ប្រជាពលរដ្ឋខ្មែរជាង ២៥ម៉ឺននាក់ ធ្វើដំណើរចូលក្នុងប្រទេសវិញតាមប៉ុស្ដិ៍នគរបាលច្រកទ្វារព្រំដែន
ប្រជាពលរដ្ឋខ្មែរជាង ២៥ម៉ឺននាក់ ធ្វើដំណើរពីប្រទេសនានាចូលក្នុងប្រទេសវិញ នៅតាមបណ្ដាប៉ុស្ដិ៍នគរបាលច្រកទ្វារព្រំដែន ដើម្បីចូលរួមពិធីបុណ្យចូលឆ្នាំថ្មី ប្រពៃណីជាតិខ្មែរ ដែលប្រព្រឹត្តទៅនៅថ្ងៃទី១៣ ដល់ថ្ងៃទី១៦ ខែមេសា ឆ្នាំ២០២៤។
កាលពីថ្ងៃពុធ អគ្គនាយកដ្ឋានអន្តោប្រវេសន៍ បញ្ជាក់ថា គិតចាប់ពីថ្ងៃទី១ ដល់ថ្ងៃទី៩ ខែមេសា ឆ្នាំ២០២៤ ប្រជាពលរដ្ឋខ្មែរបានធ្វើដំណើរវិលត្រឡប់ចូលក្នុងប្រទេសវិញមានចំនួន ២៥៥ ៩៧៦នាក់ ដើម្បីជួបជុំបងប្អូន សាច់ញាតិ ក្នុងឱកាសពិធីចូលឆ្នាំថ្មី ប្រពៃណីជាតិខ្មែរ។ ក្នុងចំណោមប្រជាពលរដ្ឋដែលត្រឡប់មកក្នុងប្រទេសវិញ គឺមានពលករចំនួន ៦៨ ៥៥៧នាក់ ដែលធ្វើដំណើរតាមបណ្ដាប៉ុស្ដិ៍នគរបាលច្រកទ្វារព្រំដែន។
កាលពីថ្ងៃទី៩មេសា ក្នុងរយៈពេល១ថ្ងៃ មានពលរដ្ឋខ្មែរធ្វើដំណើរចូលតាមបណ្ដាប៉ុស្ដិ៍នគរបាលច្រកទ្វារព្រំដែនចំនួន ៣០ ៧៤៤នាក់ ក្នុងនោះមានពលករចំនួន ៧ ៩១០នាក់។
លោក សុខ វាសនា អគ្គនាយកអន្តោប្រវេសន៍ បានស្នើភាគីពាក់ព័ន្ធបង្កើនការយកចិត្តទុកដាក់ និងការពារសុវត្ថិភាពដល់ប្រជាពលរដ្ឋ និងពលករខ្មែរទាំងចូល និងត្រឡប់ទៅវិញ ជាពិសេសបង្កលក្ខណៈងាយស្រួលក្នុងការធ្វើដំណើរនៅតាមបណ្ដាច្រកទ្វារព្រំដែន។
លោក កត្តា អ៊ន អ្នកនាំពាក្យក្រសួងការងារនិងបណ្ដុះបណ្ដាលវិជ្ជាជីវៈ ធ្លាប់ឱ្យដឹងថា ក្រសួងបានសហការជាមួយអគ្គនាយកដ្ឋានអន្តោប្រវេសន៍ ក្រសួងមហាផ្ទៃ អាជ្ញាធរដែនដី និងអង្គភាពពាក់ព័ន្ធជួយ សម្របសម្រួលការចេញ-ចូលរបស់ពលករខ្មែរនៅតាមច្រកព្រំដែន ដើម្បីបង្កលក្ខណៈងាយស្រួលដល់ប្រជាពលរដ្ឋធ្វើដំណើរចូលក្នុងប្រទេសក្នុងឱកាសពិធីបុណ្យចូលឆ្នាំថ្មី ប្រពៃណីជាតិខ្មែរ។
អ្នកស្រី សេង គន្ធា ពលករខ្មែរបម្រើការងារនៅប្រទេសថៃ ដែលធ្វើដំណើរតាមច្រកទ្វារព្រំដែន បានឱ្យដឹងថា ការធ្វើដំណើរឆ្នាំនេះមានភាពងាយស្រួលជាងឆ្នាំមុន ព្រោះមានអាជ្ញាធរជួយសម្របសម្រួល និងផ្ដល់សេវាមានភាពរហ័សជាងរាល់ដង។
អ្នកស្រីបន្ថែមថា ការចុះជួយអន្តរាគមន៍ និងការពារសុវត្ថិភាពរបស់ប្រជាពលរដ្ឋពីអាជ្ញាធរដែនដី និងកម្លាំងសមត្ថកិច្ចពាក់ព័ន្ធ គឺជាការគិតគូររបស់រដ្ឋាភិបាលចំពោះប្រជាពលរដ្ឋ ដែលធ្វើឱ្យអ្នកដំណើរឆ្លងកាត់ច្រកទ្វារព្រំដែន គឺមានភាពកក់ក្ដៅ មានទំនុកចិត្ត និងមិនភ័យបារម្ភពីអសន្តិសុខ។
អ្នកស្រីបន្តថា ក្នុងពិធីបុណ្យចូលឆ្នាំថ្មីនេះ អ្នកស្រី ស្វាមី និងកូន បានធ្វើដំណើរមកលេងស្រុកកំណើតក្នុងខេត្តពោធិ៍សាត់ ដើម្បីជួបជុំបងប្អូនដូចរាល់ឆ្នាំដែរ។
លោក អ៊ុន ចាន់ដា អភិបាលខេត្តកំពង់ចាម បានឱ្យដឹងថា រដ្ឋបាលខេត្តនឹងរៀបចំព្រឹត្តិការណ៍សង្ក្រាន្តរយៈពេល៤ថ្ងៃ ចាប់ពីថ្ងៃទី១៣ ខែមេសា ឆ្នាំ២០២៤ នៅសួនច្បារមុខសាលាខេត្តកំពង់ចាម ចាប់ពីម៉ោង១៤:០០នាទីតទៅ និងនៅតាមទីតាំងរមណីយដ្ឋាន វត្តអារាមនានាទូទាំងខេត្ត ដើម្បីទទួលប្រជាពលរដ្ឋខ្មែរដែលធ្វើដំណើរពីគ្រប់ទិសទី ជាពិសេសចូលរួមអបអរសាទរទេវតាឆ្នាំថ្មី ព្រះនាម «មហោទរាទេវី»៕