អ្នកសិក្សាផ្នែកច្បាប់ស្នើឱ្យក្រសួងមហាផ្ទៃដកអភិបាលខេត្តដែលមិនអាចទប់ស្កាត់អំពើជួញដូរមនុស្ស
អ្នកសិក្សាផ្នែកច្បាប់ថា ដើម្បីទប់ស្កាត់បទល្មើសជួញដូរមនុស្ស និងគ្រឿងញៀនប្រកបដោយប្រសិទ្ធភាព ក្រសួងមហាផ្ទៃគួរតែដកអភិបាលខេត្ត ដែលមិនអាចទប់ស្កាត់អំពើជួញដូរមនុស្សក្នុងដែនសមត្ថកិច្ចរបស់ខ្លួន។ ការលើកឡើងបែបនេះ ក្រោយពីរដ្ឋមន្ត្រីក្រសួងមហាផ្ទៃស្នើឱ្យស្នងការរាជធានី ខេត្តទាំងអស់ ត្រួតពិនិត្យទីតាំងខារ៉ាអូខេ បៀហ្គាឌិន និងកាស៊ីណូ ដើម្បីទប់ស្កាត់ការជួញដូរមនុស្ស និងគ្រឿងញៀន។
អ្នកសិក្សាផ្នែកច្បាប់ស្នើឱ្យក្រសួងមហាផ្ទៃ គួរដកតួនាទីអភិបាលខេត្ត និងមន្ត្រីដែលពាក់ព័ន្ធទីតាំងជួញដូរមនុស្ស និងគ្រឿងញៀន ជាជាងជំរុញឱ្យអាជ្ញាធរត្រួតពិនិត្យទីតាំងប្រព្រឹត្តបទល្មើសទាំងនោះ។
អ្នកសិក្សាផ្នែកច្បាប់ លោក វ៉ន ចាន់ឡូត ប្រាប់វិទ្យុអាស៊ីសេរីនៅថ្ងៃទី២៩ ខែមីនា ថា យុទ្ធនាការបង្ក្រាបទីតាំងជួញដូរមនុស្ស និងគ្រឿងញៀននៅតាមកាស៊ីណូ KTV និងបៀហ្គាឌិន ដោយមិនអាចស្វែងរកមន្ត្រីដែលពាក់ព័ន្ធ ឬឈរកាងទីតាំងទាំងនោះមកដាក់ពិន័យនោះទេ នោះរដ្ឋាភិបាលនឹងមិនអាចកាត់បន្ថយបទឧក្រិដ្ឋទាំងនេះបានឡើយ។ លោកស្នើឱ្យក្រសួងមហាផ្ទៃ គួរដកតួនាទីអភិបាលខេត្តដែលអសមត្ថភាព បណ្ដោយឱ្យមានទីតាំងជួញដូរមនុស្ស និងគ្រឿងញៀន ដើម្បីពង្រឹងការអនុវត្តច្បាប់ ជាជាងចុះបង្ក្រាបទីតាំងដែលបង្កប់បទល្មើសម្ដងម្កាល។ «» ការលើកឡើងរបស់អ្នកសិក្សាផ្នែកច្បាប់រូបនេះ ធ្វើឡើងក្រោយពីរដ្ឋមន្ត្រីក្រសួងមហាផ្ទៃ លោក ស សុខា លើកឡើងថា តាមរយៈការចុះត្រួតពិនិត្យទីតាំងខារ៉ាអូខេមួយចំនួនកន្លងមក អាជ្ញាធរបានរកឃើញស្ត្រីខ្មែរ និងបរទេសមួយចំនួនត្រូវបានមេការលក់ពីកន្លែងមួយ ទៅកន្លែងមួយផ្សេងទៀត។ លោកបន្តថា ដើម្បីប្រយុទ្ធប្រឆាំងអំពើជួញដូរមនុស្ស និងគ្រឿងញៀន ស្នងការដ្ឋាននគរបាលរាជធានី ខេត្តទាំងអស់ ជាពិសេសខេត្តនៅតាមព្រំដែន ត្រូវចុះត្រួតពិនិត្យទីតាំងកាស៊ីណូ KTV និងរង្គសាល ដោយត្រូវសហការជាមួយម្ចាស់ទីតាំង និងអាជ្ញាធរនៅមូលដ្ឋាន។
លោក ស សុខា បានថ្លែងបែបនេះនៅក្នុងកម្មវិធីផ្សព្វផ្សាយរបាយការណ៍ជួញដូរមនុស្ស កាលពីថ្ងៃទី២៧ ខែមីនា ឆ្នាំ២០២៤ ប៉ុន្តែទើបតែត្រូវបានផ្សព្វផ្សាយនៅលើហ្វេសប៊ុកផ្លូវការរបស់លោក នៅថ្ងៃទី២៩ ខែមីនា។
របាយការណ៍របស់អង្គការសហប្រជាជាតិ (UN) ចេញផ្សាយកាលពីចុងខែសីហា កន្លងទៅបង្ហាញថា មនុស្សប្រមាណ ១សែននាក់កំពុងរងគ្រោះ បង្ខំឱ្យធ្វើការជាអ្នកបោកប្រាស់តាមអ៊ីនធឺណិតនៅកម្ពុជា។ ជនរងគ្រោះប្រឈមមុខនឹងការបំពានគំរាមកំហែងដល់សុវត្ថិភាព ទទួលរងការធ្វើទារុណកម្មដោយអំពើឃោរឃៅអមនុស្សធម៌ ការឃុំខ្លួនដោយបំពាន អំពើហិង្សាផ្លូវភេទ ការធ្វើការដោយបង្ខំ និងការរំលោភសិទ្ធិមនុស្សផ្សេងៗទៀត។
ជុំវិញរឿងនេះ នាយកទទួលបន្ទុកកិច្ចការទូទៅនៃអង្គការឃ្លាំមើលសិទ្ធិមនុស្សលីកាដូ (Licadho) លោក អំ សំអាត គាំទ្រចំពោះការអនុវត្តច្បាប់ឱ្យបានម៉ឺងម៉ាត់ទៅលើមន្ត្រី និងអាជ្ញាធរដែលពាក់ព័ន្ធ និងទទួលផលពីទីតាំងដែលមានបង្កប់អំពើជួញដូរមនុស្ស និងគ្រឿងញៀន។ លោកបន្តថា ក្រៅពីទីតាំងកាស៊ីណូ បៀហ្គាឌិន KTV និង រង្គសាលហើយនោះ ក្រសួងមហាផ្ទៃក៏គួរចុះត្រួតពិនិត្យអគារ ឬខុនដូរដែលសង្ស័យថា មានបទល្មើសជួញដូរមនុស្សផងដែរ។
កន្លងមក បើទោះបីជាអាជ្ញាធរបង្ក្រាបទីតាំងបង្ខាំងមនុស្ស និងគ្រឿងញៀនរាប់តោនក្ដី ប៉ុន្តែសមត្ថកិច្ចពុំបានស្វែងរកមេខ្លោងធំៗដែលសង្ស័យនឹងការប្រព្រឹត្តអំពើជួញដូរមនុស្ស និងគ្រឿងញៀន បង្ហាញឱ្យមហាជនបានឃើញនោះទេ។ អ្នកសិក្សាផ្នែកច្បាប់លើកឡើងថា ដើម្បីទប់ស្កាត់បទឧក្រិដ្ឋទាំងនេះបាន រដ្ឋាភិបាលគួរបើកការស៊ើបអង្កេត និងចាត់វិធានការច្បាប់ឱ្យបានម៉ឺងម៉ាត់ទៅលើមន្ត្រីដែលពាក់ព័ន្ធបទល្មើសជួញដូរមនុស្ស និងគ្រឿងញៀន ជាជាងគ្រាន់តែបង្ហាញឆន្ទៈ តែបណ្ដោយឱ្យទីតាំងបង្កប់អំពើជួញដូរមនុស្ស និងគ្រឿងញៀននៅតែអាចបន្តអាជីវកម្មឡើងវិញ៕