ពលករខ្មែរមួយចំនួនត្អូញត្អែរគ្មានលុយមកលេងចូលឆ្នាំ ខណៈមន្ត្រីព្រំដែនបន្តកៀបយកលុយ
ក្នុងឱកាសបុណ្យចូលឆ្នាំប្រពៃណីខ្មែរខិតជិតមកដល់នេះ ពលករខ្មែរមួយចំនួន ដែលកំពុងធ្វើការនៅប្រទេសថៃ មិនបានត្រឡប់មកលេងស្រុកកំណើតឡើយពីព្រោះរកលុយមិនសូវបាន។ ពួកគាត់ថា បើទោះជាអាជ្ញាធរថៃមិនយកថ្លៃទិដ្ឋាការពីពលករក្ដី ក៏អាជ្ញាធរខ្មែរនៅតាមច្រកព្រំដែននៅតែគាបសង្កត់យកលុយពីពលករដដែល។
ពលករខ្មែរធ្វើការនៅប្រទេសថៃមួយចំនួនត្អូញត្អែរពីបញ្ហាជីវភាព ខណៈបុណ្យចូលឆ្នាំថ្មីខាងមុខនេះពួកគាត់មិនបានត្រឡប់ទៅស្រុកកំណើតជួបជុំសាច់ញាតិឡើយ ដោយសារបញ្ហាពុករលួយនៅតាមច្រកព្រំដែន។
ពលករខ្មែរធ្វើការនៅទីក្រុងបាងកក (Bangkok) មានស្រុកកំណើតនៅខេត្តតាកែវ លោក អ៊ុន សុខណា ប្រាប់វិទ្យុអាស៊ីសេរីនៅថ្ងៃទី៣ ខែមេសា ថា បុណ្យចូលឆ្នាំខ្មែរខាងមុខនេះលោកមិនបានទៅលេងស្រុកកំណើតនោះទេ ដោយសារមានអ្នកឆ្លងដែនទៅមុនៗត្រូវបាននគរបាលអន្តោប្រវេសន៍នៅតាមច្រកព្រំដែនចាំទារប្រាក់។ លោកថា ដោយសារបញ្ហាអំពើពុករលួយនៅតាមច្រកព្រំដែន និងរកប្រាក់មិនសូវបានផងនោះធ្វើឱ្យលោកខកខានមិនបានជួបជុំក្រុមគ្រួសាររយៈពេល២ឆ្នាំជាប់ៗគ្នាមកហើយ។
លោក អ៊ុន សុខណា៖ «ទោះបីជារដ្ឋាភិបាលប្រកាសមិនឱ្យយកក៏ពួកខិលខូចមួយចំនួននៅព្រំដែនហ្នឹងនៅតែកេងប្រវ័ញ្ចយកពីពលករដដែលហ្នឹង។ ពីព្រោះគាត់មានលេសនិយាយចេះពួកយើងចេញទៅផ្ទះចង់ដំណើរទៅលឿនដល់ហើយគាត់យកលេសកាក់បងប្អូនយើងទុកមួយម៉ោង២ម៉ោងអ៊ីចឹងទៅឱ្យពន្យារពេលយើងឱ្យយើងភ័យឱ្យយើងព្រួយបារម្ភដើម្បីឱ្យយើងឱ្យលុយទៅវារហ័ស»។
ដោយឡែកពលករធ្វើការនៅខេត្តសាមុតប្រាកាន (Samut Prakan) ប្រទេសថៃ លោក សារឿង គន្ធរ ថ្លែងថា លោកមិនបានត្រឡប់ទៅស្រុកកំណើតនោះទេ ដោយសារគ្មានប្រាក់សម្រាប់ចំណាយលើថ្លៃដឹកអីវ៉ាន់ និងរថយន្តឈ្នួល។ លោកបន្តថា នៅពេលលោកទៅលេងស្រុកកំណើតម្ដងៗត្រូវចំណាយយ៉ាងហោចណាស់ចន្លោះពី ២ពាន់ ទៅ៣ពាន់ដុល្លារ។
លោក សារឿង គន្ធរ៖ «ឆ្នាំនេះវាណាមួយការធ្វើដំណើរចេញមិនដូចជាយើងធ្វើដំណើរនៅខ្មែរយើងពីភ្នំពេញទៅខេត្ត។ វាប្រទេសឆ្លងប្រទេសវាត្រូវការការចំណាយច្រើនពីនេះយើងទៅម្តងអ៊ីចឹងទៅវាក៏ចំណាយច្រើនក្នុងឆ្នាំនេះអត់បានទៅទេ។ យើងកំណត់ថា ឱ្យទាបបំផុតនោះក៏៥ទៅ៦ម៉ឺនបាតដែលនេះគ្រាន់តែទាបបំផុតទេបើយើងគិតជាដុល្លារចូលជិត២ពាន់ដុល្លារបាត់ហើយ»។
កាលពីថ្ងៃទី២៦ ខែមីនា រដ្ឋមន្ត្រីក្រសួងការងារថៃ លោក ភីផាត រាឆាគិតប្រាកាន (Phiphat Ratchakitprakarn) បានស្នើទៅគណៈរដ្ឋមន្ត្រីថៃ អនុញ្ញាតឱ្យពលករ ៣សញ្ជាតិមានដូចជា កម្ពុជា ឡាវ (Lao) និងមីយ៉ាន់ម៉ា (Myanmar) អាចធ្វើដំណើរទៅលេងប្រទេសកំណើត ក្នុងអំឡុងទេសកាសង្ក្រាន្តចាប់ពីថ្ងៃទី១ ខែមីនា រហូតដល់ថ្ងៃទី១៥ ខែឧសភា ដោយមិនចាំបាច់ចំណាយថ្លៃវាយត្រាលើឯកសារចេញ ឬឯកសារចូលជាថ្មី (Re-entry) ចំនួន ១ពាន់បាត ឬប្រហែល ២៨ដុល្លារនោះទេ។វិទ្យុអាស៊ីសេរីមិនអាចទាក់ទងប្រធានអនុព័ន្ធការងារអមស្ថានទូតកម្ពុជាប្រចាំប្រទេសថៃ លោក ឈឹម វិបុល និងអគ្គនាយកអន្តោប្រវេសន៍ នៃក្រសួងមហាផ្ទៃ លោក សុខ វាសនា ដើម្បីសុំការបកស្រាយជុំវិញបញ្ហានេះបានទេនៅថ្ងៃទី៣ ខែមេសា។
ទោះជាយ៉ាងណា លោកនាយករដ្ឋមន្ត្រី ហ៊ុន ម៉ាណែត កាលពីថ្ងៃទី៣០ ខែមីនា ថ្លែងថា ការណ៍ដែលអាជ្ញាធរថៃលើកលែងមិនយកថ្លៃចំណាយលើការធ្វើដំណើរចេញ-ចូលរបស់ពលករខ្មែរគឺដោយសារលោកបានស្នើទៅនាយករដ្ឋមន្ត្រីថៃ លោក សេដ្ឋា ថាវីស៊ីន (Srettha Thvisin)។ ប៉ុន្តែភាគីថៃមិនបានបញ្ជាក់ថា ការលើកលែងការយកថ្លៃចំណាយលើពលករខ្មែរ ឡាវ (Lao) និងមីយ៉ាន់ម៉ា (Myanmar) នេះគឺដោយសារការស្នើសុំរបស់ លោក ហ៊ុន ម៉ាណែត ឡើយ។
ខណៈដែលពលករខ្មែរមិនបានត្រឡប់ទៅលេងស្រុកកំណើតក្នុងឱកាសបុណ្យចូលឆ្នាំខ្មែរ ក៏មានពលករខ្មែរជាច្រើននាក់នាំគ្នាសម្រុកទៅលេងចូលឆ្នាំខ្មែរ។ ពលករខ្មែរទាំងនោះដោយអ្នកខ្លះបីកូនតូច និងអ្នកខ្លះទៀត ដៃកាន់កាបូបអូសរយីងរយោងពេញផ្លូវក្នុងទឹកមុខស្រពោនដោយសារតែនឿយហត់ក្នុងការរង់ចាំចេញពីច្រកព្រំដែន។
របាយការណ៍របស់អគ្គនាយកដ្ឋានអន្តោប្រវេសន៍គិតត្រឹមថ្ងៃទី២ ខែមេសា បង្ហាញថា មានពលករខ្មែរបានធ្វើដំណើរវិលត្រឡប់ចូលស្រុកវិញ នៅតាមបណ្ដាប៉ុស្តិ៍នគរបាលច្រកទ្វារព្រំដែនអន្តរជាតិសរុបចំនួនជាង ២ម៉ឺននាក់ (២៧.៩៤៦)។
ជុំវិញបញ្ហានេះ មន្ត្រីផ្នែកការពារសិទ្ធិពលករចំណាកស្រុក នៃអង្គការសង់ត្រាល់ (CENTRAL) ប្រចាំនៅប្រទេសថៃ លោក លឹង សុផុន កត់សម្គាល់ឃើញថា មានពលករសម្រុកមកលេងស្រុកកំណើតច្រើន។ លោកថា ថ្វីត្បិតអាជ្ញាធរថៃមិនយកថ្លៃចំណេញលើទិដ្ឋាការក្ដី ក៏ពលករខ្លះពុំមានទិដ្ឋាការនៅតែមិនអាចធ្វើដំណើរទៅស្រុកកំណើតបានដដែល។
លោក លឹង សុផុន៖ «កន្លងមកយើងឃើញថា ពួកគាត់ការចេញចូលអ៊ីចឹងដែរ។ ប៉ុន្តែទាក់ទងទៅនឹងការចំណាយវាច្រើនប្រសិនបើយើងបន្ថយក្នុងការចំណាយ ឬក៏រដ្ឋាភិបាលជួយមានវិធានការណាមួយផ្សេងដើម្បីបន្ធូរបន្ថយចំណាយពួកគាត់ដូចជាដឹកអីវ៉ាន់ចេញចូល ឬក៏អូសអីវ៉ាន់ចេញ ហើយធ្វើឱ្យពួកគាត់បន្ថយនូវការចំណាយហ្នឹងខ្ញុំគិតថា វាជារឿងល្អប្រសើរហើយ»។
ពលករខ្មែរធ្វើនៅប្រទេសថៃស្នើឱ្យអាជ្ញាធរខ្មែរជួយសម្រួលដល់ការធ្វើដំណើរពាក់ព័ន្ធនឹងឯកសារមួយចំនួន និងរឹតបន្តឹងការអនុវត្តច្បាប់ពីព្រោះនៅតាមច្រកព្រំដែនមួយចំនួនមានមន្ត្រីពុករលួយចាំទារប្រាក់ពីពួកគាត់៕
ពលករខ្មែរធ្វើការនៅប្រទេសថៃ រង់ចាំឆ្លងដែនចូលមកកម្ពុជា កាលពីថ្ងៃទី៣ ខែមេសា ឆ្នាំ២០២៤។