ភ្នំពេញៈកម្ពុជា-វៀតណាម វាយតម្លៃខ្ពស់ ចំពោះកិច្ចសហប្រតិបត្តិការលើគ្រប់វិស័យនៃប្រទេសទាំង២ ជាពិសេសកិច្ចសហប្រតិបត្តិការក្នុងការទប់ស្កាត់ប្រយុទ្ធប្រឆាំងគ្រឿងញៀន និងឧក្រិដ្ឋកម្មឆ្លងដែន ដោយភាគីទាំង២នឹងបន្តពង្រីកកិច្ចសហប្រតិបត្តិការក្នុងការកសាងធនធានមនុស្ស និងការផ្លាស់ប្ដូរសិក្ខាកាមលើវិស័យសន្តិសុខជាតិផងដែរ។
ការវាយតម្លៃនេះត្រូវបានលើកឡើងនៅក្នុងជំនួបរវាងលោកនាយករដ្ឋមន្ត្រី ហ៊ុន ម៉ាណែត និងលោក តូ ឡឹម រដ្ឋមន្ត្រីក្រសួងនគរបាលវៀតណាមនៅថ្ងៃទី២៤ ខែមករា ឆ្នាំ២០២៤ នៅឯវិមានសន្តិភាព។
យោងតាមខ្លឹមសារនៃជំនួបនេះ លោក ហ៊ុន ម៉ាណែត បានលើកឡើងថា ភាគីទាំង២ បានស្វាគមន៍ចំពោះការបន្តពង្រឹងនិងពង្រីកកិច្ចសហប្រតិបត្តិការក្នុងការកសាងធនធានមនុស្សតាមរយៈការបណ្ដុះបណ្ដាល និងការផ្លាស់ប្ដូរសិក្ខាកាមនៃប្រទេសទាំង២លើវិស័យសន្តិសុខជាតិ និងសណ្តាប់ធ្នាប់សាធារណ:។
ក្នុងឱកាសនោះដែរលោក តូ ឡឹម បានបញ្ជាក់ពីការប្ដេជ្ញាចិត្តរបស់ភាគីវៀតណាមនៅក្នុងការបន្តពង្រឹង និងពង្រីកកិច្ចសហប្រតិបត្តិការលើគ្រប់វិស័យរវាងប្រទេសទាំង២ឱ្យកាន់តែរស់រវើកបន្ថែមទៀត ជាពិសេសលើផ្នែកនយោបាយ សេដ្ឋកិច្ច និងពាណិជ្ជកម្មក្នុងក្របខ័ណ្ឌទ្វេភាគី ក៏ដូចជាពហុភាគី។
លោកបានលើកឡើងថា៖«វៀតណាមនឹងបន្តពង្រឹងកិច្ចសហប្រតិបត្តិការលើវិស័យសន្តិសុខជាតិ ការប្រយុទ្ធប្រឆាំងឧក្រិដ្ឋកម្មឆ្លងដែន បញ្ហាគ្រឿងញៀន ការប្រយុទ្ធប្រឆាំងបទល្មើសគ្រប់ប្រភេទនិងការពង្រីកកិច្ចសហប្រតិបត្តិការលើវិស័យឌីជីថលរវាងក្រសួងនគរបាលវៀតណាម និងក្រសួងមហាផ្ទៃកម្ពុជា តាមរយៈការចែករំលែកព័ត៌មាន និងផ្លាស់ប្តូរបទពិសោធន៍លើវិស័យឌីជីថលនេះ ដោយសារវៀតណាមក៏បាននិងកំពុងមានកិច្ចសហប្រតិបត្តិការលើវិស័យឌីជីថលនេះ ជាមួយសិង្ហបុរី និងម៉ាឡេស៊ីផងដែរ»។
ជាការឆ្លើយតបលោក ហ៊ុន ម៉ាណែត បានវាយតម្លៃខ្ពស់ ចំពោះកិច្ចសហប្រតិបត្តិការលើគ្រប់វិស័យនៃប្រទេសទាំង២ និងចំពោះកិច្ចសហប្រតិបត្តិការរវាងក្រសួងមហាផ្ទៃកម្ពុជា និងក្រសួងនគរបាលវៀតណាម ជាពិសេសកិច្ចសហប្រតិបត្តិការក្នុងការទប់ស្កាត់ និងការប្រយុទ្ធប្រឆាំងឧក្រិដ្ឋកម្មឆ្លងដែន ការប្រយុទ្ធប្រឆាំងគ្រឿងញៀន និងបទល្មើសផ្សេងៗទៀតផងដែរ។
ទន្ទឹមនឹងនេះ លោកក៏បានស្វាគមន៍ចំពោះការពង្រីកកិច្ចសហប្រតិបត្តិការលើវិស័យឌីជីថល ដែលភាគីវៀតណាមនឹងចែករំលែកបទពិសោធន៍នេះជាមួយនឹងក្រសួងមហាផ្ទៃកម្ពុជាផងដែរ។
នាយកទទួលបន្ទុកកិច្ចការទូទៅនៃអង្គការលីកាដូលោកអំ សំអាត បានថ្លែងថា តាមការសង្កេតឃើញថា បញ្ហាការជួញដូរនិងចរាចរណ៍គ្រឿងញៀននៅកម្ពុជានៅតែជាចំណុចមួយគួរឱ្យព្រួយបារម្ភនៅឡើយ ទោះបីកន្លងមកឃើញមានការបង្ក្រាបបានច្រើនករណីក្តី។
លោកបានបញ្ជាក់ថា៖«យើងមើលទៅអាចនឹងមានលំហូរចូលគ្រឿងញៀន ព្រោះបង្ក្រាបបានច្រើន ប៉ុន្តែនៅតែមាន ដែលចំណុចនេះទាមទារឱ្យមានកិច្ចពង្រឹងកិច្ចសហប្រតិបត្តិការបន្ថែមទៀតរវាងបណ្តាប្រទេសជិតខាងជាមួយ វៀតណាម ថៃ និងឡាវជាដើម ដើម្បីទប់លំហូរចូលទាំងគ្រឿងញៀននិងបទល្មើសឧក្រិដ្ឋកម្មឆ្លងដែន»។
សូមជម្រាបថា កម្ពុជា-វៀតណាម តាមរយៈក្រសួងមហាផ្ទៃកម្ពុជា និងក្រសួងនគរបាលវៀតណាម កាលពីថ្ងៃទី ២៣ ខែមករា ឆ្នាំ២០២៤ បានចុះហត្ថលេខាលើផែនការសហប្រតិបត្តិការឆ្នាំ២០២៤ ដើម្បីបន្តអនុវត្តនូវយន្តការសហប្រតិបត្តិការអនុវត្តច្បាប់កាន់តែសកម្ម និងខ្លាំងក្លាថែមទៀត៕
ជំនួបរវាងលោក ហ៊ុន ម៉ាណែត និងលោក តូ ឡឹម នៅថ្ងៃទី២៤ មករា ។ រូបថត STPM