https://www.khmertimeskh.com/ Khmer Times May 29, 2022

ម្តាយជនជាតិម៉ាឡេស៊ីម្នាក់ ដែលអះអាងថា កូនប្រុសរបស់គាត់ត្រូវបានចាប់បង្ខាំងខ្លួន ដោយក្រុមបោកប្រាស់នៅក្នុងកម្ពុជា បានចោទប្រកាន់អាជ្ញាធរនៅទីនេះថា បានបែកធ្លាយព័ត៌មានទាក់ទងនឹងទីកន្លែងរបស់កូនប្រុសគាត់ទៅកាន់ក្រុមឧក្រិដ្ឋជន ដែលចោទប្រកាន់ថា បានល្បួងគាត់នៅទីនោះតាមរយៈការឆបោកនៃការផ្តល់ការងារ។ អ្នកស្រី Wong អះអាងថា កូនប្រុសរបស់គាត់ត្រូវបានល្បួងមកកម្ពុជាកាលពី ៧ ខែមុន ហើយបានប្រាប់គាត់ថាគាត់ជាប់នៅទីនោះ ហើយនិយាយថា ក្តីសង្ឃឹមតែមួយគត់របស់គាត់គឺត្រូវសងប្រាក់ចំនួន ១៣,០០០ ដុល្លារ ដើម្បីដោះលែងកូនប្រុសគាត់ ដែលជាចំនួនដែលគាត់និយាយថា គាត់មិនអាចមានលទ្ធភាពនោះទេ។ អ្នកស្រីបាននិយាយថា ការខិតខំប្រឹងប្រែងដើម្បីជួយសង្គ្រោះគាត់រហូតមកដល់ពេលនេះបានបរាជ័យ បើទោះជាអ្នកស្រីបាន ផ្តល់ព័ត៌មានដ៏មានតម្លៃដល់អាជ្ញាធរក៏ដោយ។ គាត់បានពន្យល់ថា គាត់បានទទួលព័ត៌មានអំពីទីកន្លែងរបស់កូនប្រុសគាត់ តាមរយៈកិច្ចខិតខំប្រឹងប្រែងរបស់អ្នកជួយ និងពីអ្វីដែលកូនប្រុសរបស់គាត់បាននិយាយនៅក្នុងការហៅទូរស័ព្ទសម្ងាត់ ប៉ុន្តែបដិសេធមិនផ្តល់ព័ត៌មានថា តើអ្នកណាជាអ្នកជួយនោះទេ។ គាត់បានផ្តល់ព័ត៌មានលម្អិតទៅស្ថានទូតម៉ាឡេស៊ីនៅភ្នំពេញ ដែលគេជឿថាបានបញ្ជូនព័ត៌មានទៅនគរបាលកម្ពុជា។

អ្នកស្រី Wong បានប្រាប់ FMT ដែលជាវិបផតថលព័ត៌មានអនឡាញរបស់ប្រទេសម៉ាឡេស៊ីថា “ទោះជាយ៉ាងនេះក្តី ការភ្ញាក់ផ្អើលរបស់ខ្ញុំ គឺថាក្រុមនេះបានសាកសួរកូនប្រុសរបស់ខ្ញុំអំពីព័ត៌មានលម្អិតពិតប្រាកដដែលពួកគេបានទទួលពីនគរបាលកម្ពុជា។ «បន្ទាប់ពីព័ត៌មាននេះបែកធ្លាយ គាត់ត្រូវបានបញ្ជូនទៅក្រុមហ៊ុនមួយផ្សេងទៀត ពីការហៅទូរស័ព្ទជាមួយកូនប្រុសរបស់ខ្ញុំកាលពីប៉ុន្មានថ្ងៃមុន ដោយគាត់បានប្រាប់ខ្ញុំថា គាត់ត្រូវបានផ្ទេរទៅក្រុមទីបីម្តងផ្សេងទៀត»។ កូនប្រុសរបស់អ្នកស្រី Wong ត្រូវបានគេជឿថាបានចូលមកប្រទេសកម្ពុជាដោយខុសច្បាប់ពី Penang កាលពីខែវិច្ឆិកាឆ្នាំមុន។ “ខ្ញុំបានលឺថាជនរងគ្រោះមួយចំនួនត្រូវបានដោះលែង បន្ទាប់ពីក្រុមគ្រួសាររបស់ពួកគេបានបង់ថ្លៃលោះ។ ប៉ុន្តែ លុយ ១៣,០០០ដុល្លា គឺជាចំនួនដ៏ច្រើនសម្រាប់ខ្ញុំ ហើយទុក្ខលំបាកនោះនឹងមិនបញ្ចប់ត្រឹមនោះទេ»។ អ្នកស្រី Wong ធ្លាប់បានប្រាប់ព័ត៌មានលម្អិតអំពីបញ្ហារបស់កូនប្រុសនាងទៅកាន់ប្រធានសេវាកម្មសាធារណៈ MCA លោក Michael Chong កាលពីខែមីនា។ បន្ទាប់ពីការផ្សព្វផ្សាយជាសាធារណៈអំពីករណីនេះ ជនជាតិម៉ាឡេស៊ីចំនួន ១៦ នាក់ត្រូវបានជួយសង្គ្រោះពីខេត្តព្រះសីហនុក្នុងប្រទេសកម្ពុជា និងបញ្ជូនត្រឡប់ទៅប្រទេសកំណើតវិញ។

លោក Chong បានអះអាងថា ក្មេងជំទង់ពីរនាក់ទៀតត្រូវបានគេជួយសង្គ្រោះពីក្រុមនោះ ប្រហែល៣សប្តាហ៍មុន។ លោកបានមានប្រសាសន៍ថា “ពួកគេកំពុងស្ថិតនៅក្នុងប្រទេសកម្ពុជា ហើយកំពុងរង់ចាំដំណើរការរៀបចំឯកសារ ហើយសង្ឃឹមថានឹងត្រូវបានបញ្ជូនមកប្រទេសវិញ នៅសប្តាហ៍ក្រោយ”។ ខ្មែរថាមស៍ បានលាតត្រដាងពីក្រុមការងារនៃក្រុមបោកប្រាស់ទាំងនេះ ដែលត្រូវបានគេបោក មកប្រទេសកម្ពុជា ដើម្បីធ្វើការនៅក្នុងកន្លែងលេងល្បែងស៊ីសងខុសច្បាប់តាមប្រព័ន្ធអ៊ីនធឺណែត ដែលប្រតិបត្តិការរបស់ពួកគេនៅតែជាស្រមោល និងបំភាន់ភ្នែក។ កិច្ចខិតខំប្រឹងប្រែងរួមគ្នារបស់នគរបាលកម្ពុជា ជាមួយនឹងស្ថានទូតបរទេសផ្សេងទៀត ដូចជា ម៉ាឡេស៊ី ថៃ ឥណ្ឌូនេស៊ី ប៉ាគីស្ថាន វៀតណាម បាននាំអោយមានការដោះលែងមនុស្សរាប់សិបនាក់ ប្រសិនបើមិនបានរាប់រយនាក់នៃអ្នកដែលគេបង្ខាំងខ្លួន។ ទោះជាយ៉ាងណាក៏ដោយ មនុស្សជាច្រើនទៀតនៅតែធ្វើការជាមួយក្រុមនោះ ហើយមនុស្សជាច្រើនត្រូវបានគេរាយការណ៍ថាមិនចង់ចាកចេញដោយហេតុផលផ្សេងៗ ដែលភាគច្រើនគឺជាផលចំណេញដែលពួកគេទទួលបាន ប្រសិនបើពួកគេអាចសម្រេចគោលដៅដែលបានកំណត់៕ FMT/Khmer Times