ពលករខ្មែរមកពីថៃសប្បាយចិត្ត ដែលរាជរដ្ឋាភិបាលសម្រួលមិនយកថ្លៃសេវា ចេញ-ចូល តាមច្រកព្រំដែន
រាជធានីភ្នំពេញ៖ ពលករខ្មែរដែលវិលត្រលប់ពីប្រទេសថៃ មកលេងស្រុកកំណើតអំឡុងពេលចូលឆ្នាំខ្មែរ នៅថ្ងៃទី២ ខែមីនា ២០២៤ លើកឡើងថាខ្លួនសប្បាយចិត្តដែលរាជរដ្ឋាភិបាលសម្រួលមិនយកថ្លៃសេវាបង់ប្រាក់លើទិដ្ឋាការចេញ-ចូល (Re-Entry) នៅតាមច្រកព្រំដែនអន្តរជាតិកម្ពុជា-ថៃ។ ពលករខ្មែរអរគុណអំពីការយកចិត្តទុកដាក់ខ្ពស់ពីអាជ្ញាធរតាមព្រំដែន តាមរយៈផ្តល់អាហារសម្រន់ នំបុ័ង ទឹកសុទ្ធ ជាដើម ។ ការលើកឡើងបែបនេះបន្ទាប់ពីរាជរដ្ឋាភិបាលបានប្រកាសមិនយកថ្លៃសេវាបង់ប្រាក់លើការធ្វើដំណើរទៅវិញទៅមក (Re-Entry) របស់ពលករខ្មែរដែលកំពុងធ្វើការ និងរស់នៅប្រទេសថៃដែលវិលត្រលប់មកលេងស្រុកកំណើត ក្នុងអំឡុងពេលចូលឆ្នាំខ្មែរ ចាប់ពីថ្ងៃទី ០១ ខែ មេសា រហូតដល់ថ្ងៃទី ១៥ ខែ ឩសភា ឆ្នាំ២០២៤ ។ គូសបញ្ជាក់ដែរថា សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជាកាលពីថ្ងៃទី៨ ខែកុម្ភៈ ឆ្នាំ២០២៤បានលើកឡើងថា រាជរដ្ឋាភិបាលកម្ពុជា និងថៃបានសម្រេចមិនយកថ្លៃទិដ្ឋាការចេញ-ចូលប្រទេសថៃ (Re-Entry) ដើម្បីកាត់បន្ថយការចំណាយពលករខ្មែរ ដែលនឹងធ្វើដំណើរត្រលប់មកកម្ពុជាក្នុងឱកាសពិធីបុណ្យចូលឆ្នាំខ្មែរប្រពៃណីជាតិខាងមុខនេះ ៕