https://www.khmertimeskh.com/501191916//?p=1191916 November 27, 2022

ប្រទេសថៃ និងកម្ពុជាបានសន្យាថានឹងធ្វើការរួមគ្នាដើម្បីជំរុញទំនាក់ទំនងយោធា និងលុបបំបាត់ឧក្រិដ្ឋកម្មឆ្លងដែន រួមទាំងការរីករាលដាលនៃការឆបោកតាមមជ្ឈមណ្ឌលហៅទូរស័ព្ទនាពេលថ្មីៗនេះ។ ឧបនាយករដ្ឋមន្ត្រីថៃ Prawit Wongsuwon និងសមភាគីកម្ពុជា នាយឧត្តមសេនីយ៍ ទៀ បាញ់ បានធ្វើការប្តេជ្ញាចិត្តនេះ ក្នុងកិច្ចប្រជុំលើកទី១៥ នៃគណៈកម្មាធិការព្រំដែនទូទៅកម្ពុជា-ថៃ ដែលរៀបចំដោយប្រទេសថៃ នៅទីក្រុងបាងកក។

លោកឧត្តមសេនីយ៍ឯក Kongcheep Tantravanich អ្នកនាំពាក្យរបស់ឧត្តមសេនីយ៍ Prawit បាននិយាយមុនកិច្ចប្រជុំថា ភាគីទាំងពីរបានសន្យាថានឹងបង្កើនកិច្ចសហប្រតិបត្តិការយោធា ក៏ដូចជាធ្វើការរួមគ្នាដើម្បីបង្រ្កាបឧក្រិដ្ឋកម្មឆ្លងដែន ការជួញដូរគ្រឿងញៀន និងការជួញដូរមនុស្ស ឧក្រិដ្ឋកម្មតាមអ៊ីនធឺណិត និងជាពិសេសក្រុមបោកប្រាស់តាមទូរស័ព្ទដែលឆបោកជនជាតិថៃ មកធ្វើការខុសច្បាប់នៅកម្ពុជា។ ឧត្តមសេនីយ៍ឯក Kongcheep បាននិយាយថា ភាគីទាំងពីរក៏បានព្រមព្រៀងគ្នាក្នុងការជំរុញប្រតិបត្តិការបោសសម្អាតមីននៅតាមព្រំដែន។ អ្នកនាំពាក្យរូបនេះបាននិយាយថា ឧត្តមសេនីយ Prawit បានថ្លែងអំណរគុណដល់កម្ពុជាសម្រាប់ការគាំទ្រកិច្ចខិតខំប្រឹងប្រែងរបស់អាជ្ញាធរថៃក្នុងការទប់ស្កាត់មជ្ឈមណ្ឌលហៅទូរស័ព្ទក្លែងក្លាយនិងជួយសង្គ្រោះពលករថៃ។ ឧត្តមសេនីយ Prawit បានស្នើឱ្យកម្ពុជាបន្តជួយក្នុងការខិតខំស្វែងរកជនជាតិថៃដែលចាញ់បោកជនឆបោកតាមមជ្ឈមណ្ឌលហៅទូរស័ព្ទ ហើយបញ្ជូនពួកគេត្រឡប់ទៅប្រទេសថៃវិញ។

ក្នុងជំនួបនោះ ភាគីថៃបានសង្កត់ធ្ងន់លើភាពចាំបាច់សម្រាប់កងកម្លាំងប្រដាប់អាវុធថៃ និងកម្ពុជា ព្រមទាំងស្ថាប័នពាក់ព័ន្ធ សហការគ្នាដើម្បីរក្សាសន្តិភាព និងស្ថិរភាពនៅតាមព្រំដែន។ លោកបាននិយាយថា ភាគីទាំងពីរបានទទួលស្គាល់ពីវឌ្ឍនភាពក្នុងការបើកច្រកព្រំដែនឡើងវិញ ការបោសសម្អាតមីន ពាណិជ្ជកម្មឆ្លងដែន គម្រោងនានា ដែលបង្កើតយន្តការក្នុងក្របខណ្ឌគណៈកម្មាធិការព្រំដែនតំបន់កម្ពុជា-ថៃ និងកិច្ចប្រជុំនៃកងកម្លាំងការពារព្រំដែននៃប្រទេសទាំងពីរ ដើម្បីដោះស្រាយបញ្ហាតាមបណ្តោយព្រំដែនរួម។ លោកបានបន្ថែមថា ភាគីទាំងពីរក៏បានឯកភាពថា ភ្នាក់ងារក្នុងស្រុកនៃប្រទេសទាំងពីរគួរតែធ្វើការរួមគ្នាដើម្បីដោះស្រាយការជួញដូរគ្រឿងញៀន និងធានាឱ្យតំបន់ព្រំដែនតាមដងទន្លេមេគង្គគ្មានការជួញដូរគ្រឿងញៀន។