អាជ្ញាធរត្រៀមកម្លាំងការពារសុវត្ថិភាព និងសម្របសម្រួលពលករមកលេងស្រុកក្នុងពិធីបុណ្យចូលឆ្នាំខ្មែរ
អាជ្ញាធរជំនាញពាក់ព័ន្ធត្រៀមកម្លាំងការពារសុវត្ថិភាព និងសម្របសម្រួលនៅតាមខេត្តជាប់ច្រកទ្វារព្រំដែន ដែលពលករខ្មែរនឹងមកលេងស្រុកកំណើតក្នុងឱកាសពិធីបុណ្យចូលឆ្នាំថ្មី ប្រពៃណីខ្មែរ ដែលប្រព្រឹត្តទៅនៅក្នុងខែមេសាខាងមុខ។
ក្នុងកិច្ចប្រជុំស្ដីពី ការសម្របសម្រួលបែបបទលើការពិនិត្យដំណើរចេញ-ចូលជូនពលករខ្មែរ ក្នុងឱកាសបុណ្យចូលឆ្នាំថ្មី ប្រពៃណីខ្មែរ នៅច្រកទ្វារអន្តរជាតិប៉ោយប៉ែត កាលពីថ្ងៃអាទិត្យ លោក សុខ វាសនា អគ្គនាយកអន្តោប្រវេសន៍ នៃក្រសួងមហាផ្ទៃ បញ្ជាក់ថា លំហូរពលករខ្មែរត្រលប់ចូលក្នុងប្រទេស នឹងមានកំណើនខ្ពស់ជាងឆ្នាំមុនៗ ជាពិសេសនៅច្រកទ្វាអន្តរជាតិប៉ោយប៉ែត និងច្រកទ្វាអន្តរជាតិដូង។ លោកបានជំរុញភាគីពាក់ព័ន្ធត្រៀមខ្លួនឱ្យបានរួចរាល់ ដើម្បីធានាសុវត្ថិភាពដល់ពលករខ្មែរទាំងចូល និងត្រឡប់ទៅវិញ ជាពិសេសបង្កលក្ខណៈងាយស្រួលក្នុងការធ្វើដំណើរនៅតាមច្រកទ្វារព្រំដែន។
លោកបន្ថែមថា៖ «អគ្គនាយកដ្ឋានអន្តោប្រវេសន៍ បានចាត់កម្លាំងមន្ត្រីបន្ថែមជាច្រើនរូប និងចាត់ឱ្យក្រុមការងារជំនាញត្រៀមរៀបចំប្រព័ន្ធបចេ្ចកទេសមួយចំនួន ដើម្បីជួយសម្របសម្រួលដល់ពលករខែ្មរដែលវិលត្រលប់ពីប្រទេសថៃចូលមកក្នុងប្រទេសយើងវិញ»។
លោកបន្តថា សម្រាប់កិច្ចប្រជុំពេលនេះ គឺជំរុញមន្រ្តីនៅតាមបណ្ដាច្រកទ្វារអន្តរជាតិដែលជាប់ព្រំដែនកម្ពុជា-ថៃ ត្រៀមលក្ខណៈធានាឱ្យបានការគ្រប់គ្រង និងសម្រួលដល់អ្នកដំណើរជាតិ-អន្តរជាតិ ជាពិសេសជួយសម្របសម្រួលជូនពលករខ្មែរធ្វើដំណើរចេញចូលឱ្យបានស្រួល ឆាប់រហ័ស ប្រកបដោយសន្តិសុខ និងមានសុវត្តិភាព។
លោក កត្តា អ៊ន អ្នកនាំពាក្យក្រសួងការងារ បានឱ្យដឹងថា ក្រសួងការងារ និងបណ្ដុះបណ្ដាលវិជ្ជាជីវៈ បានសហការជាមួយ អគ្គនាយកដ្ឋានអន្តោប្រវេសន៍ ក្រសួងមហាផ្ទៃ អាជ្ញាធរដែនដី និងអង្គភាពពាក់ពន្ធ ដើម្បីត្រៀមសម្របសម្រួលការចេញ-ចូលរបស់ពលករខ្មែរ នៅតាមព្រំដែនក្នុងអំឡុងបុណ្យចូលឆ្នាំខ្មែរនាពេលខាងមុខ។
លោក គង់ សំអុល ប្រធានគណៈកម្មាធិការជាតិរៀបចំបុណ្យជាតិ-អន្តរជាតិ បានឱ្យដឹងថា ពិធីបុណ្យចូលឆ្នាំថ្មី ប្រពៃណីជាតិ ធ្វើឡើងចាប់ពីថ្ងៃសៅរ៍ ទី១៣ ដល់ថ្ងៃអង្គារ ទី១៦ ខែមេសា ឆ្នាំ២០២៤។
លោកស្នើរដ្ឋបាលរាជធានី-ខេត្តទូទាំងប្រទេស ត្រូវការពារសន្តិសុខ សុវត្ថិភាព សណ្តាប់ធ្នាប់សង្គម និងជួយសម្រួលចរាចរណ៍គ្រប់ទីកន្លែង ព្រមទាំងបង្កលក្ខណៈល្អប្រសើរតាមមណ្ឌលកម្សាន្ត និងរមណីយដ្ឋាននានាជូនភ្ញៀវជាតិ-អន្តរជាតិ ចូលរួមកម្សាន្តសប្បាយ។
ក្នុងកិច្ចប្រជុំពេញអង្គគណៈរដ្ឋមន្ត្រី នៅវិមានសន្តិភាព កាលពីថ្ងៃទី១៥មីនា លោកនាយករដ្ឋមន្ត្រី ហ៊ុន ម៉ាណែត បានណែនាំឱ្យរដ្ឋបាលរាជធានី ខេត្ត ត្រៀមរៀបចំពិធីបុណ្យចូលឆ្នាំថ្មី ប្រពៃណីជាតិ ឱ្យបានល្អតាមរយៈតុបតែងលម្អ និងរៀបចំកម្មវិធីកម្សាន្តសប្បាយនានាជូនប្រជាពលរដ្ឋ ក៏ដូចជាភ្ញៀវទេសចរបរទេស។
លោកក៏បានណែនាំឱ្យរដ្ឋបាលរាជធានីភ្នំពេញ ត្រៀមរថយន្តក្រុងសាធារណៈ ដើម្បីជីវភាពប្រជាពលរដ្ឋ ដែលទៅលេងស្រុកកំណើតក្នុងឱកាសបុណ្យចូលឆ្នាំថ្មី ដោយមានបម្រើទឹកសុទ្ធបន្ថែមពីលើសេវាកម្មដឹកជញ្ជូនឥតគិតថ្លៃ។
លោក ហ៊ុន ម៉ាណែត បញ្ជាឱ្យក្រសួងការងារ និងបណ្តុះបណ្តាលវិជ្ជាជីវៈ និងក្រសួងទេសចរណ៍ ត្រូវសហការជាមួយបណ្តាខេត្តជាប់ព្រំដែន ដើម្បីស្វាគមន៍ប្រជាពលរដ្ឋខ្មែរដែលត្រឡប់មកស្រុកកំណើត ក៏ដូចជាភ្ញៀវទេសចរបរទេសក្នុងឱកាសបុណ្យចូលឆ្នាំថ្មីខាងមុខ។
លោកនាយករដ្ឋមន្ត្រីបន្ថែមថា សម្រាប់ស្វាគមន៍ភ្ញៀវជាតិ និងអន្តរជាតិ មិនត្រឹមធ្វើតែនៅតាមបណ្ដាខេត្តជាប់ព្រំដែននោះទេ ក៏ត្រូវធ្វើបដិសណ្ឋារកិច្ចនៅតាមព្រលានយន្តហោះផងដែរ៕
ពលករចំណាកស្រុកកម្ពុជាឆ្លងដែនមកប្រទេសវិញ។ រូបភាព៖ ខ្មែរថាមស៍