ពលរដ្ឋមួយចំនួននៅឧត្ដរមានជ័យប្រថុយជីវិតចូលកាប់ឈើនៅប្រទេសថៃដើម្បីជីវភាពគ្រួសារ
ពលរដ្ឋមួយចំនួនរស់នៅខេត្តឧត្ដរមានជ័យ បន្តនាំគ្នាចូលកាប់ឈើប្រណិតនៅក្នុងប្រទេសថៃទាំងប្រថុយបាត់បង់ជីវិត និងខុសច្បាប់ ដោយសារតែជីវភាពគ្រួសារ ។ អាជ្ញាធរមូលដ្ឋានទទួលស្គាល់ថា ពិតជាមានពលរដ្ឋខ្មែរលួចចូលទៅកាប់ឈើនៅប្រទេសថៃមែន។
ប្រជាពលរដ្ឋមួយចំនួនរស់នៅស្រុកអន្លង់វែង ខេត្តឧត្ដរមានជ័យ បន្តនាំគ្នាលួចចូលទៅកាប់ឈើប្រណិតនៅប្រទេសថៃ ទាំងប្រថុយបាត់បង់អាយុជីវិត ដោយសារតែជីវភាពគ្រួសាររបស់ពួកគេជួបការលំបាក និងខ្វះខាតប្រាក់សងបំណុលធនាគារ។ ពួកគេថា នៅបីខែចុងក្រោយនេះ មានប្រជាពលរដ្ឋចំនួន ២នាក់បានបាត់បង់ជីវិត ដោយសារតែចូលទៅកាប់ឈើត្រូវទាហានការពារព្រំដែនថៃបាញ់រះចំលើ។
មានវ័យ៦០ឆ្នាំ រស់នៅភូមិសន្តិភាព ឃុំត្រពាំងប្រីយ៍ ស្រុកអន្លង់វែង លោកស្រី តាំង ហេង រៀបរាប់ប្រាប់វិទ្យុអាស៊ីសេរី នៅថ្ងៃទី៤ ខែមីនា ថា ពលរដ្ឋមួយចំនួនបាននាំគ្នាចូលទៅកាប់ឈើនៅប្រទេសថៃ ក្នុងនោះកូនរបស់លោកស្រីក៏បានចូលទៅកាប់ឈើនៅប្រទេសថៃ និងមានគ្នាចំនួន ៥នាក់ទៀត ប៉ុន្តែពួកគេមិនទាន់បានកាប់ឈើនោះទេ ក៏ត្រូវបានទាហានការពារព្រំដែនថៃបាញ់កាំភ្លើងរះចំ បណ្ដាលឲ្យកូនរបស់លោកស្រីម្នាក់បាត់បង់ជីវិត ។ លោកស្រីបន្ថែមថា ដោយសារជីវភាពគ្រួសារក្រីក្រទើបសម្រេចឲ្យកូនរកស៊ីរបរនេះ បើទោះបីដឹងថា ទង្វើនេះខុសច្បាប់យ៉ាងណាក្ដី។
លោកស្រី តាំង ហេង៖ «បើវាស្លាប់ទៅហើយទឹកដីគេផងយើងទៅខុសច្បាប់ផង យើងធ្វើម៉េច កុំមាត់ទៅវាខុសទាំងគ្នាការពារអ៊ីចឹង ទោះបីអ្នកទិញឈើទោះបីអ្នកលក់ឈើយើងកុំឲ្យមាន បើស្លាប់ហើយក៏ស្លាប់ទៅ»។
ស្រដៀងគ្នានេះដែរ បុរសម្នាក់ដែលបានចូលទៅកាប់ឈើនៅប្រទេសថៃ ថ្លែងសុំមិនបញ្ចេញឈ្មោះនិងសំឡេង បានឲ្យដឹងថា ពួកគេត្រូវចំណាយពេល៣ទៅ៤ថ្ងៃ ដើម្បីធ្វើដំណើរថ្មើរជើងចូលទៅកាប់ឈើនៅខាងដីថៃ និងត្រូវស្ពាយឈើយកមកលក់ឲ្យឈ្មួញនៅកម្ពុជាវិញ ដោយក្នុងមួយគីឡូលក់បានចាប់ពី៩ពាន់រៀលឡើងទៅ។ លោកបន្ថែមថា នៅមុនពេលចូលទៅ គឺសមត្ថកិច្ចការពារព្រំដែនកម្ពុជា ជាអ្នកផ្ដល់ដំណឹងអំពីការចុះល្បាតព្រំដែនរបស់សមត្ថកិច្ចថៃ ដើម្បីងាយស្រួលក្នុងការចូលទៅកាប់ឈើទាំងនោះ។
ពលរដ្ឋដដែលឱ្យដឹងថា ពីមុនលោកធ្លាប់ធ្វើការជាជាងសំណង់ ប៉ុន្តែត្រូវថៅកែបោកប្រាស់ មិនបើកប្រាក់ខែឲ្យ ទើបលោកទៅកាប់ឈើទាំងខុសច្បាប់បែបនេះ។
ជុំវិញករណីពលរដ្ឋឆ្លងចូលប្រទេសថៃដោយមានការជូនដំណឹងពីសមត្ថកិច្ចកម្ពុជានេះ វិទ្យុអាស៊ីសេរីមិនអាចទាក់ទង អភិបាលខេត្តឧត្ដរមានជ័យ លោក ប៉ែន កុសល្យ បានទេ នៅថ្ងៃទី៤ខែមីនា ដោយទូរស័ព្ទចូលគ្មានអ្នកទទួល។
ចំណែកមេភូមិសន្តិភាព លោក យិន ដាច់ មានប្រសាសន៍ថា អាជ្ញាធរភូមិឃុំបានណែនាំប្រជាពលរដ្ឋនៅក្នុងឃុំ មិនឲ្យចូលទៅកាប់ឈើនៅក្នុងទឹកដីថៃនោះទេ ប៉ុន្តែមួយរយៈចុងក្រោយនេះ ពលរដ្ឋនាំគ្នាសម្រុកចូលទៅកាប់ឈើនៅប្រទេសថៃម្ដងទៀត និងមានការចាប់ខ្លួនជាបន្តបន្ទាប់ ។ លោកបន្ថែមថា អាជ្ញាធរកំពុងធ្វើការទាក់ទងទៅអាជ្ញាធរថៃដើម្បីសួរនាំរឿងនេះ ប៉ុន្តែមិនទាន់បានដំណឹងនោះទេ រហូតមកដល់ពេលនេះ។
លោក យិន ដាច់៖ «គាត់ទៅរកឈើមិនដឹងថា ថៃគាត់បាញ់តែម្ដងស្លាប់ ឬក៏រស់នោះទេ ក៏បាត់ត្រឹមនេះតែម្ដងទៅឲ្យគេទាក់ទងតាមទាហាន និងទាហានឲ្យគេកំពុងស្រាវជ្រាវបើឃើញហើយសុំឲ្យដំណឹងប៉ុន្តែខ្លះដំណឹងស្លាប់ហើយអ្នកខ្លះមិនទាន់ស្លាប់ទេ»។
ទាក់ទិននឹងរឿងនេះ សកម្មជនចលនាមាតាធម្មជាតិ លោក លី ចាន់ដារ៉ាវុត ឲ្យដឹងថា លោកមានការសោកស្ដាយ នៅពេលដែលមានករណីទាំងនេះកើតឡើងមកលើពលរដ្ឋកម្ពុជា។ លោកអំពាវនាវឲ្យពលរដ្ឋនៅតាមព្រំដែនកម្ពុជា-ថៃ បញ្ឈប់ប្រកបរបរមួយនេះ និងស្វែងរកមធ្យោបាយផ្សេងទៀតដើម្បីផ្គត់ផ្គង់ជីវភាពគ្រួសារ ហើយអាជ្ញាធរកម្ពុជាត្រូវតែរកយុត្តិធម៌ឲ្យពលរដ្ឋកម្ពុជា ពីព្រោះពួកគាត់ធ្វើទង្វើទាំងនេះក៏ដោយសារជីវភាពគ្រួសារខ្វះខាតនិងមិនអាចបាញ់សម្លាប់បែបនេះនោះទេ។
លោក លី ចាន់ដារ៉ាវុត៖ «ទោះបីជាយ៉ាងណាអាជ្ញាធរមូលដ្ឋានគួរណាស់តែជួយរកយុត្តិធម៌ប្រជាជនខ្មែរ ទោះបីជាប្រជាជនខ្មែរយើងទៅកាប់ឈើទឹកដី គេវាខុសមែន ប៉ុន្តែយ៉ាងហោចណាស់ក៏មិនមានទោសដល់ស្លាប់ ឬក៏មានទោសយ៉ាងណាក៏គាត់មានសិទ្ធិការពារខ្លួនដែរ ការបាញ់សម្លាប់នៅនឹងកន្លែងវាហាក់បីដូចជាអយុត្តិធម៌សម្រាប់ប្រជាជនខ្មែរយើងដែរ»។
សកម្មជនបរិស្ថាន ទទូចឲ្យរដ្ឋាភិបាល ត្រូវបង្កើតការងារនៅក្នុងស្រុក ដើម្បីឲ្យពលរដ្ឋមានចំណូល ដោះស្រាយបញ្ហាជីវភាពគ្រួសារ ពីព្រោះបច្ចុប្បន្នពលរដ្ឋកំពុងជួបវិបត្តិសេដ្ឋកិច្ច និងមិនមានការងារធ្វើគ្រប់គ្រាន់ ។ លើសពីនោះ អាជ្ញាធរតាមព្រំដែនកម្ពុជា-ថៃត្រូវតែព្យាយាមទប់ស្កាត់និងការពារពលរដ្ឋដែលរងគ្រោះ៕