https://go.kspg.co/tg/1867735 ទីក្រុងបាងកក៖ ថ្មីៗនេះ សមត្ថកិច្ចថៃចាប់ខ្លួននារីម្នាក់ពាក់ព័ន្ធនឹងការ «ពពោះជំនួស» ដែលប្រទេសថៃចាត់ទុកជាអំពើខុសច្បាប់។ ការចាប់ខ្លួននេះធ្វើឡើងនៅពេលនារីជាជនសង្ស័យវិលត្រឡប់ពីប្រទេសដទៃចូលទៅក្នុងប្រទេសថៃវិញ។ នៅពេលទៅដល់អាកាសយានដ្ឋានសុវណ្ណភូមិនៃទីក្រុងបាងកក សមត្ថកិច្ចក៏ចាប់ខ្លួននារីនោះព្រឹបតែម្ដងដោយមិនឱ្យដឹងខ្លួនជាមុន។ គួរកត់សម្គាល់ថាការចាប់ខ្លួននេះធ្វើឡើងក្រោយការបង្ក្រាបសម្បុកខ្សែបណ្ដាញរកស៊ីពពោះជំនួសនៅខេត្តណងខៃ (Nong Khai) កាលពីខែឧសភា ឆ្នាំ២០២៣។ សមត្ថកិច្ចស៊ើបដឹងថាបណ្ដាញនេះដើរទាក់ទងនារីៗជនជាតិថៃដើម្បីឱ្យពួកគេពពោះគភ៌របស់ជនជាតិបរទេស។ នៅក្នុងប្រតិបត្តិការបង្ក្រាបនោះ នាយកដ្ឋានស៊ើបអង្កេតពិសេសរបស់ថៃជួយសង្គ្រោះកុមារាម្នាក់ឈ្មោះថេនថៃ (Taenthai) ដែលគេជឿជាក់ថាគាត់ជាកូនបានមកពីការស៊ីឈ្នួលពពោះជំនួស។ ក្រោយពេលសង្គ្រោះកុមារារូបនេះមិនយូរប៉ុន្មាននៅខែកញ្ញា ឆ្នាំ២០២៣ សមត្ថកិច្ចជួយសង្គ្រោះកុមារ៦នាក់ទៀតដែលគេត្រៀមដឹកយកទៅប្រទេសចិន (ដើម្បីយកទៅឱ្យម្ដាយឪពុកបង្កើតរបស់ពួកគេដែលជួលនារីជនជាតិថៃពពោះជំនួសពួកគេ)។ នៅខែកញ្ញាដដែលនោះ សមត្ថកិច្ចឆ្មក់ចូលគ្លីនិកបីកន្លែងនៅទីក្រុងបាងកកដែលចូលដៃជាមួយបណ្ដាញខុសច្បាប់ខាងលើដើម្បីជួយសម្រួលការពពោះជំនួស (ជាធម្មតា ការពពោះជំនួសត្រូវការអ្នកជំនាញបច្ចេកទេសខាងសុខាភិបាល និងសម្ភព)។ កាលនោះសមត្ថកិច្ចរឹបអូសបានឯកសារបញ្ជាក់ពីការពពោះ ហើយតម្កល់ទុកជាភស្តុតាងសម្រាប់ដាក់បន្ទុក។ ក្រោយមក តុលាការចេញដីកាចាប់ខ្លួននារីជនជាតិថៃឈ្មោះសៃហ្វុន (Saifon) ដែលជាអ្នកស៊ីឈ្នួលពពោះកំណើតទារកឈ្មោះថេនថៃ។ ប៉ុន្តែនារីនោះរកវិធីគេចខ្លួនបានសម្រេច និងចាកចេញទៅក្រៅប្រទេស។ ទោះជាបែបនេះក្ដី សមត្ថកិច្ចបន្តស៊ើបអង្កេតដឹងថាសៃហ្វុនទិញសំបុត្រយន្តហោះប្រុងវិលត្រឡប់ទៅប្រទេសថៃវិញនៅថ្ងៃទី១៣ ខែមករា។ គេធ្លាប់ឮកុកភ្លេចជុង ប៉ុន្តែនេះមិនមែនភ្លេចទេគឺដើរទៅជាប់ជុងតែម្ដងព្រោះកន្លងផុតទៅទើបតែបានប៉ុន្មានខែមិនអាចមនុស្សម្នាក់ដែលត្រូវគេតាមចាប់ខ្លួនបែរជាឆាប់ភ្លេចត្រចៀកដល់ថ្នាក់ហ្នឹងទេ។ ទំនងជានារីរូបនោះមើលស្រាលស្ថានការណ៍ អាងថាមិនអីៗ។ បន្ទាប់ពីទទួលដំណឹងនេះ សមត្ថកិច្ចចាប់ខ្លួននារីឈ្មោះសៃហ្វុន។ នៅក្នុងករណីនារីឈ្មោះសៃហ្វុន, គេមិនទាន់ដឹងគោលបំណងពិតប្រាកដនៃការពពោះទេ។ ជាទូទៅ, ជនជាតិបរទេសជួលនារីដទៃឱ្យពពោះជំនួសខ្លួនព្រោះពួកគេចង់បានកូនស្នងវង្សត្រកូល។ ប៉ុន្តែមានរឿងរ៉ាវអាថ៌កំបាំងដែលអាក្រក់ជាងនេះ។ អ្នកខ្លះជួលគេពពោះជំនួសដើម្បីបានកូន ហើយយកកូននោះទៅវះកាត់យកគ្រឿងក្នុងដាក់ចូលក្នុងសរីរៈរាងកាយរបស់ពួកគេ ឬសាច់ញាតិរបស់ពួកគេដែលត្រូវការដូរគ្រឿងក្នុង។ ធម្មតាអ្នកដែលមានហ្សែនដូចគ្នានៅពេលដូរគ្រឿងក្នុងងាយស្រួលស្គាល់គ្នា មិនប្រឆាំងគ្នា។ សមត្ថកិច្ចរកឃើញថាអ្នកខ្លះរៀបចំបណ្ដាញពពោះជំនួសដើម្បីវះកាត់គ្រឿងក្នុងជាលក្ខណៈធ្វើអាជីវកម្មជួញដូរសរីរៈរាងកាយរបស់មនុស្ស។ យោងតាមច្បាប់របស់ប្រទេសថៃ នារីដែលស៊ីឈ្នួលពពោះជំនួសដោយគ្មានការអនុញ្ញាតពីអាជ្ញាមានសមត្ថកិច្ច (ទោះបីសាមីខ្លួនស្ម័គ្រចិត្តពពោះក៏ដោយ) អាចជាប់ពន្ធនារគារ៦ខែ, ជាប់ពិន័យជាប្រាក់១ម៉ឺនបាត ឬអាចបង់ប្រាក់ផង ជាប់ពន្ធនាគារផង។ អ្នកពាក់ព័ន្ធនឹងការពពោះជំនួសអាចជាប់ពន្ធនាគារដប់ឆ្នាំ និងពិន័យជាប្រាក់ពីរសែនបាតជាទោសអតិបរមា។ នៅក្នុងករណីស្រដៀងគ្នានៅប្រទេសថៃកាលពីខែមេសា ឆ្នាំ២០២៣ នារីជនជាតិចិនម្នាក់ប្រើល្បិចរៀបការក្លែងក្លាយជាមួយបុរសជនជាតិថៃដើម្បីទទួលបានសញ្ជាតិថៃ។ នារីនោះត្រូវសមត្ថកិច្ចចាប់ខ្លួនពាក់ព័ន្ធនឹងការបង្កើតបណ្ដាញពពោះជំនួស, ក្លែងបន្លំអត្តសញ្ញាណអ្នកដទៃ និងរត់ពន្ធមនុស្ស។ ពួកជនជាតិចិនច្រើនប្រើវិធីពពោះជំនួសដើម្បីបានបន្តរស់នៅលើទឹកដីថៃ និងជួយឱ្យពួកគេ និងកូនរបស់ពួកគេមានសិទ្ធិស្របច្បាប់ដើម្បីគ្រប់គ្រងមុខជំនួញនៅលើទឹកដីថៃ៕ នារីជនជាតិថៃឈ្មោះសៃហ្វុនដែលត្រូវសមត្ថកិច្ចចាប់ខ្លួននៅព្រលានយន្តហោះសុវណ្ណភូមិ នារីជនជាតិចិនដែលរៀបការប្ដីក្លែងក្លាយដើម្បីបានសញ្ជាតិថៃ និងបើកខ្សែបណ្ដាញពពោះជំនួស https://thethaiger.com/news/national/thai-woman-arrested-for-illegal-surrogacy-on-her-return-from-china