សមត្ថកិច្ចនគរបាលខេត្តព្រះវិហារ បានឃាត់ខ្លួនជនសង្ស័យជនជាតិចិនសរុបចំនួន ១៥នាក់ប្រុស និងជនជាតិខ្មែរម្នាក់ ករណីដឹកជញ្ជូនជនជាតិចិនឆ្លងដែនខុសច្បាប់ចំនួន ០២លើក នៅចំណុចឃុំកំពង់ស្រឡៅមួយ និងឃុំកំពង់ស្រឡៅពីរ ស្រុកឆែប ព្រំដែនកម្ពុជា-ឡាវ។ នេះបើតាមសំណេរនៅលើទំព័រហ្វេសប៊ុកអគ្គស្នងការដ្ឋាននគរបាលជាតិនារាត្រីថ្ងៃទី៣១ ខែមករានេះ។ តាមការសំណេរដដែល ក្រោមការដឹកនាំពីសំណាក់លោក គីម រិទ្ធី អភិបាលខេត្ត និងជាប្រធានគណៈបញ្ជការឯកភាពខេត្តព្រះវិហារ និងការបញ្ជាផ្ទាល់របស់លោកឧត្តមសេនីយ៍ទោ សួស សុខដារ៉ា ស្នងការនគរបាលខេត្តព្រះវិហារ កម្លាំងជំនាញនៃស្នងការដ្ឋាននគរបាលខេត្តព្រះវិហារ សហការជាមួយកម្លាំងអធិការដ្ឋាននគរបាលស្រុកឆែប និងវរសេនាតូចនគរបាលព្រំដែនគោក១០៥ បានចុះបង្រ្កាបករណីដឹកជញ្ជូនជនជាតិចិនឆ្លងដែនខុសច្បាប់ចំនួន ០២លើក នៅចំណុចឃុំកំពង់ស្រឡៅមួយ និងឃុំកំពង់ស្រឡៅពីរ ស្រុកឆែប ព្រំដែនកម្ពុជា-ឡាវ។
ក្នុងប្រតិបត្តិការនេះ សមត្ថកិច្ចបានឃាត់ខ្លួនជនសង្ស័យជនជាតិចិនសរុបចំនួន ១៥នាក់ប្រុស និង ជនជាតិខ្មែរចំនួន ០១នាក់ជាអ្នកបើកបររថយន្ត និងដកហូតវត្ថុតាងរថយន្តចំនួន១គ្រឿង ដើម្បីអនុវត្តតាមនីតិវិធី៕
