សៀមរាបៈ លោកស្រី ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធានអចិន្រៃ្តយ៍នៃគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស គ.ជ.ប.ជ ជំរុញដល់កម្លាំងជំនាញ និងអាជ្ញាធរពាក់ព័ន្ធគ្រប់រាជធានី-ខេត្ត-ក្រុង បង្កើនការផ្សព្វផ្សាយឱ្យកាន់តែទូលាយពីគ្រោះថ្នាក់នៃអំពើជួញដូរមនុស្ស ដើម្បីរួមគ្នាប្រឆាំងអំពើឧក្រិដ្ឋនេះ ខណៈបទល្មើសនៃអំពើជួញដូរមនុស្សនៅបន្តកើតមានតាមគ្រប់រូបភាព។
ការជំរុញនេះ បានធ្វើឡើងក្នុងកិច្ចប្រជុំបូកសរុបលទ្ធផលការងារប្រចាំឆ្នាំ ២០២៣ និងលើកទិសដៅបន្តឆ្នាំ ២០២៤ របស់គណ:កម្មាធិការប្រយុទ្ធប្រឆាំងអំពើជួញដូរមនុស្ស ខេត្តសៀមរាប កាលថ្ងៃទី ៣១ ខែមករា ឆ្នាំ ២០២៤។ នេះបើតាមរដ្ឋបាលខេត្តសៀមរាប។
លោកស្រី ជូ ប៊ុនអេង លើកឡើងថា អំពើជួញដូរមនុស្ស ក្នុងរូបភាពការនាំចេញដោយមិនស្របច្បាប់សម្រាប់នាំចេញឆ្លងដែនទៅក្រៅប្រទេស និងការនាំចូលមកពីបរទេស ដែលជាសកម្មភាពខុសច្បាប់ បានជះឥទិ្ធពលមិនល្អដល់ប្រទេសកម្ពុជា។
លោកស្រីបន្តថា៖ «យើងសង្កេតឃើញថា បទល្មើសនៅតែកើតមាន ហើយប្រជាពលរដ្ឋនៅតែបន្តរងគ្រោះជាបន្តបន្ទាប់ ដែលភាពរងគ្រោះមួយចំនួន គឺកើតឡើងនៅក្រៅប្រទេស ក្នុងពេលប្រជាពលរដ្ឋធ្វើចំណាកស្រុក។ជាពិសេសការធ្វើទេសន្តរប្រវេសន៍ ដោយមិនមានច្បាប់ត្រឹមត្រូវ ក្នុងការស្វែងរកការងារ ទាំងការស្វែងរកគូស្រករនៅក្រៅប្រទេស»។
ម្យ៉ាងទៀតបទល្មើសមួយចំនួន ជនរងគ្រោះក៏ក្លាយជាជនល្មើសផងដែរ ទៅតាមរូបភាព ដូចជា (ការពពោះ បង្កើតយកកូនលក់) ជាដើម។ លោកស្រី បន្ថែមថា ភាពស្មុគស្មាញនៃបទល្មើសជួញដូរមនុស្ស បានធ្វើឱ្យការអនុវត្តច្បាប់ជួបការលំបាក ក្នុងការវិភាគរកធាតុផ្សំនៃអំពើល្មើស ដើម្បីបង្ក្រាប ហើយបានអូសបន្លាយឱ្យជនល្មើសរួចផុតពីការផ្តន្ទាទោស។
ក្នុងឱកាសនោះលោកស្រី ជូ ប៊ុនអេង បានជំរុញឱ្យកម្លាំងជំនាញ អាជ្ញាធរមូលដ្ឋាន ធ្វើការផ្សព្វផ្សាយជាសាធារណៈពីបញ្ហា នេះឱ្យកាន់តែទូលាយ ដើម្បីអប់រំទូន្មាន ដាស់តឿន និងជាសារ ក្រើនរំឭកដល់ប្រជាពលរដ្ឋគ្រប់ ទីកន្លែងបានដឹងបានឮ កុំឱ្យជឿលើការអូសទាញពីជនខិលខូច ជាមេខ្យល់។
ជាមួយគ្នានេះលោកស្រី យូ សុភា អភិបាលរងខេត្តសៀមរាបនិង ជាប្រធានលេខាធិការដ្ឋាននៃគ.ជ.ប.ជ ខេត្តនេះ បានថ្លែងឱ្យដឹងថា អំពើជួញដូរមនុស្ស គឺជាបទឧក្រិដ្ឋមួយក្នុងចំណោមឧក្រិដ្ឋកម្មឆ្លងដែន ដែលប្រទេសនានាបាននិងកំពុងតែប្រឈមមុខនាពេលបច្ចុប្បន្ន។
លោកស្រីបន្តថា៖ «អំពើជួញដូរមនុស្ស ក៏ត្រូវបានចាត់ទុកថា ជាទាសភាពសម័យទំនើប ដែលមានចរិតស្មុគស្មាញប្រកបដោយល្បិចកលពាក់ព័ន្ធទៅនឹងរបត់នៃផ្នត់គំនិត ចិត្តសាស្ត្រសង្គម ការរីកចម្រើននៃវិទ្យាសាស្ត្រ បច្ចេកវិទ្យា ការវិវត្តន៍នៃសេដ្ឋកិច្ច សង្គមនយោបាយជាតិអន្តរជាតិជាដើមដែលត្រូវការជាចាំបាច់នូវការប្តេជ្ញាចិត្តរួមគ្នា ដើម្បីរិះរកវិធានការ ដ៏មានប្រសិទ្ធភាពក្នុងការបង្ការទប់ស្កាត់ និងបង្ក្រាបរាល់បទល្មើស»។
ជុំវិញបញ្ហានេះលោក ស សុខា រដ្ឋមន្ត្រីក្រសួងមហាផ្ទៃ និងជាប្រធាន គ.ជ.ប.ជ ធ្លាប់បានប្រកាសអំពីការប្តេជ្ញាចិត្តយ៉ាងមុតមាំ ក្នុងការប្រយុទ្ធប្រឆាំងអំពើជួញដូរមនុស្ស និងចាត់ទុកថា ការប្រយុទ្ធប្រឆាំងអំពើជួញដូរមនុស្ស គឺជាអាទិភាពមួយរបស់រាជរដ្ឋាភិបាលនីតិកាលទី៧ ដើម្បីលើកកម្ពស់សន្តិសុខ សុវត្ថិភាពមនុស្សជាតិនិងលើកកម្ពស់សក្តានុពលនៃធនធានមនុស្សសម្រាប់ការអភិវឌ្ឍជាតិលើគ្រប់វិស័យ។
លោកក៏បានអំពាវនាវដល់អភិបាលរាជធានី-ខេត្ត រហូតដល់កងកម្លាំងឈរជើងតាមខ្សែបន្ទាត់ព្រំដែនត្រូវពង្រឹងស្មារតីទទួលខុសត្រូវក្នុងតួនាទី និងភារកិច្ចដែលរាជរដ្ឋាភិបាលប្រគល់ជូនឱ្យបានហ្មត់ចត់បំផុតពាក់ព័ន្ធការជួញដូរមនុស្ស។
យោងតាមរបាយការណ៍ក្រសួងមហាផ្ទៃនៅក្នុងរយៈពេល ១ ឆ្នាំកន្លងទៅនេះ សមត្ថកិច្ចបានធ្វើការអន្តរាគមន៍ស្រាវជ្រាវរុករកបទល្មើសបានចំនួន ១២១៣ ករណី គឺស្មើនឹង ៩៧,៧% ក្នុងនោះ ករណីបង្ខំធ្វើការដោយខុសច្បាប់មានចំនួន ២៥៩ នាក់ ស្រី ៤៨ នាក់ មាន ៧ សញ្ជាតិ ដែលបានសន្និដ្ឋានថា ជាករណីជួញដូរមនុស្ស៕