នគរបាលចិន បានធ្វើមាតុភូមិនិវត្តន៍ជនប្រព្រឹត្តល្បែងស៊ីសង និងជនឆបោកជាង ៦៨០នាក់ ពីកម្ពុជា
ក្រសួងសន្តិសុខសាធារណៈរបស់ប្រទេសចិន (MPS) បាននិយាយកាលពីថ្ងៃអាទិត្យថា នគរបាលចិនបានបញ្ចប់ការធ្វើមាតុភូមិនិវត្តន៍របស់ជនសង្ស័យល្បែងស៊ីសង និងជនឆបោកជាង៦៨០នាក់ពី កម្ពុជា។
នគរបាលចិនបានរៀបចំជើងហោះហើរចំនួនពីរដើម្បីនាំយកជនសង្ស័យចំនួន១៣៥ នាក់ចុងក្រោយមកទីក្រុង Wuhan ខេត្ត Hubei ប្រទេសចិនកាលពីដើមថ្ងៃអាទិត្យ។
ប្រភពដដែលបានអោយដឹងទៀតថា នេះជាការបញ្ចប់ការធ្វើមាតុភូមិនិវត្តន៍នៅឆ្នាំនេះ ខណៈដែលនគរបាលចិន និងកម្ពុជាបានបើកប្រតិបត្តិការរួមគ្នា ដើម្បីបង្រ្កាបឧក្រិដ្ឋកម្មពាក់ព័ន្ធនឹងល្បែងស៊ីសង និងការឆបោក។
ការធ្វើមាតុភូមិនិវត្តន៍បានចាប់ផ្តើមនៅដើមខែនេះ ជាលក្ខណៈក្រុមផ្សេងៗគ្នា។
ក្នុងរយៈពេលប៉ុន្មានឆ្នាំចុងក្រោយនេះ នគរបាលចិនបានបន្តពង្រឹងកិច្ចសហប្រតិបត្តិការអន្តរជាតិ ដើម្បីប្រយុទ្ធប្រឆាំងនឹងឧក្រិដ្ឋកម្ម ដូចជាការលេងល្បែងឆ្លងដែន និងការបោកប្រាស់តាមប្រព័ន្ធទូរគមនាគមន៍។
នៅឆ្នាំនេះ នគរបាលចិនបានធ្វើមាតុភូមិនិវត្តន៍ជនសង្ស័យរាប់ម៉ឺននាក់ពីប្រទេសនានា រួមទាំងមីយ៉ាន់ម៉ា ហ្វីលីពីន និងអារ៉ាប់រួម។
អាជ្ញាធរចិន បានប្តេជ្ញាបង្រ្កាបឧក្រិដ្ឋកម្មបែបនេះ ខណៈដែលបន្តក្រើនរំលឹកសាធារណជនឱ្យមានការប្រុងប្រយ័ត្នបន្ថែមទៀត។
