បន្ទាយមានជ័យ ៖ ពលករខ្មែរដែលធ្វើការខុសច្បាប់នៅប្រទេសថៃដែលចាប់បញ្ជូនតាមច្រកទ្វារអន្តរជាតិប៉ោយប៉ែតនៅខែមករា ឆ្នាំ ២០២៤ មានប្រមាណជិត៦០០នាក់ នៅក្រុងប៉ោយប៉ែត ។ លោក វ៉ាន់ ដារ៉ាន់ ប្រធានស្នាក់ការត្រួតពិនិត្យច្រកទ្វារអន្តរជាតិប៉ោយប៉ែតបានប្រាប់ថា ៖ អាជ្ញាធរមានសមត្ថកិច្ចថៃបានចាប់បញ្ជូនពលករខ្មែរដែលធ្វើការដោយខុសច្បាប់ នៅប្រទេសថៃបញ្ជូនតាមច្រកទ្វារអន្តរជាតិប៉ោយប៉ែត ខេត្តបន្ទាយមានជ័យ ដែលអាជ្ញាធរកម្ពុជាទទួលនៅអំឡុងខែមករា ឆ្នាំ២០២៤ មានចំនួន៥៨៦នាក់ ក្នុងនោះមានស្រី២០០នាក់ និងមានកុមារចំនួន៣៨នាក់ ។ លោកបានបញ្ជាក់ថា៖នៅពេលដែលអាជ្ញាធរកម្ពុជាទទួលពលករខ្មែរដែលត្រូវបានអាជ្ញាធរមានសមត្ថកិច្ចចាប់បញ្ជូនតាមច្រកទ្វារអន្តរជាតិប៉ោយប៉ែតបានសាកសួរព័ត៌មានបានប្រាប់ថា ពួកគាត់ដែលត្រូវបានសមត្តកិច្ចថៃចាប់បញ្ជូន គឺស្នាក់នៅធ្វើការនៅប្រទេសថៃដោយខុសច្បាប់ ជាជនអន្តោប្រវេសន៍ដែលលួចលាក់ធ្វើការដែលពួកគាត់បានទៅរកការងារធ្វើនៅប្រទេសថៃ តាមរយៈមេខ្យល់នាំទៅរកការងារធ្វើដោយខុសច្បាប់ទើបសមត្ថកិច្ចថៃចាប់បញ្ជូនមកវិញ តាមច្រកទ្វារអន្តរជាតិប៉ោយប៉ែតនេះ ។ លោក វ៉ាន់ ដារ៉ាន់ បានបញ្ជាក់ថា៖ក្រោយអាជ្ញាធរកម្ពុជាទទួលពលករខ្មែរដែលភាគីថៃចាប់បញ្ជូនប្រគល់ជូនបានធ្វើការណែនាំអោយបញ្ឈប់សកម្មភាពទៅធ្វើការដោយខុសច្បាប់ តាមរយៈមេខ្យល់ដែលនាំឆ្លងដោយខុសច្បាប់ទៀត ព្រោះវាប្រឈមគ្រោះថ្នាក់ ហើយនៅពេលលួចលាក់ធ្វើការត្រូវសមត្ថកិច្ចថៃចាប់បញ្ជូនខាតទាំងពេលវេលានិងលុយកាក់ទៀត ត្រូវទៅធ្វើការតាមរយៈក្រុមហ៊ុនដោយស្របច្បាប់ ៕
website_news:20240206_02
website_news/20240206_02.txt · Last modified: 2024/02/08 15:43 by kun keorasmey