ពលករខែ្មរនឹងត្រូវទទួលយ៉ាងកក់ក្តៅពីអាជ្ញាធរខ្មែរប្រសិនចង់ត្រឡប់មកចូលឆ្នាំនៅខ្មែរ
ពលករទេសន្តរប្រវេសន៍ខ្មែរក៏ដូចជាឡាវ និងភូមា ដែលកំពុងធ្វើការនៅក្នុងប្រទេសថៃ និងចង់ត្រឡប់ទៅស្រុកក្នុងអំឡុងបុណ្យចូលឆ្នាំប្រពៃណីជាតិ នឹងមិនត្រូវការលិខិតអនុញ្ញាត ដើម្បីត្រលប់ទៅកាន់ប្រទេសថៃវិញទេ។ ជាមួយគ្នានេះ ក្រសួងការងារកម្ពុជា និងផ្នែកពាក់ព័ន្ធក៏កំពុងរៀបចំទទួលពលករខ្មែរទាំងនោះដែលចង់ត្រលប់ចូលកម្ពុជា ដើម្បីចូលរួមបុណ្យចូលឆ្នាំនៅតាមច្រកទ្វារនានាក្នុងខេត្តជាប់ព្រំដែនថៃ។
ក្រុមការងារក្រសួងការងារកម្ពុជា នឹងចុះទៅតាមបណ្តាខេត្តជាប់ព្រំដែនកម្ពុជា-ថៃ និងតាមច្រកទ្វារនានាដើម្បីពិនិត្យមើលស្ថានភាព និងត្រៀមរៀបចំស្វាគមន៍ឲ្យបានល្អបំផុតដល់ពលករខ្មែរ ដែលចេញចូលប្រទេសទាំងពីរ។ នេះបើតាមលោក កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ។
តាមអ្នកនាំពាក្យរូបនេះដដែល ក្រសួងការងារកំពុងសហការជាមួយអគ្គនាយកដ្ឋានអន្តោប្រវេសន៍ក្រសួងមហាផ្ទៃ អាជ្ញាធរដែនដី និងអង្គភាពពាក់ព័ន្ធ ដើម្បីសម្របសម្រួលការចេញចូលរបស់ពលករខ្មែរនៅតាមព្រំដែនក្នុងអំឡុងបុណ្យចូលឆ្នាំខ្មែរខាងមុខ។
ចំណែកការចេញផ្សាយរបស់កាសែតថៃនានាកាលពីចុងសប្តាហ៍មុនបានឲ្យដឹងថា អាជ្ញាធរថៃបានបើកឲ្យពលករខ្មែរក៏ដូចជាពលករឡាវ និងភូមា ដែលគ្រោងត្រលប់ទៅចូលរួមបុណ្យចូលឆ្នាំថ្មីតាមប្រទេសរៀងៗខ្លួន អាចត្រលប់ចូលទៅធ្វើការនៅប្រទេសថៃវិញក្នុងរយៈពេល១ខែកន្លះចាប់ពីថ្ងៃទី០១ ខែមេសា ដល់ថ្ងៃទី១៥ ខែឧសភា ឆ្នាំ២០២៤ ដោយមិនចាំបាច់មានលិខិតអនុញ្ញាត។ កាយវិការអនុគ្រោះរបស់ថៃដូចនេះបានធ្វើឡើងតាមការស្នើសុំរបស់ប្រមុខរដ្ឋាភិបាលកម្ពុជាលោក ហ៊ុន ម៉ាណែត អំឡុងពេលលោកទស្សនកិច្ចនៅថៃកាលពីដើមខែកុម្ភៈកន្លងទៅ។
ទោះជាយ៉ាងណា គេនៅមិនទាន់ដឹងថា នៅក្នុងចំណោមពលករទេសសន្តរប្រវេសន៍ខ្មែរជាង១លាននាក់ដែលកំពុងធ្វើការនៅក្នុងប្រទេសថៃ តើនឹងមានប៉ុន្មាននាក់ ដែលចង់ទៅចូលរួមបុណ្យចូលឆ្នាំប្រពៃណីជាតិនៅក្នុងប្រទេសកំណើតរបស់ខ្លួនទេ។ ចូរកុំភ្លេចថា ការធ្វើដំណើរត្រូវមានការចំណាយថវិកា នោះបើទោះបីជាឆ្នាំនេះមិនត្រូវបានថៃគិតថ្លៃលើលិខិតអនុញ្ញាតចូលក្នុងទឹកដីរបស់គេក៏ដោយ។
សូមបញ្ជាក់ថា ប្រទេសក្នុងតំបន់អាស៊ានចំនួន៤ គឺកម្ពុជា ថៃ ឡាវ និងភូមាត្រូវប្រារព្ធពិធីបុណ្យចូលឆ្នាំថ្មីក្នុងពេលតែមួយដូចគ្នារយៈពេល៣ ឬ ៤ថ្ងៃនៅក្នុងខែមេសា ដូចរៀងរាល់ឆ្នាំ។
ប៉ុន្តែសម្រាប់ឆ្នាំនេះ ថៃបានអូសបន្លាយបុណ្យចូលឆ្នាំរបស់គេរហូតដល់២១ថ្ងៃ ដើម្បីអបអរការដាក់បញ្ចូលជាផ្លូវការនូវសង្ក្រាន្ត(Sangkran) ថៃទៅក្នុងបញ្ជីសម្បត្តិបេតិកភណ្ឌវប្បធម៌អរូបីនៃមនុស្សជាតិរបស់អង្គការយូណេស្កូកាលពីពេលថ្មីៗកន្លងទៅនេះ៕
