https://postkhmer.com/national/2024-1-6-122-257331
កម្ពុជា-ថៃ បានវាយតម្លៃខ្ពស់ចំពោះទំនាក់ទំនងទ្វេភាគី ខណៈភាគីទាំង ២ បង្ហាញជំហរក្នុងការពង្រឹងនិងផ្លាស់ប្ដូរការពិគ្រោះយោបល់ជុំវិញការទប់ស្កាត់ និងបង្ក្រាបបទល្មើសឆ្លងដែន ដើម្បីបុព្វហេតុលើបញ្ហាសន្តិសុខតាមបណ្តោយព្រំដែន និងការអភិវឌ្ឍសម្រាប់ប្រទេសទាំង ២។
ការវាយតម្លៃខ្ពស់នេះ ធ្វើឡើងតាមរយៈលោក ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃកម្ពុជា និងលោក Cherdkiat ATTHAKOR ឯកអគ្គរាជទូតវិសាមញ្ញ និងពេញសមត្ថភាពនៃប្រទេសថៃប្រចាំកម្ពុជា កាលពីថ្ងៃទី ៥ ខែមករា ឆ្នាំ ២០២៤ នៅទីស្តីការក្រសួងមហាផ្ទៃ។ នាជំនួបនោះភាគីទាំង ២ បានសម្ដែងនូវសេចក្ដីសង្ឃឹមដូចគ្នាថា ទំនាក់ទំនងកិច្ចសហប្រតិបត្តិការរវាងកម្ពុជា និងថៃ នឹងបន្តរីកចម្រើនខ្លាំងក្លាបន្ថែមទៀត។ លោក ស សុខា បានវាយតម្លៃខ្ពស់ចំពោះកិច្ចសហការជាមួយភាគីថៃក្នុងការទប់ស្កាត់ និងបង្ក្រាបបទល្មើស ការផ្លាស់ប្ដូរ និងចែករំលែកព័ត៌មាន កិច្ចសហការប្រយុទ្ធប្រឆាំងឧក្រិដ្ឋកម្មឆ្លងដែន ព្រមទាំងការជួយគ្នាទៅវិញទៅមកក្នុងការដោះស្រាយបាតុភាពអសកម្មផ្សេងៗ ដែលកើតមានឡើងនៅតាមព្រំដែន។ ជាមួយគ្នានោះ លោកបានកត់សម្គាល់ថា វត្តមានរបស់ ឯកអគ្គរាជទូតវិសាមញ្ញ និងពេញសមត្ថភាព ជាបេសកកម្មដ៏មានសារៈសំខាន់រួមចំណែក ដើម្បីពង្រឹងទំនាក់ទំនង និងពង្រីកកិច្ចសហប្រតិបត្តិការ រវាងប្រទេសទាំងពីរ លើវិស័យសំខាន់ៗ ជាអាទិ៍ សេដ្ឋកិច្ច នយោបាយ ពាណិជ្ជកម្ម ទេសចរណ៍ ការពារជាតិ និងសន្តិសុខ។ លោក ស សុខា ក៏បានថ្លែងអំណរគុណយ៉ាងជ្រាលជ្រៅចំពោះកិច្ចខិតខំប្រឹងប្រែងរបស់ ឯកអគ្គរាជទូត ដែលតែងតែយកចិត្ដទុកដាក់ជំរុញកិច្ចសហការដ៏ល្អ និងដើរតួនាទីយ៉ាងសកម្ម នៅក្នុងអាណត្តិបេសកកម្មការទូតរបស់ឯកឧត្ដម។ ជាការឆ្លើយតប លោក Cherdkiat ATTHAKOR បានថ្លែងកោតសរសើរ និងវាយតម្លៃខ្ពស់ចំពោះទំនាក់ទំនងទ្វេភាគីរវាងប្រទេសទាំងពីរ កម្ពុជា-ថៃ។
ពាក់ព័ន្ធសន្តិសុខនៅតាមព្រំដែនកម្ពុជា-ថៃ កាលពីខែមករា ឆ្នាំ ២០២៣ នៅក្នុងជំនួបរវាងអភិបាលខេត្តបន្ទាយមានជ័យលោក អ៊ុ រាត្រី និងលោក Cherdkiat ATTHAKOR បានសន្យាថា នឹងខិតខំជំរុញ និងបង្កើនកិច្ចសហប្រតិបត្តិការល្អបន្ថែមទៀត ជាពិសេសបណ្តាខេត្តជាប់ព្រំដែន ឱ្យបានកាន់តែល្អប្រសើរឡើង ប្រកបដោយការស្រឡាញ់រាប់អានគ្នា ស្គាល់សុខទុក្ខគ្នាទៅវិញទៅមក ដែលជាប្រទេសជិតខាងភូមិផងរបងជាមួយគ្នា៕
website_news:20240106_01
website_news/20240106_01.txt · Last modified: 2024/01/10 12:22 by kun keorasmey