អំពើជួញដូរមនុស្សត្រូវបានរកឃើញថា ៨០% នៃបណ្ដឹងជាករណីមិនពិត
គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស (គ.ជ.ប.ជ) បានរកឃើញបណ្ដឹងពាក់ព័ន្ធនឹងការជួញដូរមនុស្សប្រមាណ៨០% ជាបណ្ដឹងមិនពិតដែលជនរងគ្រោះបានប្ដឹង ដើម្បីស្វែងរកកិច្ចអន្តរាគមន៍សង្គ្រោះពួកគេ។
លោកស្រី ជូ ប៊ុនអេង អនុប្រធានអចិន្ត្រៃយ៍នៃគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស (គ.ជ.ប.ជ) បានប្រាប់ខ្មែរថាមស៍ពីម្សិលមិញថា សមត្ថកិច្ចជំនាញប្រយុទ្ធប្រឆាំងអំពើជួញដូរមនុស្សបានរកឃើញ បណ្ដឹងករណីជួញដូរមនុស្សមិនពិត បន្ទាប់ពីមានការរាយការណ៍ពីជនរងគ្រោះដោយការជួញដូរមនុស្ស។ លោកស្រីថា ពួកគេមិនបានរងគ្រោះដោយការជួញដូរមនុស្សទេ ប៉ុន្តែពួកគេទាំងនោះជាជនរងគ្រោះដោយសារតែបានសាងកំហុសផ្នែកអន្តោប្រវេសន៍ ហើយបានប្ដឹងមកកាន់អាជ្ញាធរមានសមត្ថកិច្ច ដើម្បីជួយសង្គ្រោះពួកគេចេញពីកន្លែងនោះ ហើយបានទៅរកការងារធ្វើនៅកន្លែងថ្មីផ្សេងទៀត។
លោកស្រីបន្ថែមថា៖ «យើងរកឃើញករណីមិនពិតបែបនេះប្រមាណជា៨០% ហើយយើងបានរាយការណ៍ទៅកាន់ស្ថានទូតសាមីឱ្យបានដឹងពីបណ្ដឹងរបស់ពួកគេ»។
លោកស្រីបានលើកឡើងថា គណៈកម្មាធិការជាតិប្រយុទ្ធប្រឆាំងអំពើជួញដូរមនុស្សពុំដែលព្រងើយកន្ដើយនឹងបណ្ដឹងដែលពាក់ព័ន្ធនឹងការជួញដូរមនុស្សឡើយ ហើយរាល់បណ្ដឹងដែលប្ដឹងដោយជនរងគ្រោះត្រូវបានដោះស្រាយយ៉ាងយកចិត្តទុកដាក់។
លោកស្រី ជូ ប៊ុនអេង បាននិយាយថា កម្ពុជានៅតែខិតខំស្រាវជ្រាវរកករណីជួញដូរមនុស្សនៅក្នុងប្រទេស ប៉ុន្តែកម្ពុជាអាចចាកចេញពីបញ្ជីខ្មៅរបស់មេរិកឬយ៉ាងណា គឺអាស្រ័យលើការវាយតម្លៃនិងការចង់បានរបស់អាមេរិក។
លោកស្រីថា ចេតនារបស់អាមេរិកចង់លុបបំបាត់រូបភាពជួញដូរមនុស្ស ហើយរាល់ការវាយតម្លៃពាក់ព័ន្ធនឹងអំពើជួញដូរមនុស្សរបស់សហរដ្ឋអាមេរិកធ្វើឡើងនៅក្នុងខែមិថុនា។ ដូច្នេះកម្ពុជាបានជំរុញការប្រឹងប្រែងបន្ថែមទៀត ដើម្បីបង្ហាញឱ្យអាមេរិកឃើញថាកម្ពុជាបានប្រឹងប្រែងលើកិច្ចការងារនេះ ប៉ុន្តែអាមេរិកខ្លួនឯងក៏ត្រូវតែទទួលស្គាល់ដែរថា អំពើជួញដូរមនុស្សមិនមែនកម្ពុជាជាអ្នកបង្កើតឡើយ។ កម្ពុជាជាប្រទេសមួយដែលរងគ្រោះដោយសារតែក្រុមជួញដូរមនុស្សបានរាយបណ្ដាញប្រទាក់ក្រឡាពីប្រទេសមួយទៅកាន់ប្រទេសមួយផ្សេងទៀតដែលមិនមែននៅតែកម្ពុជាទេ។
លោកស្រីបានបន្ថែមថា៖ «ទោះបីជាយ៉ាងណាត្រូវទទួលស្គាល់ទាំងអស់គ្នាថាមិនមែនគ្រប់ករណីដែលគេចោទប្រកាន់សុទ្ធតែជាការពិតនោះទេ ហើយយើងក៏គ្មានអ្វីត្រូវលាក់លាមដែរ»។
លោកស្រីបន្ថែមថា ជាមួយនឹងគ្នានេះកម្ពុជាក៏ត្រូវការកិច្ចសហការពីគ្រប់ប្រទេសដែរ ដើម្បីការបង្ការទប់ស្កាត់ ឬការបង្ក្រាបអំពើជួញដូរមនុស្ស ព្រោះបទល្មើសជួញដូរមនុស្សកើតមានឡើង ជនរងគ្រោះមិនមែនមានតែកម្ពុជាទេ គឺមានជនបរទេសដែរ។ ដូច្នេះអាចបញ្ជាក់បានថា អំពើជួញដូរមនុស្សក៏មានជាប់ពាក់ព័ន្ធក្នុងប្រទេសរបស់គាត់ដែរ។
លោក អំ សំអាត នាយកទទួលបន្ទុកកិច្ចការទូទៅនៃអង្គការលីកាដូ បានលើកឡើងថា បញ្ហានៃអំពើជួញដូរមនុស្សនៅតែជាកង្វល់នៅឡើយ ព្រោះស្ថានភាពទូទៅនៃបញ្ហាជួញដូរមនុស្សក្នុងប្រទេសកម្ពុជានៅតែជាប់ចំណាត់ថ្នាក់លេខ៣ក្នុងបញ្ជីខ្មៅដែលសហរដ្ឋអាមេរិកបានវាយតម្លៃ ទោះបីជារដ្ឋាភិបាលបានប្រឹងប្រែងប្រយុទ្ធប្រឆាំងអំពើជួញដូរមនុស្សក៏ដោយ ក៏វានៅតែជាកង្វល់ដដែល។
លោកថា បញ្ហាការជួញដូរមនុស្សប៉ះពាល់ច្រើនណាស់សម្រាប់កម្ពុជាធ្វើការការអភិវឌ្ឍប្រទេស ប៉ះពាល់ទេសចរ និងបង្កអសន្តិសុខសុវត្ថិភាពក្នុងសង្គមជាដើម។
លោកបន្ថែមថា៖ «ពាក់ព័ន្ធនឹងអំពើជួញដូរមនុស្សសព្វថ្ងៃកាន់តែមានភាពទំនើបកម្មតាមបែបបច្ចេកវិទ្យា ដែលប្រភេទខ្លះនៃការជួញដូរមនុស្សកាន់តែពិបាកកំណត់អត្តសញ្ញាណទៅទៀត ដូចជាករណីការបោកប្រាស់តាមអ៊ីនធឺណិតជាដើម»។
លោក អំ សំអាត បានស្នើដល់រដ្ឋាភិបាលពង្រឹងបន្ថែមលើយន្តការទប់ស្កាត់ និងការបង្ក្រាបការជួញដូរមនុស្ស ដូចជាការពង្រឹងការអនុវត្តច្បាប់ បង្កើនសហប្រតិបត្តិការរវាងអាជ្ញាធរពាក់ព័ន្ធជាមួយបណ្ដាប្រទេសនានា បណ្ដុះបណ្ដាលបន្ថែមលើជំនាញវិជ្ជាជីវៈឱ្យទាន់នឹងទំនើបកម្មនៃការជួញដូរមនុស្ស និងត្រូវតែអនុវត្តតាមច្បាប់ចំពោះមន្ត្រីពុករលួយក្នុងអំពើជួញដូរមនុស្ស។
លោកជឿជាក់ថា៖ «ពេលកម្ពុជាយើងតាំងចិត្តអនុវត្តជាមួយនឹងយន្តការថ្មីដោយឆន្ទៈមោះមុត កម្ពុជាយើងនឹងអាចចាកចេញពីបញ្ជីខ្មៅឬអាចទទួលបានចំណាត់ថ្នាក់ល្អឡើងវិញ»៕
លោកស្រី ជូ ប៊ុនអេង រដ្ឋលេខាធិការក្រសួងមហាផ្ទៃ និង ជាអនុគណៈកម្មាធិការជាតិប្រយុទ្ធប្រឆាំងការជួញដូរមនុស្ស។ រូបភាព៖ ក្រសួងមហាផ្ទៃ