វះការជួយអន្តរាគមន៍ពីរដ្ឋាភិបាលខ្មែរមន្ត្រីស្ថានទូតខ្មែរប្រចាំនៅប្រទេសថៃ «បន្ទាប់ពីបានសម្ភាសន៍សួរនាំគ្រួសារដែលគេយកប្ដីទៅចាប់ដាក់គុកទៅ ខ្ញុំក៏បានអោយគាត់ទៅឆែកមើលលេខឯកសារដែលគេចោទប្រកាន់ហ្នឹងហាស។ តាពិតពួកខ្ញុំទៅ ហើយនឹងក្រុមការងារទៅហ្នឹង តុលាការហ្នឹងបានសម្រេចកាត់ទោសអោយជាប់គុក១៨ខែ។ ខាងស្ថាប័នរដ្ឋដូចជាខាងស្ថានទូត និងអនុព័ន្ធការងារអីក៏បានដឹងរឿងហ្នឹងដែរ ខ្ញុំបាននិយាយជាមួយគាត់ដែររឿងហ្នឹងដែរ តែមិនដឹងថា គាត់នឹងជួយរកវិធីដោះស្រាយជួយដល់បងប្អូនពលករយ៉ាងម៉េច ខ្ញុំអត់ទាន់ដឹងច្បាស់នៅឡើយ»។

ដោយឡែក ប្រពន្ធពលករជាប់ឃុំ លោក ជ័យ មុំ គឺលោកស្រី ម៉េត បូរី ប្រាប់វិទ្យុអាស៊ីសេរីនៅថ្ងៃទី២១ ខែកញ្ញា លោកស្រីថា មកធ្វើការនៅប្រទេសថៃ ៧ឆ្នាំហើយ ដោយប្តីលោកស្រី ត្រូវបាន ថៅកែថៃប្ដឹងឱ្យប៉ូលិសថៃចាប់ដាក់ពន្ធនាគារ១៨ខែ ដោយអយុត្តិធម៌ ព្រោះលោកស្រីថា មិនបានប្រព្រឹត្តខុសច្បាប់ដូចការចោទប្រកាន់របស់ថៅកែថៃឡើយ ។ លោកស្រីបន្តថា ពេលប្ដីត្រូវចាប់ខ្លួនលោកស្រី ធ្លាប់បានទូរស័ព្ទទាក់ទងទៅមន្ត្រីស្ថានទូតខ្មែរប្រចាំប្រទេសថៃដែរ ប៉ុន្តែគ្មានអ្នកទទួលឡើយ និងគ្មានការទាក់ទងពីអាជ្ញាធរខ្មែរណាមួយឡើយ។ លោកស្រីបន្តទៀតថា ក្រោយប្ដីជាប់ឃុំ គ្រួសារជួបការលំបាកច្រើន ព្រោះលោកស្រីត្រូវរ៉ាប់រងគ្រួសារ ចិញ្ចឹមកូន២នាក់អោយរៀនសូត្រនៅប្រទេសថៃ។ លោកស្រីស្នើសុំឲ្យស្ថានទូតខ្មែរជួយអន្តរាគមន៍ទៅអាជ្ញាធរថៃឱ្យដោះលែងប្ដីលោកស្រី ដើម្បីបាន ជួបជុំគ្រួសារ ដើម្បីសម្រាលទុក្ខលំបាក និងបន្តរស់នៅចិញ្ចឹមកូនៗ៖ « មេការឆាណា ទូរស័ព្ទប្រាប់ថៅកែខ្ញុំថា ប្តីខ្ញុំយកដូងប្រេង(ប៉ាម)ទៅលក់ ដល់ពេលទៅឆែកតាមជញ្ជីង អត់មានទេ មានតែឈ្មោះមេការ(ហ៊ូណា)អត់មានឈ្មោះប្ដីខ្ញុំទេ។ មារឯងដឹងស្រាប់ហើយស្រុកថៃ កូនខ្មែរលក់ប៉ាម(ដូងប្រេង)អត់បានទេ។ លក់ដូងប្រេងយើងហ្នឹង ថៃគេហៅប៉ាម។ ចោទថាប្ដីខ្ញុំយកប៉ាមទៅលក់ ប្តីខ្ញុំថាមិនបានលក់ទេ កូនខ្មែរលក់ម៉េចបានប្រទេសថៃនោះ។ ចាសចោទប្រកាន់ដដែល ដាក់គុក១ឆ្នាំ៦ខែ ១៨ខែដាក់គុកប្ដីខ្ញុំនោះ»។

ជុំវិញរឿងនេះ ប្រធានសមាគមពង្រឹងសេដ្ឋកិច្ចក្រៅប្រព័ន្ធកម្ពុជា (CIREA) លោក ឌិន ពុទ្ធី យល់ឃើញថា កត្តាកង្វះការងារនៅប្រទេសកម្ពុជា គ្មានទីផ្សារកសិផលច្បាស់លាស់ នាំអោយពលរដ្ឋសម្រេចចិត្តចំណាកស្រុកទាំងប្រថុយប្រថាន និងប្រឈមទុក្ខលំបាក។ លោកបន្តថា ពលករធុញទ្រាន់និងការទំនាក់ទំនងទៅកាន់ស្ថានទូតខ្មែរប្រចាំនៅប្រទេសថៃ ព្រោះពិបាកទាក់ទង ហើយគ្មានការទទួលត្រូវ ដោយមានការរត់ការឯកសារពេលពលរដ្ឋទៅបញ្ជាក់ឯកសារម្ដងៗ។ លោក ឌិន ពុទ្ធី អំពាវនាវដល់រដ្ឋាភិបាលក្នុងការសម្រួលឯកសារស្របច្បាប់តម្លៃសមរម្យ និងឆាប់រហ័សជូនពលរដ្ឋ និងត្រួតពិនិត្យទៅលើមន្ត្រីស្ថានទូតខ្មែរប្រចាំប្រទេសថៃ ពាក់ព័ន្ធការរត់ការឯកសារ៖ «ទៅដល់កន្លែងណាក៏មានឈ្មួញកណ្ដាលគួកជេរ ធ្វើបាបពលករ ហើយពលករ(គ្នា)ធ្វើការហើយចំណាយលុយយ៉ាងច្រើនសន្ធឹកសន្ធាប់ទៅលើឯកសារហ្នឹង ហើយយឺតយ៉ាវទៀត។ ដល់ពេលអ៊ីចឹងធុញមិនចង់ធ្វើទេឯកសារហ្នឹង។ ពិបាកស្មុគស្មាញគ្រប់សព្វបែបយ៉ាង អ៊ីចឹងសុខចិត្តខុសច្បាប់ទៅ ដល់ពេលខុសច្បាប់ពលករហ្នឹង គឺរងគ្រោះបន្តៗហ្នឹង។ គេបញ្ជូនទៅនេះទៅនោះអ៊ីចឹង ទៅតាមតែអំពើចិត្ត ឬក៏យើងទៅធ្វើការងារចុះទូកចុះអីអ៊ីចឹងទៅ គ្រោះថ្នាក់គេសម្លាប់ចោលអ៊ីចឹងទៅ វាបញ្ហាច្រើនណាស់។ ពេលពលករ កម្មករមានបញ្ហាទៅរកកុងស៊ុលហ្នឹងស្តីអោយយើងទៀតហាស អោយយើងរកភស្តុតាង អាយើងរងគ្រោះ គេគាបសង្កត់យកលុយ គេកេងប្រវ័ញ្ច គេធ្វើបាប អោយរកភស្តុតាងទៀត ហើយទៅរកភស្តុតាងឯណា បើនៅកន្លែងគេហ្នឹង គេអោយយើងថតអី គេទាត់យើង២ ៣ ជើងអ្នកណាទៅថតគេបាន»។

វិទ្យុអាស៊ីសេរីមិនអាចទាក់ទងសុំការអត្ថាធិប្បាយជុំវិញបញ្ហានេះពីស្ថានទូតខ្មែរ និងមន្ត្រីស្ថានទូតខ្មែរប្រចាំប្រទេសថៃ លោក ផៃ លន បានទេ នៅថ្ងៃទី២១ ខែកញ្ញា ដោយទូរស័ព្ទហៅចូលតែពុំមានអ្នកទទួល។ ប៉ុន្តែ ហ្វេស ប៊ុករបស់អនុព័ន្ធការងារអមស្ថានទូតកម្ពុជានៅប្រទេសថៃ បានចុះផ្សាយពីការជួយដល់ពលករខ្មែរមានអគ្គីភ័យឆាបឆេះកន្លែងស្នាក់នៅរបស់ពលករចំនួន៣៦បន្ទប់ ស្ថិតនៅប្រឆាអូធិត៦៩ ដែលធ្វើអោយខូចខាតសម្ភារៈប្រើប្រាស់៨០-៩០ភាគរយ ចំនួន១៨គ្រួសារ កាលពីថ្ងៃទី១០ ខែកញ្ញា ។ ពលករតែងតែរងការគាបសង្កត់ និងរំលោភសិទ្ធិ ជួបគ្រោះថ្នាក់ចរាចរ និងការរើសអើងគ្រប់រូបភាពពីថៅកែមួយចំនួនក្នុងប្រទេសថៃ ពិសេសកម្មករខុសច្បាប់ ដែលរងផលប៉ះពាល់ខ្លាំង។ ពលករខ្លះធ្លាក់ខ្លួនឈឺ ប៉ុន្តែមិនហ៊ានទៅពេទ្យឡើយ ដោយសារពួកគេធ្វើការងារខុសច្បាប់ក៏សុខចិត្តដេកឈឺនៅកន្លែងធ្វើការ។

មន្ត្រីសង្គមស៊ីវិលលោក លឹង សុផុន បន្តថា ពលករខ្មែរធ្វើការនៅប្រទេសថៃ តែងតែត្រូវបានថៅកែនិងជនជាតិថៃប្ដឹងអាជ្ញាធរថៃចាប់ដាក់ពន្ធនាគារជាច្រើនករណី ហើយភាគច្រើនពួកគេបានចាញ់ក្ដី និងជាប់ពន្ធនាគារដោយអយុត្តិធម៌។ លោកមើលឃើញថា បញ្ហាទាំងនេះកើតឡើងដោយសារតែពលករទាំងនោះគ្មានមេធាវីការពារក្ដីក្នុងតុលាការ។ កាលពីខែធ្នូឆ្នាំ២០២០មានពលករខ្មែរមួយគ្រួសារមានគ្នាបីនាក់ប្ដីប្រពន្ធនិងកូន ក៏ត្រូវបានថៅកែដំឡូងមីជនជាតិថៃនៅប្រាជីនបុរី (Prachinbori)យកកាំភ្លើងខ្លីបាញ់គំរាមសម្លាប់ ដោយសារខឹងពួកគេសុំច្បាប់ទៅលេងកម្ពុជាដែរ។ ថៅកែថៃ បានចោទប្រកាន់ពលករខ្មែរមួយគ្រួសារនោះថា ជំពាក់ប្រាក់ថ្លៃធ្វើលិខិតឆ្លងដែនមិនទាន់សងគ្រប់នៅឡើយ។ ប៉ុន្តែពលករខ្មែរអះអាងថា មូលហេតុដែលពួកគេសុំទៅកម្ពុជាដោយសារពួកគេធ្វើឱ្យថៅកែរូបនេះជាច្រើនខែមកហើយមិនបានប្រាក់ឈ្នួលឱ្យពួកគេនោះទេ។ របាយការណ៍អង្គការសង់ត្រាល់បង្ហាញថា សព្វថ្ងៃមានពលករខ្មែររស់នៅ និងធ្វើការនៅប្រទេសថៃ ទាំងស្របច្បាប់ និងមិនស្របច្បាប់មានប្រមាណជាងពីរលាន (២.០០០.០០០)នាក់ ៕

website_news/2022280903.txt · Last modified: 2022/09/28 20:25 by Toch Kimheak

Donate Powered by PHP Valid HTML5 Valid CSS Driven by DokuWiki