អ្នកនាំពាក្យ ៖ ពលករ និងពលរដ្ឋកម្ពុជាធ្វើការនៅថៃ ជាង១៣ម៉ឺន៦ពាន់នាក់ បានធ្វើដំណើរមកលេងស្រុកចូលរួមបុណ្យចូលឆ្នាំថ្មី
អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានឱ្យដឹងថា មានពលករ និងពលរដ្ឋកម្ពុជាធ្វើការនៅប្រទេសថៃប្រមាណជាង ១៣ ម៉ឺន ៦ ពាន់នាក់ បានធ្វើដំណើរចូលតាមច្រកទ្វារអន្តរជាតិនានាមកលេងស្រុក ដើម្បីចូលរួមពិធីបុណ្យចូលឆ្នាំខ្មែរដែលនឹងឈានចូលមកដល់នៅចុងសប្ដាហ៍នេះ។ លោក កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានមានប្រសាសន៍នៅព្រឹកថ្ងៃទី ៩ មេសា នេះថា យោងតាមសេចក្ដីជូនដំណឹងស្ដីពីដំណើរវិលចូលប្រទេសរបស់ពលរដ្ឋ និងពលករកម្ពុជា ដើម្បីចូលរួមបុណ្យចូលឆ្នាំថ្មីខាងមុខនេះរបស់អគ្គនាយកដ្ឋានអន្តោប្រវេសន៍ នៃក្រសួងមហាផ្ទៃ ចាប់ពីថ្ងៃទី ១ ដល់ថ្ងៃទី ៦ ខែមេសា ឆ្នាំ ២០២៤ មានចំនួនសរុប ១៣៦ ៣៤០ នាក់ ក្នុងនោះពលករកម្ពុជាចំនួន ៤០ ៩៧៩ នាក់ និងពលរដ្ឋកម្ពុជាចំនួន ៩៥ ៣៦១ នាក់។ លោកបានបន្តថា ការចេញចូលរបស់ពលករ និងពលរដ្ឋកម្ពុជានៅក្នុងរដូវចូលឆ្នាំថ្មីនេះ ចាប់ពីថ្ងៃទី ១ ខែមេសា ដល់ថ្ងៃទី ១៥ ខែឧសភា ឆ្នាំ ២០២៤ គឺពុំមានការយកថ្លៃទិដ្ឋាការទេ។ មិនត្រឹមតែប៉ុណ្ណោះ មានមន្ត្រីពាក់ព័ន្ធរង់ចាំសម្របសម្រួលជូនកម្មករ ក៏ដូចជាពលរដ្ឋបានលឿនរហ័ស និងប្រកបដោយសុវត្ថិភាព និងមានមធ្យោបាយមួយចំនួនសម្រាប់ពួកគាត់ដែលពុំមានលទ្ធភាពធ្វើដំណើរវិលត្រឡប់ទៅផ្ទះវិញ។ លោកបានបន្តទៀតថា ទន្ទឹមនឹងនេះក៏មានផ្តល់ភេសជ្ជៈដូចជាទឹកបរិសុទ្ធសម្រាប់ពលរដ្ឋពិសាពេលមកដល់ និងពេលធ្វើដំណើរវិលត្រឡប់ទៅផ្ទះវិញផងដែរ។ លោក កត្តា អ៊ន សំណូមពរពលករខ្មែរធ្វើការនៅថៃដែលត្រូវធ្វើដំណើរមកលេងស្រុកក្នុងឱកាសបុណ្យចូលឆ្នាំថ្មីខាងមុខនេះ សូមកុំចូលតាមច្រករបៀងខុសច្បាប់ផ្សេងៗ ដើម្បីចៀសវាងមានបញ្ហា និងប៉ះពាល់ដល់សុខសុវត្ថិភាព។ គួរបញ្ជាក់ថា បច្ចុប្បន្ន មានពលករកម្ពុជាកំពុងធ្វើការ និងរស់នៅប្រទេសថៃ ចំនួន ១ ២៦២ ១៧៥ នាក់ ស្រី ៥០៨ ៦៤៦ នាក់ ដោយបានផ្ញើថវិកាមកក្រុមគ្រួសារវិញ ប្រមាណជាង ២ ពាន់លានដុល្លារ ក្នុង ១ ឆ្នាំ ដែលលើកស្ទួយសេដ្ឋកិច្ចគ្រួសារ ក៏ដូចជាសេដ្ឋកិច្ចជាតិកាន់តែរីកចម្រើន៕