https://www.rfa.org/khmer/news/human-rights/us-embassy-keeps-raising-human-trafficking-and-human-rights-with-sar-sokha-01142024031530.html
ឯកអគ្គរដ្ឋទូតអាមេរិក លោក ប៉ាទ្រីក ម័រហ្វី (Patrick Murphy) នៅតែបន្តលើកឡើងពីបញ្ហាបទឧក្រិដ្ឋកម្មឆ្លងដែន ការជួញដូរមនុស្ស និងការគោរពសិទ្ធិមនុស្សជាមួយរដ្ឋមន្ត្រីក្រសួងមហាផ្ទៃ លោក ស សុខា។ អ្នកឃ្លាំមើលសិទ្ធិមនុស្សថា រដ្ឋាភិបាលគួរតែយកចិត្តទុកដាក់ដោះស្រាយបញ្ហាទាំងអស់នេះឱ្យមានប្រសិទ្ធភាព។ ឯកអគ្គរដ្ឋទូតអាមេរិកប្រចាំនៅកម្ពុជាលោក បាទ្រីក ម័រហ្វី (Patrick Murphy) នៅតែបង្ហាញក្ដីព្រួយបារម្ភចំពោះស្ថានភាពជួញដូរមនុស្ស និងការរំលោភសិទ្ធិមនុស្សនៅកម្ពុជា។ លោក បាទ្រីក ម័រហ្វី បានបង្ហោះសារនៅលើបណ្ដាញសង្គមអិច (X) អតីតបណ្ដាញសង្គមទ្វីតធឺ (Twitter) ថា នៅក្នុងជំនួបរវាងលោកនិង រដ្ឋមន្ត្រីក្រសួងមហាផ្ទៃ លោក ស សុខា នៅឯទីស្ដីការក្រសួងមហាផ្ទៃ កាលពីថ្ងៃទី១២ ខែមករា ភាគីទាំងពីរ បានជជែកលើបញ្ហាជាច្រើន និងកិច្ចសហប្រតិបត្តិការសំខាន់ទំនាក់ទំនងរវាងសហរដ្ឋអាមេរិក និងកម្ពុជា ។ ក្រៅពីនេះ លោក ប៉ាទ្រីក ម័រហ្វី (Patrick Murphy) បន្តថា លោក និងលោក ស សុខា ក៏បានជជែកលើបញ្ហាការប្រឆាំងឧក្រិដ្ឋកម្មឆ្លងដែន ការប្រយុទ្ធប្រឆាំងការជួញដូរមនុស្ស និងការគោរពសិទ្ធិមនុស្ស។
ទាក់ទិននឹងការលើកឡើងនេះ វិទ្យុអាស៊ីសេរីមិនអាចទាក់ទងរដ្ឋលេខាធិការក្រសួងមហាផ្ទៃ និងជាអនុប្រធានអចិន្ត្រៃយ៍ នៃគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស អ្នកស្រី ជូ ប៊ុនអេង ដើម្បីសុំការបកស្រាយជុំវិញបញ្ហានេះបានទេ នៅថ្ងៃទី១៣ ខែមករា។
ប៉ុន្តែក្រសួងមហាផ្ទៃបានបង្ហោះសារលើគេហទំព័រហ្វេសប៊ុក (Facebook) ផ្លូវការរបស់ក្រសួងថា ឯកអគ្គរដ្ឋទូតអាមេរិក និងរដ្ឋមន្ត្រីក្រសួងមហាផ្ទៃ លោក ស សុខា បានពិភាក្សាអំពីការទប់ស្កាត់ និងការបង្ក្រាបបទល្មើសគ្រប់ទម្រង់ រួមទាំងបទល្មើសគ្រឿងញៀន បទល្មើសពាក់ព័ន្ធអនីតិជន និងឧក្រិដ្ឋកម្មឆ្លងដែន។ ទោះជាយ៉ាងណា ក្រសួងមហាផ្ទៃមិនបានបង្ហាញពីការការជជែករឿងការគោរពសិទ្ធិមនុស្សដូចការលើកឡើងរបស់មន្ត្រីស្ថានទូតសហរដ្ឋអាមេរិកឡើយ។ អ្នកសិក្សាកិច្ចការសង្គម និងនយោបាយ លោក ប៉ោ មករា ប្រាប់វិទ្យុអាស៊ីសេរីនៅថ្ងៃទី១៣ មករា ថា ប្រសិនបើកម្ពុជានៅតែមិនដោះស្រាយបញ្ហាការរំលោភសិទ្ធិមនុស្ស និងការជួញដូរមនុស្សទេ នោះអាចប៉ះពាល់ដល់សេដ្ឋកិច្ចកម្ពុជាកាន់តែធ្ងន់ធ្ងរ។ លោក ប៉ោ មករា៖ «ការដែលរំលោភសិទ្ធិមនុស្សគឺវាពាក់ព័ន្ធនឹងការដឹកនាំគ្មានតម្លាភាព ការគំរាមកំហែង និងសិទ្ធិជាមូលដ្ឋានរបស់បងប្អូនប្រជាពលរដ្ឋកាលដែលវាមានបញ្ហាទាំងអស់ហ្នឹងឡើងវាមិនមានការធានាប្រព័ន្ធយុត្តិធម៌ហ្នឹងទៅដល់បងប្អូនប្រជាពលរដ្ឋក៏ដូចជាបងប្អូនគ្រប់មជ្ឈដ្ឋាន»។
កាលពីថ្ងៃទី១១ ខែមករា អង្គការឃ្លាំមើលសិទ្ធិមនុស្សអន្តរជាតិ យូមែន រ៉ៃត៍ វ៉ច្ឆ (Human Rights Watch ) បានចេញរបាយការណ៍ពិភពលោកប្រចាំឆ្នាំ២០២៤ បង្ហាញថា កម្ពុជាបានផ្លាស់ប្ដូរនាយករដ្ឋមន្ត្រីថ្មី ប៉ុន្តែមិនបានផ្លាស់ប្ដូររបៀបដឹកនាំដែលគោរពសិទ្ធិមនុស្ស និងប្រជាធិបតេយ្យឡើយ។ របាយការណ៍បញ្ជាក់ថា ចាប់តាំងពីថ្ងៃទី២២ ខែសីហា ឆ្នាំ២០២៣មក ទោះបីជាកម្ពុជាបានផ្លាស់ប្ដូរមេដឹកនាំថ្មី គឺ លោក ហ៊ុន ម៉ាណែត ជានាយករដ្ឋមន្ត្រីបន្តពីឪពុកគឺលោក ហ៊ុន សែន ក៏ដោយ ប៉ុន្តែរដ្ឋាភិបាលកម្ពុជា នៅតែប្រើប្រាស់ប្រព័ន្ធតុលាការយាយីលើអ្នករិះគន់ រារាំងគណបក្សភ្លើងទៀនមិនឱ្យចូលរួមការបោះឆ្នោត រឹតត្បិតប្រព័ន្ធផ្សព្វផ្សាយឯករាជ្យ និងប្រើអំពើហិង្សាចាប់ចងអ្នករិះគន់ឥតស្រាកស្រាន្តដដែល។ ជុំវិញបញ្ហានេះប្រធានសមាគមការពារសិទ្ធិមនុស្សអាដហុក (Adhoc) លោក នី សុខា មានប្រសាសន៍ថា ការលើកឡើងរបស់មន្ត្រីស្ថានទូតសហរដ្ឋអាមេរិកម្ដងហើយម្ដងទៀតបែបនេះ គឺដោយសារអនុវត្តច្បាប់នៅកម្ពុជា មិនទាន់ឆ្លើយតបនឹងបញ្ហាដែលកំពុងកើតមាន។
លោក នី សុខា៖ «ទី២រដ្ឋាភិបាលកម្ពុជាត្រូវតែប្ដេជ្ញាចិត្តខ្ពស់នៅក្នុងការអនុវត្តនូវគោលការណ៍ប្រជាធិបតេយ្យសេរីពហុបក្សឱ្យបានត្រឹមត្រូវបង្កលក្ខណៈធ្វើយ៉ាងសម្រុះសម្រួលធ្វើឱ្យមានការដោះស្រាយបញ្ហាវិវាទនយោបាយការប្រទូស្តប្រទាំងនយោបាយឱ្យវាមានភាពស្រុះស្រួលគ្នាដើម្បីងាកមករៀបចំឱ្យមានដំណើរការបោះឆ្នោតប្រកបដោយភាពសេរី យុត្តិធម៌ និងត្រឹមត្រូវអាហ្នឹងត្រូវតែរដ្ឋាភិបាលបច្ចុប្បន្នត្រូវតែយកចិត្តទុកដាក់ដោះស្រាយ»។
អ្នកឃ្លាំមើលសិទ្ធិមនុស្សយល់ឃើញថា កម្ពុជាគួរតែបើកលំហសិទ្ធិសេរីភាព និងទប់ស្កាត់លំហូរជនជាតិបរទេសដែលមករកស៊ីខុសច្បាប់នៅកម្ពុជាជាពិសេសគឺការជួញដូរមនុស្ស ដែលបញ្ហានេះធ្វើឱ្យកម្ពុជាបាក់មុខមាត់ និងបាត់បង់ប្រាក់ចំណូលបានមកពីវិស័យទេសចរណ៍៕
website_news:20240115_01
website_news/20240115_01.txt · Last modified: 2024/01/15 13:32 by kun keorasmey