កម្មករខ្មែរជួបគ្រោះថ្នាក់ដោយដងស្ទូចបាក់ធ្លាក់បាវស៊ីម៉ងត៍សង្កត់លើ
កម្មករខ្មែរអាយុ២៨ឆ្នាំម្នាក់ ត្រូវបានបាវស៊ីម៉ងត៍សង្កត់លើ កាលពីវេលាម៉ោងប្រហែល១០ព្រឹកថ្ងៃនេះនៅការដ្ឋានសំណង់ខុនដូមួយក្នុងខេត្តណុនថាបុរី (Nonthaburi) ។
លុះមកដល់ចំណុចកើតហេតុ ស្រុកសាយណយ (Sai Noi) ក្រុមជួយសង្គ្រោះបានឃើញ ជនរងគ្រោះឈ្មោះ ចែម ប៊ុនហាន ជាកម្មករខ្មែរ ដេកស្តូកស្តឹងនៅលើដី ហើយបានដាច់ខ្យល់ ដោយរងរបួសត្រង់ក និងដើមទ្រូង។ ការស៊ើបអង្កេតបឋមបង្ហាញពីការរងរបួសធ្ងន់ធ្ងរជុំវិញការស្លាប់របស់នាង។ យោងតាមសេចក្តីជូនដំណឹងដែលផ្តល់ដល់នគរបាលដោយបុគ្គលិកម្នាក់បាននិយាយថា ប៊ុនហាន បានធ្វើការដឹកជញ្ជូនបាវស៊ីម៉ងត៍ ដាក់លើបន្ទះក្តារឈើដែលទុកសម្រាប់លើកទៅជាន់ទី៤ ដោយរថយន្តស្ទូច។ ជាអកុសល ការងារនេះ បានជួបនូវសោកនាដកម្ម ដោយបន្ទះក្តារក្រឡាប់ផ្អៀងបណ្តាលឱ្យបាវស៊ីម៉ងត៍ធ្លាក់មកដីសង្កត់លើ ប៊ុនហាន ស្លាប់មួយរំពេច។ ចំណែកអ្នកបើកបររថយន្តស្ទូច ភេទប្រុស អាយុ៤១ឆ្នាំ ជនជាតិខ្មែរ បានរត់គេចខ្លួនបាត់ ក្រោយកើតហេតុ។
Bangkok Post បានរាយការណ៍ថា ប្តីរបស់ជនរងគ្រោះឈ្មោះ គា ចារើន បានរៀបរាប់ពីសោកនាដកម្មដ៏រន្ធត់នេះ។ គាត់បានធ្វើការជាមួយប្រពន្ធនៅឯការដ្ឋានសំណង់អស់រយៈពេលប្រមាណជាបួនខែ ដោយបានរៀបរាប់ពីរបៀបដែលប៊ុនហានលីស៊ីម៉ងត៍ចំនួនប្រាំបាវដាក់លើបន្ទះក្តារដែលខូច មុនពេលគេស្ទូចឡើង។
ខណៈដែលគាត់កំពុងរង់ចាំទទួលនៅជាន់ទីបួន សោកនាដកម្មបានកើតឡើងដោយបន្ទះក្តារបានបាក់ធ្លាក់បាវស៊ីម៉ងត៍ចុះមកក្រោម ដែលបានឆក់យកជីវិតប្រពន្ធគាត់។
រូបថត Bangkok Post