ថៃប្រឈមនឹងកំណើនពលករបរទេសខុសច្បាប់ក្នុងវិស័យទេសចរណ៍
ក្រសួងការងារថៃបានសម្តែងការព្រួយបារម្ភចំពោះបញ្ហានៃកំណើនជនបរទេសដែលកំពុងធ្វើការងារដោយខុសច្បាប់ក្នុងវិស័យទេសចរណ៍របស់ប្រទេស។ នេះបើតាមការចុះផ្សាយរបស់កាសែត The Thaiger នាថ្ងៃចន្ទ ទី ២៥ មីនានេះ។
រដ្ឋមន្ត្រីក្រសួងការងារ លោក Phiphat Ratchakitprakarn បានបង្ហើបថា ក្រសួងបាននិងកំពុងតាមដានស្ថានការណ៍យ៉ាងប្រុងប្រយ័ត្ន ហើយបានរាយការណ៍ពីការកើនឡើងជាលំដាប់នៃចំនួនពលករបរទេសខុសច្បាប់។
ចាប់ពីខែតុលា ឆ្នាំ ២០២៣ ដល់ខែកុម្ភៈ ឆ្នាំ ២០២៤ ជនបរទេសជាង ១៣ ៤០០ នាក់ ត្រូវបានរកឃើញថាកំពុងធ្វើការនៅក្នុងប្រទេសថៃ ដោយគ្មានឯកសារស្របច្បាប់ត្រឹមត្រូវនោះទេ។
កំណត់ត្រារបស់ក្រសួង បានគូសបញ្ជាក់ថា និន្នាការកំណើននេះមិនបង្ហាញសញ្ញាថមថយឡើយ ដោយចំនួនពលករបរទេសខុសច្បាប់បានកើនឡើងពីជាង ៣៥ ២០០ នាក់ក្នុងឆ្នាំសារពើពន្ធ ២០២២ ដល់ជាង ៤២ ៥០០ នាក់ក្នុងឆ្នាំសារពើពន្ធ ២០២៣។
លោករដ្ឋមន្រ្តី Phiphat បានលើកឡើងផងដែរថា ពលករខុសច្បាប់បរទេសជាច្រើន បម្រើការក្នុងការងារដែលបម្រុងទុកសម្រាប់ពលរដ្ឋថៃ រួមទាំងតួនាទីដូចជាមគ្គុទ្ទេសក៍ទេសចរណ៍ និងជាងកាត់សក់ជាដើម។
ក្នុងគោលបំណងទប់ស្កាត់ការងារខុសច្បាប់នេះ រដ្ឋាភិបាលថៃបានកាត់ទោសជនបរទេសចំនួន ៥០៥ នាក់ ដែលរកឃើញថា ធ្វើការងារដោយគ្មានការអនុញ្ញាតចាំបាច់។ ភាគច្រើននៃជនល្មើសទាំងនេះ មានប្រភពពីប្រទេសជិតខាងដូចជា មីយ៉ាន់ម៉ា កម្ពុជា និងឡាវ ហើយភាគច្រើនត្រូវបានគេជួលជាបុគ្គលិកលក់ អ្នកលក់ដូរតាមដងផ្លូវ កម្មករសំណង់ និងជាងកាត់សក់ជាដើម។
លើសពីនេះ លោក Phiphat បានបញ្ជាក់ថា ក្រសួងការងារថៃ ក៏កំពុងសហការជាមួយការិយាល័យអន្តោប្រវេសន៍ និងក្រសួងពាណិជ្ជកម្ម ដើម្បីបង្ក្រាបអាជីវកម្មដែលគ្រប់គ្រងដោយជនបរទេសផងដែរ៕