https://www.postkhmer.com/national/2024-1-19-1350-257700
ជំនួបពិភាក្សាការងាររវាងលោក ស ថេត អគ្គស្នងការនគរបាលជាតិនិងលោកស្រី ដេវីយ៉ានី អ៊ុតាំ ខូប្រាហ្គេត (Devyani Uttam Khobragade) ឯកអគ្គរដ្ឋទូតសាធារណរដ្ឋឥណ្ឌាប្រចាំកម្ពុជា កាលពីថ្ងៃទី១៨ ខែមករា ឆ្នាំ ២០២៤ នៅទីស្តីការក្រសួងមហាផ្ទៃ។
កម្ពុជា ស្នើភាគីឥណ្ឌា បង្កើតយន្តការផ្តល់ព័ត៌មានទៅវិញទៅមកពាក់ព័ន្ធមុខសញ្ញាបទល្មើសលួចឆ្លងដែនគ្រប់ប្រភេទ និងបទល្មើសមានការចាត់តាំង ជាពិសេសបទល្មើសឆបោកតាមប្រព័ន្ធបច្ចេកវិទ្យាអនឡាញ ដើម្បីធានាដល់សន្តិសុខ និងសុវត្ថិភាពរបស់ប្រជាពលរដ្ឋនៃប្រទេសទាំង២។
សំណើរបស់កម្ពុជានេះ ធ្វើនៅក្នុងជំនួបពិភាក្សាការងាររវាងលោក ស ថេត អគ្គស្នងការនគរបាលជាតិនិងលោកស្រី ដេវីយ៉ានី អ៊ុតាំ ខូប្រាហ្គេត (Devyani Uttam Khobragade) ឯកអគ្គរដ្ឋទូតសាធារណរដ្ឋឥណ្ឌាប្រចាំកម្ពុជា កាលពីថ្ងៃទី១៨ ខែមករា ឆ្នាំ ២០២៤ នៅទីស្តីការក្រសួងមហាផ្ទៃ។
យោងតាមហ្វេសប៊ុករបស់ក្រសួងមហាផ្ទៃ នាជំនួបនោះ លោកស្រី ដេវីយ៉ានី បានថ្លែងអំណរគុណចំពោះកម្ពុជាដែលបានផ្តល់កិច្ចសហការបានយ៉ាងល្អជាមួយនឹងតំណាងស្ថានទូតឥណ្ឌា ក្នុងការជួយ សង្គ្រោះប្រជាពលរដ្ឋឥណ្ឌា ដែលរងគ្រោះដោយអំពើឆបោកជាច្រើននាក់ក្នុងពេលកន្លងមក។
លោកស្រីបានថ្លែងថា៖«ជាពិសេស ថ្លែងអំណរគុណដល់រាជរដ្ឋាភិបាលកម្ពុជា ក្រសួងមហាផ្ទៃ ក៏ដូចជាអគ្គនាយកដ្ឋានចំណុះ ដែលបានជួយសម្រួលដល់ពលរដ្ឋឥណ្ឌាបានធ្វើមាតុភូមិនិវត្តន៍ទៅកាន់ប្រទេសកំណើតវិញដោយគ្មានការផាកពិន័យ ពាក់ព័ន្ធនឹងការស្នាក់នៅលើសទិដ្ឋាការ»។
លោកស្រី ក៏បានលើកឡើងពីកិច្ចការងារបន្តពង្រឹងកិច្ចសហប្រតិបត្តិការលើការធានា សន្តិសុខសណ្តាប់ធ្នាប់ និងសុវត្ថិភាពរបស់ប្រជាពលរដ្ឋនៃប្រទេសទាំងពីរផងដែរ។
ក្នុងឱកាសនោះ លោក ស ថេត បានលើកឡើងអំពីកិច្ចខិតខំប្រឹងប្រែងរបស់នគរបាលជាតិកម្ពុជា ដែលជាសេនាធិការផ្ទាល់របស់ក្រសួងមហាផ្ទៃ ក្នុងការប្រឆាំងទប់ស្កាត់បទល្មើសលួចឆ្លងដែនគ្រប់ប្រភេទ និងបទល្មើសមានការចាត់តាំង ជាពិសេសបទល្មើសឆបោកតាមប្រព័ន្ធបច្ចេកវិទ្យាអនឡាញ។
លោកក៏បានស្នើភាគីឥណ្ឌាពិនិត្យលទ្ធភាពក្នុងការបង្កើតយន្តការទំនាក់ទំនងផ្តល់ព័ត៌មានទៅវិញទៅមកពាក់ព័ន្ធមុខសញ្ញាសង្ស័យ ឬខ្សែរយៈបណ្តាញឱ្យបានទាន់ពេលវេលា និងច្បាស់លាស់ដើម្បីធានាដល់ការចាត់វិធានការបង្ក្រាបមានប្រសិទ្ធភាព និងទាន់ពេលវេលា។
ជាងនេះទៅទៀត លោកក៏បានស្នើឱ្យមានការលើកកម្ពស់សមត្ថភាពមន្ត្រីនគរបាលជាតិកម្ពុជា តាមរយៈការផ្តល់អាហារូបករណ៍បញ្ជូនទៅបណ្តុះបណ្តាលលើមុខជំនាញបច្ចេកវិទ្យាទំនើប ដើម្បីឆ្លើយតបទៅនឹងបទល្មើសឆបោកតាមប្រព័ន្ធអនឡាញ។
ជាការឆ្លើយតបទៅនឹងសំណើនេះ លោកស្រីឯកអគ្គរដ្ឋទូតឥណ្ឌា បានសន្យានិងពាំនាំនូវរាល់សំណូមពរពាក់ព័ន្ធនឹងការបណ្តុះបណ្តាលកសាងធនធានមនុស្សលើបច្ចេកវិទ្យាទៅឱ្យស្ថាប័នមានសមត្ថកិច្ចពាក់ព័ន្ធ ដើម្បីពិនិត្យ ពិចារណាផ្តល់អាហារូបករណ៍ដល់នគរបាលជាតិកម្ពុជា៕
website_news:20240119_02
website_news/20240119_02.txt · Last modified: 2024/01/22 13:37 by kun keorasmey