កម្ពុជានឹងជួបភាគីឥណ្ឌា ក្រោយពីមានការលើកឡើង អំពីការជួញដូរជនជាតិឥណ្ឌានៅកម្ពុជា
អ្នកស្រី ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធានអចិន្ត្រៃយ៍គណៈកម្មាធិការប្រយុទ្ធប្រឆាំងការជួញដូរមនុស្ស និងលោក ស៊្រី រ៉ានឌៀ យ៉ាស្វាល (Shri Randhir Jaiswal) អ្នកនាំពាក្យក្រសួងការបរទេសឥណ្ឌា លោក ស្រ៊ី រ៉ានឌៀ យ៉ាយស្វាល (Shri Randhir Jaiswal) ថ្លែងក្នុងសន្និសីទសារព័ត៌មានមួយ កាលពីថ្ងៃទី៨ ខែមីនា ឆ្នាំ២០២៤។
មន្ត្រីជាន់ខ្ពស់គណៈកម្មាធិការប្រយុទ្ធប្រឆាំងការជួញដូរមនុស្ស នៃក្រសួងមហាផ្ទៃ អះអាងថា កម្ពុជានឹងជួបពិភាក្សាជាមួយភាគីឥណ្ឌា ក្នុងពេលឆាប់ៗ នេះ។
ការអះអាងនេះ បន្ទាប់ពីរដ្ឋាភិបាលឥណ្ឌា កាលថ្ងៃទី៤ ខែមេសា លើកឡើងថា ជនជាតិខ្លួនជាង ៥ពាន់នាក់ កំពុងជាប់នៅកម្ពុជា និងបានព្រមានជាថ្មីទៀត ដល់ប្រជាជនឥណ្ឌាប្រយ័ត្នកុំឱ្យធ្លាក់ខ្លួនរងគ្រោះជាអ្នក ដែលត្រូវគេជួញដូរ ពីការសន្យាផ្ដល់ឱកាសការងាររកប្រាក់កម្រៃនៅប្រទេសកម្ពុជា។
មន្ត្រីជាន់ខ្ពស់គណៈកម្មាធិការជាតិប្រយុទ្ធប្រឆាំងការជួញដូរមនុស្ស អំពាវនាវទៅស្ថានទូតនានា ដែលពាក់ព័ន្ធឱ្យផ្ដល់ព័ត៌មាន និងធ្វើសហការ ដើម្បីស្រាវជ្រាវជួយ ជនរងគ្រោះ។
រដ្ឋលេខាធិការក្រសួងមហាផ្ទៃ និងជាអនុប្រធានអចិន្ត្រៃយ៍គណៈកម្មាធិការប្រយុទ្ធប្រឆាំងការជួញដូរមនុស្ស អ្នកស្រី ជូ ប៊ុនអេង ប្រាប់វិទ្យុអាស៊ីសេរី នៅថ្ងៃទី៥ មេសា ថា កម្ពុជានឹងជួបជាមួយស្ថានទូតឥណ្ឌា នៅប៉ុន្មានថ្ងៃខាងមុខនេះ ពីព្រោះកម្ពុជា ក៏ចង់ឱ្យឥណ្ឌាបង្ហាញទិន្នន័យជាក់លាក់ដែរ។
អ្នកស្រី ជូ ប៊ុនអេង៖ «នៅប្រទេសមួយចំនួនក៏មាន នៅហ្នឹងក៏មាន បានគេទាក់ទង អូសទាញជនរងគ្រោះពីបណ្ដាប្រទេសហ្នឹង ក៏នៅមាន។ យើងក៏ចង់ឱ្យមានការជជែកគ្នារវាងប្រទេស ដែលពាក់ព័ន្ធឬ មួយនៅក្នុងតំបន់ហ្នឹង ដើម្បីរកឱ្យឃើញថា តើមានវិធី ដែលអាចបង្ការ ឬទប់ស្កាត់ ក៏ដូចជា រឿងបង្ក្រាបសង្គ្រោះ ឬមួយក៏ផ្ដន្ទាទោសអីហ្នឹង ធ្វើយ៉ាងម៉េច ឱ្យឯកភាពគ្នា ឬមួយឱ្យវាគាំទ្រគ្នាទៅវិញទៅមក។ បើសិនមិនអ៊ីចឹងទេ មានន័យថា ជួនកាលអាចបាត់ពីកម្ពុជាទៅចេញនៅប្រទេសណាផ្សេងទៀត ហើយពីប្រទេសនោះ អាចមកកម្ពុជាទៀត»។
កាលពីថ្ងៃទី២៨ ខែមីនា សារព័ត៌មាន The Indian Express បានរាយការណ៍ថា ជនជាតិឥណ្ឌាជាង ៥ពាន់នាក់ ត្រូវបានឃុំខ្លួន និងធ្វើទារុណកម្ម បង្ខំឱ្យធ្វើការឆបោកតាមប្រព័ន្ធអ៊ីនធឹណិត។ ជាមួយគ្នានេះ រដ្ឋាភិបាលឥណ្ឌាប៉ាន់ប្រមាណថា អ្នកទាំងនោះ បានឆបោកលុយយ៉ាងតិច ៧០លានដុល្លារ ពីប្រជាជននៅ ក្នុងប្រទេសឥណ្ឌា ក្នុងរយៈពេល ៦ខែ ចុងក្រោយនេះ។
ក្រសួងការបរទេសឥណ្ឌាថា ខ្លួនកំពុងធ្វើបេសកកម្មនៅទីក្រុងភ្នំពេញ ដោយ សហការជិតស្និទ្ធជាមួយអាជ្ញាធរកម្ពុជា ដើម្បីដោះស្រាយបញ្ហានេះ និង ផ្ដល់ជំនួយដល់ជនជាតិឥណ្ឌា ដែលរងផលប៉ះពាល់។
យោងតាម The Indian Express នៅថ្ងៃទី៥ ខែមេសា ឱ្យដឹងថា ក្រសួងមហាផ្ទៃឥណ្ឌា កាលពីខែមុន បានបើកកិច្ចប្រជុំជាមួយស្ថាប័នជំនាញនានា របស់ឥណ្ឌា ដើម្បីរៀបចំយុទ្ធសាស្ត្រ ក្នុងការជួយសង្គ្រោះជនជាតិឥណ្ឌា ដែលកំពុងជាប់នៅប្រទេសកម្ពុជា។ ភ្នាក់ងារកណ្ដាលរបស់ឥណ្ឌាស៊ើបអង្កេតឃើញថា ជនជាតិឥណ្ឌាទាំងនេះ ចាញ់បោកនៅកម្ពុជា ក្រោមលេសនៃការផ្ដល់ការងារបញ្ចូល ទិន្នន័យ ប៉ុន្តែជាក់ស្ដែង ជាការបង្ខំឱ្យពួកគេ អនុវត្តការងារឆបោកតាមអ៊ីនធឺណិត។
ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គឹមអេង លើកឡើងថា បទល្មើសបង្ខំមនុស្ស ឱ្យឆបោកតាមអ៊ីនធឺណិតបន្តកើតឡើងនៅកម្ពុជា ទំនងដោយសារតែក្រុមឧក្រិដ្ឋជនយល់ថា ការអនុវត្តច្បាប់នៅកម្ពុជា មិនទាន់តឹងរ៉ឹង ដែលជាឱកាសសម្រាប់ពួកគេប្រព្រឹត្តបទល្មើស។
លោក យង់ គិមអេង៖ «ករណីនេះ កើតមានអ៊ីចឹងមែន គឺអាចស្វែងរកឱ្យមានកិច្ចសហប្រតិបត្តិការជាលក្ខណៈអន្តរជាតិថែមទៀត។ ខ្ញុំយល់ថា ភាគីកម្ពុជានឹងក៏បានព័ត៌មានកាន់តែច្បាស់ ហើយក៏អាចនឹងបានជាតម្រុយ និងវិធីក្នុងការចាត់វិធានការផ្សេងៗ ទៀត ពីព្រោះកាលណាដឹងពីតម្រុយ ដឹងពីព័ត៌មានពិតងាយស្រួលចាត់វិធានការ ហើយនឹងរិះរកវិធីថ្មីៗ ថែមទៀត ដើម្បីចាត់វិធានការ ដើម្បីបង្ការទប់ស្កាត់ កុំឱ្យបញ្ហាជួញដូរមនុស្សកើតឡើងតទៅទៀត»។
របាយការណ៍ចុងក្រោយរបស់ក្រសួងការបរទេសអាមេរិក កាលពីឆ្នាំ២០២៣ ឱ្យដឹងថា កម្ពុជាស្ថិតក្នុងចំណោមប្រទេសចំនួន២៤ ដែលជាប់ចំណាត់ថ្នាក់កម្រិតទី៣ ពាក់ព័ន្ធនឹងការជួញដូរមនុស្ស។ កម្រិតទី៣ នេះ គឺជាចំណាត់ថ្នាក់ដ៏ អាក្រក់បំផុត ដែលកំណត់ដោយក្រសួងការបរទេសអាមេរិក។
ចំណែក អង្គការសហប្រជាជាតិ (UN) កាលពីខែសីហា ឆ្នាំ២០២៣ បង្ហាញថា នៅកម្ពុជាមានមនុស្សយ៉ាងហោចណាស់ ១០ម៉ឺននាក់ កំពុងរងគ្រោះ ដោយធ្វើការជាអ្នកបោកប្រាស់តាមអ៊ិនធឹណិត ដែលជនរងគ្រោះប្រឈមមុខនឹងការរំលោភបំពាន គំរាមកំហែង ទទួលរងការធ្វើទារុណកម្ម អំពើហិង្សាផ្លូវភេទ និងការរំលោភសិទ្ធិមនុស្សផ្សេងៗ ទៀត៕
