ទៅធ្វើការរោងចក្រកាត់ដេរនៅភ្នំពេញចាញ់បោកមេខ្យល់នាំទៅលក់ដល់ប្រទេសចិន ដង្ហើយហៅឲ្យសមត្ថកិច្ចជួយសង្គ្រោះ
ខេត្តត្បូងឃ្មុំ៖ កម្មការិនីម្នាក់ឈ្មោះ រុំ ភីផា អាយុ១៦ឆ្នាំ រស់នៅភូមិខ្សាច់ប្រឆេះក្រោម ឃុំក្រូចឆ្មារ ស្រុកក្រូចឆ្មារ បានទៅធ្វើជាកម្មការិនីនៅរោងចក្រមួយកន្លែង ក្នុងរាជធានីភ្នំពេញ និងឧស្សាហ៍ទាក់ទងមកសាច់ញាតិជាញឹកញាប់ តែចុងក្រោយនេះរយៈពេលប៉ុន្មានកន្លះឆ្នាំបាត់ការទាក់ទង លុះពេលដឹងដំណឹងស្រាប់តែត្រូវចាញ់បោកមេខ្យល់គេនាំទៅលក់នៅឯប្រទេសចិន និងកំពុងដង្ហើយហៅឲ្យជួយសង្គ្រោះតាមបណ្ដាញសង្គម ។ ជាមួយគ្នានោះ ថ្នាក់ដឹកនាំខេត្តក៏ដូចជា កម្លាំងសមត្ថកិច្ចបានយកចិត្តទុកដាក់ជួយអន្តរាគមន៍ជាបន្ទាន់ ដើម្បីធ្វើយ៉ាងណានាំកម្មការិនីរូបនេះត្រឡប់មកមាតុភូមិវិញ ។ សមត្ថកិច្ចមូលដ្ឋានប្រាប់ឲ្យដឹងនៅព្រឹក ថ្ងៃទី១១ ខែមិនា ឆ្នាំ២០២៤ថា ឈ្មោះ ភីផា បានចាកចេញពីស្រុកកំណើតទៅធ្វើជាកម្មការិនីរោងចក្រ កាត់ដេរសំលៀកបំពាក់នៅរាជធានីភ្នំពេញ ដើម្បីបានថវិកាខ្លះសម្រាប់ផ្គត់ផ្គង់ជីវភាពគ្រួសារ ។ ជាមួយនោះក្នុងមួយខែៗគឺអ្នកផ្ទះហ្នឹងកម្មការិនីរូបនេះឧស្សាហ៍ទាក់ទងគ្នាតាមទូរស័ព្ទជាញឹកញាប់ទៀតផង ។ លុះក្រោយមក មិនដឹងជាមូលហេតុយ៉ាងម៉េចនោះទេ បានជាដាច់ការទាក់ទង ហើយភាគីឪពុកម្ដាយរបស់អ្នករងគ្រោះរូបនេះក៏មិនបានប្ដឹងមកសមត្ថកិច្ចមូលដ្ឋាន ដើម្បីឲ្យជួយស្រាវជ្រាវផងដែរ ។ រហូតមក ក៏មានបណ្ដាញសង្គមគេបានផ្សព្វផ្សាយដោយកម្មការិនីឈ្មោះ ភីផា បានលើកម្រាមដៃដបសំពះសុំឱ្យសមត្ថកិច្ចជួយរំដោះនាងធ្វើយ៉ាងណាបានត្រឡប់មកស្រុកកំណើតវិញ សព្វថ្ងៃកំពុងតែជាប់ឃុំនៅក្នុងបន្ទប់មួយដោយមិនមានសិទ្ធិសេរីភាពនៅឯប្រទេសចិនឯណោះ ។ សមត្ថកិច្ចមូលដ្ឋានបានបន្តឲ្យដឹងទៀតថា បន្ទាប់ពីឃើញហេតុការណ៍គួរឲ្យសង្វេគហ្នឹងអាណិតដល់ប្អូនស្រីគេឃើញវត្តមានស្ត្រីឈ្មោះ រ៉ុម គន្ធា ត្រូវជាបងស្រីបង្កើតរបស់អ្នករងគ្រោះរបស់ភីផា បានមកដាក់ពាក្យបណ្ដឹងនៅប៉ុស្តិ៍រដ្ឋបាលមូលដ្ឋាន ដើម្បីឲ្យសមត្ថកិច្ចជួយស្រាវជ្រាវធ្វើយ៉ាងណាជួយសង្គ្រោះប្អូនស្រីរបស់គាត់បានវិលត្រឡប់មកស្រុកកំណើតវិញ ។ សូមបញ្ជាក់ថា ក្នុងអំឡុងពេលបាត់ការទាក់ទងរយៈពេលជិតកន្លះឆ្នាំគេមិនបានឃើញភាគីសាច់ញាតិអ្នករងគ្រោះមកដាក់ពាក្យបណ្ដឹងនៅមូលដ្ឋាន ដើម្បីឲ្យជួយអន្តរាគមស្រាវជ្រាវរកប្អូនស្រីដែលបាត់នោះទេ ។ ទាល់តែព័ត៌មានគេផ្សាយតាមបណ្ដាញសង្គមទើបមានការភ្ញាក់ផ្អើល និងបានប្រញាប់ប្រញាល់មកដាក់ពាក្យបណ្ដឹង ។ ក្រោមការយកចិត្តទុកដាក់ពីសំណាក់លោកបណ្ឌិត ជាម ចន្ទសោភ័ណ្ឌអភិបាលខេត្តត្បូងឃ្មុំ ក៏បានចេញសេចក្តីប្រកាសព័ត៌មានជាបន្ទាន់ចុះនៅថ្ងៃទី១០ មីនា ឆ្នាំ២០២៤ ដោយមានខ្លឹមសារដូចខាងក្រោម ៖ កាលពីថ្ងៃ ទី៩ ខែមីនា ឆ្នាំ២០២៤ ថ្មីៗនេះ មានគណនេយ្យអាខោន facebook ឈ្មោះនាង ធីតា បានបង្ហោះវីដេអូឃ្លីបភ្ជាប់ជាមួយគេហទំព័រគណនេយ្យអាខោន facebook លីណា ដែលមានខ្លឹមសារថា ជម្រាបសួរពុកម៉ែបងប្អូនទាំងអស់គ្នាខ្ញុំមានឈ្មោះ ភីផា អាយុ១៦ឆ្នាំ ហើយជាអ្នកខេត្តត្បូងឃ្មុំ អ្នកស្រុកក្រូចឆ្មារ អ្នកភូមិខ្សាច់ប្រឆេះក្រោម ឥឡូវហ្នឹងខ្ញុំបានចាញ់បោកគេហើយ មេខ្យល់យកខ្ញុំមកលក់នៅឯប្រទេសចិនគេថា យកខ្ញុំមកធ្វើការ ប៉ុន្តែគេយកខ្ញុំមកលក់ ហើយគេយកខ្ញុំមកយកប្ដីចិន គេចាប់ខ្ញុំឃុំ៦ខែហើយ គេចាក់សោរ អញ្ចឹងខ្ញុំមានតែម្រាមដៃ១០សំពះសូមជំនួយសម្ដេចយាយសម្ដេចតាសម្ដេចហ៊ុនសែនជួយដល់កូនចៅទៅវិញផង….។ នៅក្នុងខ្លឹមសាររបស់រដ្ឋបាលខេត្តត្បូងឃ្មុំបានបន្តថា ក្រោយពីទទួលបានព័ត៌មានខាងលើ រដ្ឋបាលខេត្តត្បូងឃ្មុំមិនបង្អង់នឹងបានចាត់ស្នងការនគរបាលខេត្តសហការជាមួយអាជ្ញាធរពាក់ព័ន្ធ ដើម្បីធ្វើការត្រួតពិនិត្យស្រាវជ្រាវជាបន្ទាន់ភ្លាមៗ និងជួបឈ្មោះរុំគន្ធា ភេទស្រី អាយុ៣១ឆ្នាំ ដែលត្រូវជាបងស្រីបង្កើតរបស់ជនរងគ្រោះឈ្មោះ ភីផា បានរៀបរាប់បញ្ជាក់ប្រាប់កម្លាំងនគរបាលជំនាញនៃស្នងការដ្ឋាននគរបាលខេត្តត្បូងឃ្មុំថា ការពីអំឡុងដើមឆ្នាំ២០២៣ ប្អូនស្រីរបស់គាត់ដែលមានឈ្មោះ ភីផា ភេទស្រី កើតថ្ងៃ២២ ខែវិច្ឆិកា ឆ្នាំ២០០៥ មានទីលំនៅបច្ចុប្បនធំខ្សាច់ប្រឆេះក្រោម ឃុំក្រូចឆ្មារ ស្រុកក្រូចឆ្មារ ខេត្តត្បូងឃ្មុំ ពិតប្រាកដមែន គឺបានចេញពីផ្ទះទៅរាជធានីភ្នំពេញ ដើម្បីធ្វើការរោងចក្រកាត់ដេរ និងតែងតែផ្ញើប្រាក់ខែមកឧបត្ថម្ភដល់គ្រួសារជាប្រចាំខែលុះ៥-៦ខែចុងក្រោយមក ស្រាប់តែបាត់មិនឃើញ និងទាក់ទងលែងបានតែម្ដង…។ ចុងក្រោយរដ្ឋបាលខេត្តត្បូងឃ្មុំបានកំពុងទំនាក់ទំនងជាមួយអាជ្ញាធរមានសមត្ថកិច្ចគ្រប់លំដាប់ថ្នាក់សហការជាមួយនាយកដ្ឋានប្រឆាំងការជួញដូរមនុស្ស និងការពារអនីតិថិជននៃក្រសួងមហាផ្ទៃ និងក្រសួងការបរទេស និងសហប្រតិបត្តិការអន្តរជាតិ ដើម្បីផ្ដល់ព័ត៌មានដល់ស្ថានទូតសាធារណរដ្ឋប្រជាមានិតចិនប្រចាំនៅប្រទេសកម្ពុជាធ្វើការស្រាវជ្រាវ និងជួយសង្គ្រោះក្មេងស្រីរងគ្រោះឲ្យបានត្រឡប់មកប្រទេសកំណើតវិញ ។ ព្រមទាំងស្វែងរកមេខ្យល់ ដើម្បីយកមកផ្ដន្ទាទោសតាមច្បាប់ជាធរមាន ។ សូមបញ្ជាក់ថា តាមរយៈស្ថានទូតចិន ប្រចាំនៅប្រទេសកម្ពុជា ឥឡូវក្មេងស្រីដែលចាញ់បោកមេខ្យល់នោះត្រូវគេសង្គ្រោះបានហើយ ត្រៀមនឹងវិលត្រឡប់មកកម្ពុជាវិញ ៕