The Jakarta Globe៖ ពលរដ្ឋឥណ្ឌូណេស៊ីចំនួន ៦០% រស់នៅកម្ពុជាកំពុងធ្វើការក្នុងល្បែងអនឡាញ
ក្រសួងការបរទេសឥណ្ឌូនេស៊ីទទួលស្គាល់ពីការកើនឡើងចំនួនពលរដ្ឋឥណ្ឌូនេស៊ី ដែលចូលរួមបង្កបញ្ហាល្បែងអនឡាញនៅកម្ពុជា។ នេះបើតាមការចុះផ្សាយរបស់សារព័ត៌មាន The Jakarta Globe ចុះថ្ងៃទី៦មីនា ឆ្នាំ២០២៤ ដោយដកស្រង់របាយការណ៍ពីស្ថានទូតឥណ្ឌូនេស៊ីប្រចាំកម្ពុជា។ តាម The Jakarta Globe ពលរដ្ឋឥណ្ឌូនេស៊ីដែលមានវត្តមាននៅកម្ពុជាប្រមាណ៦០% កំពុងធ្វើការល្បែងអនឡាញ។ ក្រសួងការបរទេសឥណ្ឌូនេស៊ីបានទទួលស្គាល់ពីនិន្នាការកើនឡើងនៃពលរដ្ឋឥណ្ឌូនេស៊ី ដែលចូលរួមបង្កបញ្ហាល្បែងអនឡាញនៅកម្ពុជា។ បើតាមការចុះផ្សាយរបស់សារព័ត៌មាន The Jakarta Globe ថ្ងៃទី៦មីនា ស្ថានទូតឥណ្ឌូនេស៊ីប្រចាំនៅកម្ពុជាបញ្ជាក់ថា ពលរដ្ឋឥណ្ឌូនេស៊ីដែលមានវត្តមាននៅកម្ពុជាប្រមាណ៦០% កំពុងធ្វើការងារក្នុងឧស្សាហកម្មល្បែងអនឡាញ។ ការបញ្ជាក់របស់ស្ថានទូតឥណ្ឌូនេស៊ីប្រចាំនៅកម្ពុជាក្នុង The Jakarta Globe នេះ គឺដោយយោងតាមរបាយការណ៍ ដែលផ្តល់ដោយមន្ត្រីជាន់ខ្ពស់ផ្នែកគាំពារពលរដ្ឋឥណ្ឌូនេស៊ី និងជំនួយផ្នែកច្បាប់របស់ក្រសួងការបរទេសឥណ្ឌូនេស៊ី។ របាយការណ៍នោះបានបង្ហាញទិន្នន័យស្តីពីចំនួនពលរដ្ឋឥណ្ឌូនេស៊ីនៅកម្ពុជា ដែលខុសគ្នាដាច់ស្រឡះពីទិន្នន័យដែលមានក្នុងរបាយការណ៍របស់អាជ្ញាធរកម្ពុជា។ តាមរបាយការណ៍របស់ស្ថានទូតឥណ្ឌូនេស៊ីនៅកម្ពុជា បច្ចុប្បន្ននេះពលរដ្ឋឥណ្ឌូនេស៊ីកំពុងស្នាក់នៅប្រទេសកម្ពុជាមានចំនួនជាង ១៧០០០នាក់។ ផ្ទុយទៅវិញ របាយការណ៍របស់អាជ្ញាធរកម្ពុជា គឺមានដល់ទៅជាង៧៣០០០នាក់ ដែលជាតួលេខខុសគ្នាជិត៧ដងឯណោះ។ ក្នុង The Jakarta Globe ដដែល ក្រសួងការបរទេសឥណ្ឌូនេស៊ីចាត់ទុកថា ពលរដ្ឋខ្លួនភាគច្រើនដែលគ្មានក្នុងរបាយការណ៍នេះ គឺពាក់ព័ន្ធទៅនឹងអាជីវកម្មល្បែងអនឡាញនៅកម្ពុជា។ ប៉ុន្តែឯកអគ្គរដ្ឋទូតឥណ្ឌូនេស៊ី លោក Santo Darmosumarto ធ្លាប់ទទួលស្គាល់ថា ប៉ុន្មានឆ្នាំចុងក្រោយនេះពលរដ្ឋឥណ្ឌូនេស៊ីកាន់តែច្រើនបានចូលមកធ្វើអាជីវកម្មនៅកម្ពុជា ដែលជាអាជីវកម្មទាក់ទងនឹងល្បែងនៅតាមភោជនីយដ្ឋាន ហាងបោកអ៊ុត ហាងកែសម្ផស្ស និងហាងលក់ទូរស័ព្ទដៃជាដើម។ តែឯកអគ្គរដ្ឋទូតឥណ្ឌូនេស៊ីក៏មិនភ្លេចបញ្ជាក់ថា ពលរដ្ឋឥណ្ឌូនេស៊ីទាំងនោះភាគច្រើន មិនពាក់ព័ន្ធនឹងបទល្មើសជួញដូរមនុស្សទេ។ ឯកអគ្គរដ្ឋទូតឥណ្ឌូនេស៊ីប្រចាំកម្ពុជាអះអាងថាឥណ្ឌូនេស៊ីកំពុងពិភាក្សានិងចូលរួមដោះស្រាយបញ្ហាល្បែងអនឡាញនៅកម្ពុជា ព្រោះវាក៏ជាកង្វល់សម្រាប់ឥណ្ឌូនេស៊ីដែរ។ ក្រសួងមហាផ្ទៃកម្ពុជា តាមរយៈអ្នកនាំពាក្យ លោក ទូច សុខៈ បានអះអាងប្រាប់វិទ្យុបារាំងអន្តរជាតិនៅថ្ងៃទី៧មីនានេះថានឹងពិនិត្យការចុះផ្សាយរបស់ The Jakarta Globe នេះតាមទិដ្ឋភាពជាក់ស្តែង និងតាមច្បាប់របស់កម្ពុជា។ តាមលោក ទូច សុខៈ គិតចាប់តាំងពីដើមឆ្នាំ២០២៤នេះ ក្រសួងមហាផ្ទៃបង្ក្រាបបានករណីល្បែងអនឡាញខុសច្បាប់គ្រប់ប្រភេទជាង ៣០០ទីតាំង ក្នុងនោះល្បែងអនឡាញចំនួន១ទីតាំង ឃាត់ខ្លួនមនុស្ស៦នាក់ និងល្បែងភ្នាល់ផ្សេងៗតាមអ៊ីនធឺណែត១២ទីតាំង ឃាត់ខ្លួនមនុស្ស៣៦នាក់។ ក៏ប៉ុន្តែលោក ទូច សុខៈ មិនបានគូសបញ្ជាក់អំពីសញ្ជាត្តិនិងជនជាតិបាននៅឡើយទេ៕