ថៃគ្រោងបន្ធូរបន្ថយច្បាប់ បើកឲ្យជនបរទេស អាចទទួលបានសេវាកម្មពពោះជំនួស
អាជ្ញាធរសុខាភិបាលថៃ បានបញ្ជាក់ឲ្យដឹង នៅថ្ងៃសុក្រទី១មីនាថា រដ្ឋាភិបាលថៃមានគម្រោង បន្ធូរបន្ថយច្បាប់ ស្តីពីសេវាកម្មពពោះជំនួស ដើម្បីបើកឲ្យប្តីប្រពន្ធជនជាតិបរទេស អាចទទួលបានសេវកម្មនេះ នៅក្នុងប្រទេសថៃ។ សូមរំលឹកថា សេវាកម្មនេះ ត្រូវបានអាជ្ញាធរថៃចេញវិធានការហាមឃាត់ យ៉ាងតឹងតែង កាលពីឆ្នាំ២០១៥ បន្ទាប់ពីមានរឿងអាស្រូវផ្ទួនៗគ្នា។
លោក អារខុម ប្រាទិតសុវណ្ណ អគ្គនាយករងការិយាល័យសម្របសម្រួលសេវាសុខភាពថៃ បានប្រាប់ទីភ្នាក់ងារព័ត៌មាន Reuters ថា រដ្ឋាភិបាលថៃបានសម្រេច កែប្រែច្បាប់ ដើម្បីអនុញ្ញាតឲ្យប្តីប្រពន្ធ ឬដៃគូសហព័ទ្ធជនជាតិបរទេស អាចទទួលបានសេវាកម្មពពោះជំនួស។
លោកបានបន្ថែមថា អ្នកដែលអាចទទួលសេវាកម្មនេះបាន គឺត្រូវរៀបអាពាហ៍ពិពាហ៍តាមច្បាប់ត្រឹមត្រូវ ទោះបីជាប្តីប្រពន្ធភេទប្រុសនិងស្រី ឬមួយជាដៃគូសហព័ទ្ធដែលមានភេទដូចគ្នាក៏ដោយ។ លក្ខខណ្ឌមួយទៀត គឺទារកដែលកើតមក ដោយការពពោះជំនួសក្នុងប្រទេសថៃ គឺត្រូវតែទទួលបានការគាំព៌ា និងការទទួលស្គាល់តាមផ្លូវច្បាប់ ពីអាជ្ញាធររបស់ប្រទេសដើម នៃអាណាព្យាបាលជាជនបរទេសនោះ។ ប្តីប្រពន្ធ ឬដៃគូសហព័ទ្ធបរទេស អាចនាំយកស្ត្រីជាអ្នកពពោះ ពីប្រទេសក្រៅមកកាន់ប្រទេសថៃក៏បាន ឬក៏អាចរកស្ត្រីពពោះជនជាតិថៃក៏បាន បន្ទាប់ពីបានទទួលបាននូវការអនុញ្ញាត ចេញដោយគណៈកម្មាធិការមួយរបស់រដ្ឋាភិបាលថៃ។
ផ្អែកតាមមន្ត្រីថៃខាងលើ ការធ្វើអត្ថបទច្បាប់ថ្មីនេះ នឹងត្រូវបញ្ជូនទៅកាន់គណរដ្ឋមន្ត្រីថៃប្រជុំអនុម័ត នៅក្នុងខែមីនានេះ មុននឹងបញ្ជូនបន្ត ទៅកាន់សភា និងព្រឹទ្ធសភា។ គួរបញ្ជាក់ដែរថា នេះជាការធ្វើកំណែទម្រង់ ស្ថិតនៅក្នុងក្របខណ្ឌទូទៅមួយ ដែលរដ្ឋាភិបាលថៃកំពុងតែធ្វើ ដើម្បីបើកទូលាយឲ្យប្តីប្រពន្ធជនជាតិថៃ ទាំងអ្នកដែលមានភេទដូចគ្នា អាចទទួលបានសេវាសុខាភិបាល ពពោះជំនួស។ វិធានការកំណែទម្រង់នេះ ក៏នឹងចូលរួមផងដេរ ដល់វិស័យទេសចរណ៍សុខាភិបាលរបស់ថៃ។
គួររំលឹកថា កាលពីឆ្នាំ២០១៥ រដ្ឋាភិបាលថៃ បានធ្វើច្បាប់រឹតបន្តឹងយ៉ាងខ្លាំង ដោយអនុញ្ញាតការទទួលបានសេវាពពោះជំនួស ចំពោះតែប្តីប្រពន្ធជនជាតិថៃ ឬក៏ជនជាតិថៃដែលបានរៀបការជាមួយជនបរទេស ចាប់ពី៣ឆ្នាំឡើងទៅ។ ការរឹតបន្តឹងច្បាប់នេះ ត្រូវបានធ្វើបន្ទាប់ពីមានផ្ទុះរឿងអាស្រូវផ្ទួនៗគ្នា។ រឿងអាស្រូវដែលគេដាក់ងារហៅថា “ស្បូនសម្រាប់ជួល” នេះ ត្រូវបានបណ្តាញព័ត៌មានថៃ និងបរទេសមួយចំនួន បានផ្សព្វផ្សាយព្រោងព្រាត ចាត់ទុកថៃ ប្រៀបបីដូចជាដែនដី នៃរោងចក្រផលិតទារកឲ្យជនបរទេស ជាឧស្សាហកម្មដ៏អាទិ៍កំបាំង គ្មានតម្លាភាព និងពុករលួយ៕
ស្ត្រីស៊ីឈ្នួលពពោះជំនួស ឈ្មោះ Pattaramon Chanbua អាយុ២១ឆ្នាំ ថតជាមួយកូនស្រី នៅមន្ទីរពេទ្យខេត្តឈុនប៊ុរី ថ្ងៃទី ៣សីហា២០១៤។ ប្តីប្រពន្ធជនជាតិអូស្ត្រាលី បានបោះបង់ចោលទារក បន្ទាប់ដឹងថាទារកកើតមក មានជំងឺភឿក។ AP - Apichart Weerawong