https://www.khmertimeskh.com/501241899// Khmer Times February 20, 2023

បុរសម្នាក់នៅខេត្ត Binh Dinh បានបោកបញ្ឆោតមិត្តជិតស្និទ្ធរបស់ខ្លួនឱ្យក្លាយជាកម្មករខុសច្បាប់នៅកម្ពុជា ដើម្បីការពារខ្លួនពីការវាយដំពីថៅកែ។ Huynh Thanh Nhon មកពីក្រុង Quy Nhon ត្រូវបាននគរបាលខេត្ត Binh Dinh ឃាត់ខ្លួនអស់រយៈពេល៤ ខែខណៈដែលជននេះកំពុងស្ថិតនៅក្រោមការស៊ើបអង្កេតពីបទជួញដូរ មនុស្ស។ នគរបាលបាននិយាយថា Nhon បានសហការជាមួយមនុស្សជាច្រើននាក់ក្នុងការចរាចរមនុស្សចូលមកកម្ពុជាដើម្បីធ្វើការផ្ទុយពីឆន្ទៈរបស់ពួកគេ។ ជនរងគ្រោះមិនត្រូវបានគេអនុញ្ញាតឱ្យចាកចេញពីកន្លែងធ្វើការ ក៏ដូចជាត្រូវបានគេវាយដំ និងបង្អត់អាហារជាច្រើនម៉ោង។ ពួកគេត្រូវបង្ខំឱ្យបង់ប្រាក់ប្រសិនបើពួកគេចង់ត្រឡប់ទៅប្រទេសវៀតណាមវិញ។ Nhon បាននិយាយថាខ្លួនគាត់ផ្ទាល់គឺជាជនរងគ្រោះនៃការជួញដូរមនុស្សដែលត្រូវបានបោកបញ្ឆោតឱ្យទៅប្រទេសកម្ពុជាដោយធ្វើការក្នុងស្ថានភាពគ្រោះថ្នាក់ ហើយមិនអាចត្រឡប់ទៅប្រទេសវៀតណាមបានទេដោយសារតែខ្លួនត្រូវបានគេបង្ខាំង។

គាត់បាននិយាយថា គាត់ត្រូវបានគេណែនាំឱ្យធ្វើការងារដោយបុរសមិនបញ្ចេញឈ្មោះតាមអ៊ីនធឺណិតក្នុងខែកុម្ភៈឆ្នាំមុន។ បុរសនោះបានអះអាងថា ប្រាក់ខែការងារគឺពី ៧០០ ទៅ ១០០០ ដុល្លារក្នុងមួយខែ។ បន្ទាប់មក Nhon បានធ្វើដំណើរទៅទីក្រុងហូជីមិញ ជាកន្លែងដែលខ្លួនបានធ្វើដំណើរតាមឡាន។ បន្ទាប់មក មនុស្សដែលនៅទីនោះបានណែនាំគាត់ឱ្យបង្កើតគណនីអនឡាញជាច្រើន ដើម្បីបញ្ឆោតអ្នកដទៃឱ្យចូលរួមជាមួយក្រុមខ្លួន។ Nhon បានបន្តថា៖ «បន្ទាប់ពីជិតពីរសប្តាហ៍ខ្ញុំបានដឹងថាខ្ញុំនៅក្នុងប្រទេសកម្ពុជាមិនមែនប្រទេសវៀតណាមទេព្រោះខ្ញុំមិនត្រូវបានគេអនុញ្ញាតឱ្យចេញក្រៅ»។ គាត់បាននិយាយទៀតថា៖ «ជារៀងរាល់ថ្ងៃ ខ្ញុំត្រូវធ្វើការ ១៦ ម៉ោង ហើយអាចសម្រាកបានតែពេលយប់។ «ប្រសិនបើខ្ញុំធ្វើការមិនបានល្អ ខ្ញុំនឹងត្រូវគេវាយដំ បង្អត់អត់អាហារ ឬលក់ទៅកន្លែងផ្សេង»។ ប៉ុន្មានខែបន្ទាប់ពីគាត់បានទៅដល់ទីនោះជាលើកដំបូង Nhon ត្រូវបានលក់ទៅឱ្យក្រុមហ៊ុនមួយផ្សេងទៀតដែលជាកម្មសិទ្ធិរបស់ជនជាតិចិន ហើយត្រូវបានបង្ខំឱ្យធ្វើការងារដូចគ្នា។ គាត់និយាយថា គាត់ត្រូវបានគេបង្ខំអោយធ្វើការតាមប្រព័ន្ធអ៊ីនធឺណេត ដើម្បីល្បួងអោយអ្នកផ្សេងទៀតបង់ប្រាក់អោយក្រុមហ៊ុនពី៨,៣៩៦-១២,៥៩៤ ដុល្លារក្នុងមួយខែ និងត្រូវបានបង្ខំឱ្យធ្វើការថែមម៉ោង ប៉ុន្តែប្រាក់ខែរបស់គាត់ត្រូវបានកាត់បន្ថយ។

Nhon បាននិយាយថាគាត់ក៏ត្រូវបោកបញ្ឆោតមនុស្សឱ្យចូលរួមជាមួយក្រុមហ៊ុននេះផងដែរដោយគាត់ត្រូវបានគេសន្យាថា គាត់នឹងបាន១០០ ដុល្លារសម្រាប់មនុស្សម្នាក់ដែលគាត់ជ្រើសរើសបាន។ Nhonបាននិយាយថា «ដើម្បីបានលុយខ្លះ និងមិនអត់ឃ្លាន ការពារកុំអោយគេវាយធ្វើបាប ខ្ញុំបានបោកបញ្ឆោតមិត្តខ្ញុំបីនាក់ឲ្យមកទីនេះ»។ «តែខ្ញុំមិនបានទទួលលុយអីនោះទេ»។ នៅខែមីនា ឆ្នាំ២០២២ Nhon បានប្រាប់មិត្តមួយចំនួនតាមរយៈប្រព័ន្ធផ្សព្វផ្សាយសង្គមថា គាត់កំពុង “ធ្វើការពាក់ព័ន្ធនឹងកម្មវិធីហ្គេមលើកុំព្យូទ័រក្នុងខេត្ត Tay Ninh (ជាប់ព្រំដែនកម្ពុជា)” ជាការងារស្រាល និងមិនពិបាក ដោយទទួលបានប្រាក់ខែពី១៧ ទៅ២៤ លានដុង។ បន្ទាប់មកគាត់បានបញ្ចុះបញ្ចូលមិត្តរបស់គាត់ឱ្យចូលរួមជាមួយគាត់។ បុរសអាយុ១៨ឆ្នាំម្នាក់ជាមិត្តជិតស្និទ្ធរបស់ឈ្មោះ Nhon បានធ្លាក់ចូលក្នុងអន្ទាក់។

មិត្តភ័ក្តិរូបនេះបាននិយាយថា៖ «ពេលខ្ញុំដឹងថាខ្ញុំត្រូវគេបោកឱ្យទៅស្រុកខ្មែរ ខ្ញុំបានទូរស័ព្ទទៅNhon ហើយគាត់និយាយថា មិនអីទេ មុនពេលដែលគាត់បានផ្តាច់ការទាក់ទងតាមទូរស័ព្ទ និងបណ្ដាញសង្គម។ គាត់បាននិយាយថាគាត់ត្រូវធ្វើការពី១៦-១៧ ម៉ោងក្នុងមួយថ្ងៃនៅក្នុងកន្លែងបិទជិត។ មានមនុស្សប្រដាប់ដោយរំពាត់អគ្គិសនីបានឈរយាមគាត់។ ពួកគេវាយដំកម្មករ ហើយទុកឱ្យពួកគេអត់ឃ្លានដោយមិនញញើតប្រសិនបើជនរងគ្រោះធ្វើការមិនបានល្អ ឬមិនបានបោកបញ្ឆោតអ្នកដទៃឱ្យបង់ប្រាក់អោយពួកគេ។ ក្នុងរយៈពេល៨ខែចាប់តាំងពីគាត់ត្រូវបានលក់មកប្រទេសកម្ពុជាយុវជនអាយុ១៨ ឆ្នាំរូបនេះត្រូវបានលក់ទៅឱ្យក្រុមហ៊ុនចំនួនបីផ្សេងគ្នា។ នៅខែកញ្ញា ឆ្នាំ២០២២ គាត់ត្រូវបានលោះដោយគ្រួសាររបស់គាត់ក្នុងតម្លៃ៨០ លានដុង។ ក្រុមគ្រួសាររបស់ Nhon ក៏បានបង់ប្រាក់លោះគាត់កាលពីឆ្នាំមុនមុនពេលត្រូវបាននគរបាលចាប់ខ្លួន។

លោក Truong Van Phung អនុប្រធានផ្នែកស៊ើបអង្កេតនៃនាយកដ្ឋាននគរបាលខេត្ត Binh Dinh បាននិយាយថា ក្រុមជួញដូរមនុស្សតែងតែកំណត់គោលដៅលើយុវជនដែលបោះបង់ការសិក្សា និងអ្នកដែលញៀនហ្គេមអនឡាញ។ វៀតណាមត្រូវបានគេជួញដូរមកកម្ពុជាជាកម្មករខុសច្បាប់អស់ជាច្រើនឆ្នាំមកហើយ។ ស្ថានទូតវៀតណាមនៅទីនោះបាននិយាយថា មកទល់ពេលនេះ ខ្លួនបានធ្វើមាតុភូមិនិវត្តន៍ពលរដ្ឋវៀតណាមចំនួន ៨០០ នាក់ ត្រឡប់ពីប្រទេសកម្ពុជាវិញ៕ VnExpress