ពលករខ្មែរមួយចំនួនបន្តប្រថុយប្រថានឆ្លងដែនខុសច្បាប់ទៅធ្វើការនៅប្រទេសថៃ
ពលករខ្មែរមួយចំនួនបន្តប្រថុយប្រថានឆ្លងដែនខុសច្បាប់ ទៅធ្វើការនៅប្រទេសថៃទាំងគ្រួសារ ដើម្បីរកលុយដោះស្រាយជីវភាព។ បើទោះពួកគាត់ប្រឈមការចាប់ខ្លួន ចាញ់បោកថៅកែជាញឹកញាប់ និងពេលខ្លះស្ទើរបាត់បង់ជីវិត អំឡុងពេល ប៉ូលិសថៃចុះបង្ក្រាបម្ដងៗ ក្ដី ពួកគាត់ថា គ្មានជម្រើសឡើយ គឺមានតែពាក្យថា «តស៊ូ និងអត់ធ្មត់» ដោយពឹងលើព្រេងវាសនា។
ជាក់ស្ដែង ពលករធ្វើការនៅប្រទេសថៃ លោកស្រី ពក សារ៉ាវ បានឆ្លងកាត់ហេតុការណ៍ជាច្រើន ក្នុងដំណើរជីវិត ជាពលករចំណាកស្រុកជាង ១០ឆ្នាំ ។ តើពលកររូបនេះ មានរឿងរ៉ាវ និងធ្លាប់ជួបការលំបាក អ្វីខ្លះ រហូតមកដល់បច្ចុប្បន្ន?
ពលករធ្វើការនៅប្រទេសថៃ លោកស្រី ពក សារ៉ាវ បានមកធ្វើការនៅ ប្រទេសថៃ ជាង ១០ឆ្នាំ ប៉ុន្តែ ជីវភាពលោកស្រី កាន់តែដុនដាប រកចំណូលពុំសូវបានទៀងទាត់ ព្រោះជួបតែថៅកែបោកប្រាស់ ។ ចំណែក លោកស្រី ក៏ដូចពលករឯទៀតដែរ ពុំហ៊ានប្ដឹងរកយុត្តិធម៌ ទាមទារលុយពីថៅកែបោកប្រាស់ ទាំងនោះឡើយ។
ក្រៅពី ធ្វើការពុំសូវបានលុយហើយនោះ អ្នកខេត្តបន្ទាយមានជ័យរូបនេះ ក៏ប្រឈមនឹងការចាប់ខ្លួនពី សំណាក់ប៉ូលិសថៃ ស្ទើរគ្រប់ពេល ដោយសារតែគ្រួសារលោកស្រី មកធ្វើការនៅប្រទេសថៃ ដោយខុសច្បាប់ ទាំងប្ដីប្រពន្ធ រួមនឹងកូនតូចៗពីនាក់។ គ្រួសារ លោកស្រីពុំមានលិខិតឆ្លងដែនត្រឹមត្រូវទេ ដោយសារគ្មានលទ្ធភាពធ្វើ។
លោកស្រី ពក សារ៉ាវ៖ «សព្វថ្ងៃធ្វើការមិនសល់លុយក្នុងខ្លួន តែចាយមិនគ្រប់អ៊ីចឹង ជីវិតទៅមុខមិនដឹងទៅ រួចទេដឹង ចំណែកភ្នែកក៏ងងឹត។ ខ្ញុំចង់បាន ជីវភាពគ្រប់គ្រាន់ មិនចង់ឱ្យពិបាកដូចសព្វថ្ងៃនេះ ពិបាកចិត្តណាស់ ថ្ងៃខ្លះអង្គុយយំ ព្រោះអី ជីវភាព កាន់តែដុនដាប»។
មានស្រុកកំណើតនៅភូមិ តាដួលឃុំផ្គាំ ស្រុកស្វាយចេក លោកស្រី ពក សារ៉ាវ ពិការភ្នែកម្ខាង តាំងពីនៅកុមារ។ លោកស្រី មានកូនពីនាក់ ម្នាក់អាយុ២ឆ្នាំ និងម្នាក់ទៀតអាយុ១៣ ឆ្នាំ ពុំបានរៀនសូត្រនោះទេ ។ លោកស្រីបានសម្រេច មករកការងារនៅប្រទេសថៃដោយប្រថុយប្រថាន ទាំងគ្រួសារ ព្រោះតែជីវភាពក្រីក្រ។
បច្ចុប្បន្នលោកស្រី ធ្វើការពុំសូវបានលុយនោះទេ ដោយសារតែថៅកែ មិនសូវមានលុយបើកឱ្យ។លោកស្រី ធ្វើការសំណង់ក្នុងមួយថ្ងៃ អាចរកចំណូលបាន ៣៥០បាត គឺស្មើ ជាង ៤ម៉ឺនរៀល ចំណែកប្ដី បាន ៤៥០បាត គឺស្មើ ៥ម៉ឺនរៀល។ លោកស្រី ប្រឹងធ្វើការ ដោយពុំដែលគិតពីការនឿយហត់នោះទេ ដោយដៃម្ខាងបីកូន ដៃម្ខាង ទៀត លាយ ស៊ីម៉ងត៍ ឬយកឥដ្ឋឱ្យគេ នៅលើអគារ កម្ពស់ជាង ៥០ជាន់ ទៅ ៦០ជាន់។
លោកស្រី ពក សារ៉ាវ បានរំលឹកថា កាលពីលោកស្រីចូលមកធ្វើការនៅប្រទេសថៃ គឺដើរដោយ ថ្មើរជើង កណ្ដាល ទាំងយប់ ដោយខុសច្បាប់ ដែលមានគ្នា១០ ទៅ២០នាក់ តាមមេខ្យល់ជាអ្នកនាំផ្លូវ តាមច្រកសំពៅលូន ខេត្តបាត់ដំបង ដើម្បីគេចកុំឱ្យប៉ូលិសចាប់ ។ ចំណែកការដើរ ត្រូវដើររុកតាមព្រៃ ឆ្លងជ្រុះព្រែក និងតាមចម្ការដំឡូង ដែល ចម្ងាយដី ជាង ៥ ទៅ ៦គីឡូម៉ែត្រ ទម្រាំដល់កន្លែងឡើងឡាន គឺជាង៥ម៉ោង។
ពលករម្នាក់ទៀត លោកស្រី ម៉ៅ ស្រីណែត ឱ្យដឹងថា លោកស្រីធ្លាប់ត្រូវបានប៉ូលិសថៃចាប់ដាក់ពន្ធនាគារចំនួន ៧ថ្ងៃម្ដងរួចមកហើយ កាលពីឆ្នាំ២០២៣ អំឡុងពេលលោកស្រី លួចឆ្លងដែនចូលប្រទេសថៃ ដោយខុសច្បាប់ តាមច្រកសំពៅលូន ។ ក៏ប៉ុន្តែក្រោយ ពីប៉ូលិស ដោះលែង ហើយ បញ្ជូនមកខ្មែរវិញ លោកស្រីក៏បន្តលួចចូលម្ដងៗ ទៀត។
លោកស្រី ម៉ៅ ស្រីណែត៖ «ខ្ញុំមិនដែលបាន ដើរស្រួលនឹងគេទេ ព្រោះអី យើងដើរឆ្លងព្រំដែន តាមផ្លូវកាត់ ខ្ញុំអត់បានដើរតាមផ្លូវត្រង់ផង ព្រោះអត់មានប៉ាស្ព័រ។ ដើរម្ដងៗ ជិតទាល់ភ្លឺ ។ ពេលម៉ោង៨ ទៅ៩ គេនាំចេញ ដូច្នេះម៉ោង១ ទៅម៉ោង២ បានដល់កន្លែងឡើងឡាន»។
ពលករទាំងនោះឱ្យដឹងថា ការធ្វើដំណើរដោយខុសច្បាប់ គឺប្រៀប បានទៅនឹងការយកជីវិតទៅប្ដូរ ដើម្បីមករកការងារធ្វើ។ ជាក់ស្ដែង លោកស្រី ពក សារ៉ាវ ធ្លាប់រត់គេច គ្រប់កាំភ្លើង និងធ្លាប់ ជិះឡាន ដែលហ៊ុមព័ទ្ធដោយកៅស៊ូ និងដាក់បន្ថែពីលើ ដើម្បីបិទបាំង ប៉ូលិស ជាច្រើនលើក ហើយនៅពេលមកធ្វើការនៅថៃម្ដង។
លោកស្រី ពក សារ៉ាវ ស្នើឱ្យរដ្ឋាភិបាល លោក ហ៊ុន ម៉ាណែត គិតគូរពីទុក្ខលំបាកដល់ពួកគាត់ តាមរយៈ ការបញ្ចុះតម្លៃធ្វើលិខិតឆ្លងដែន ក្នុងតម្លៃទាបព្រោះពួកគាត់ មិនចង់មកដោយខុសច្បាប់នោះទេ ។ ប៉ុន្តែ ដោយសារតែចំណាយលើឯកសារពាក់ព័ន្ធ ថ្លៃលើសលប់ ដូចជា ម្នាក់ ២ម៉ឺន ទៅ៣ម៉ឺនបាត ដែលស្នើ ៦០០ដុល្លារ ទៅ១.០០០ដុល្លារ ទើបបានឯកសារគ្រប់គ្រាន់ ដូច្នេះ ពួកគាត់ថា ពុំមានលទ្ធភាពនោះឡើយ។
វិទ្យុអាស៊ីសេរីមិនអាចទាក់ទងមន្ត្រីស្ថានទូតខ្មែរប្រចាំប្រទេសថៃ និងប្រធានអង្គភាពអ្នកនាំពាក្យរដ្ឋាភិបាល លោក ប៉ែន ប៉ូណា ដើម្បីសុំអត្ថាធិប្បាយជុំវិញពីបញ្ហាពលករខ្មែរធ្វើការនៅប្រទេសថៃនេះបានទេ នៅថ្ងៃទី៦ កក្កដា។
យ៉ាងណា កាលពីថ្ងៃទី១៨ ខែមេសា កម្លាំងសមត្ថកិច្ចខេត្តបន្ទាយមានជ័យ បានឃាត់ខ្លួនពលរដ្ឋខ្មែរ ត្រៀមឆ្លងដែនខុសច្បាប់ទៅធ្វើការនៅប្រទេសថៃ បានចំនួន ៣២២នាក់ យកមកអប់រំ ក្នុងនោះស្រីចំនួន ១៦០នាក់ និងកុមារចំនួន ២៧នាក់។ ពលរដ្ឋទាំងនេះត្រូវបានស្ទាក់ឃាត់ចំនួន ០៣ករណី នៅថ្ងៃតែមួយ ក្នុងភូមិសាស្ត្រ ស្រុកម៉ាឡៃ ខេត្តបន្ទាយមានជ័យ។
ប្រធានផ្នែកកម្មវិធីប្រយុទ្ធប្រឆាំងអំពើជួញដូរមនុស្ស និងពលករទេសន្តរប្រវេសក៍នៃអង្គការសង់ត្រាល់ (CENTRAL) លោក ឌី ថេហូយ៉ា ប្រាប់វិទ្យុអាស៊ីសេរី នៅថ្ងៃទី២៣ ខែមេសាថា បញ្ហាប្រឈមរបស់ពលករចំណាកស្រុកទាំងនេះ រដ្ឋាភិបាលគួរតែគិតគូរដោះស្រាយ ដើម្បីកាត់បន្ថយផលប៉ះពាល់ចំពោះពលករ។
លោក ឌី ថេហូយ៉ា៖ «រដ្ឋាភិបាលត្រូវតែគិតគូរចំពោះបញ្ហាទាំង៣ហ្នឹង គឺទី១ការការពារ និងលើកកម្ពស់សិទ្ធិរបស់ពួកគាត់ឲ្យគាត់ធ្វើចំណាកស្រុកមានសុវត្ថិភាពទទួលបានប្រាក់ចំណូល និងត្រឡប់មកវិញមានជីវភាពធូរធារ មានមុខរបរ។ ទី២ នៅពេលដែលគាត់រងគ្រោះពីបញ្ហារំលោភបំពានផ្សេងៗ គាត់ត្រូវតែទទួលបាននូវយុត្តិធម៌ ហើយជនល្មើសត្រូវតែទទួលទោសតាមច្បាប់»។
កាលពីឆ្នាំ២០២៣ អង្គការសង់ត្រាល់ (Central) សង្កេតឃើញថា ការចំណាកស្រុករបស់ពលករដោយសារតែជំពាក់បំណុល និងមានជីវភាពខ្វះខាត។ ចំណែកពេលវេលា ធ្វើឯកសារ ចំណាយពេលយូរ ទម្រាំបានឯកសារឆ្លងដែន។ ភាពយឺតយ៉ាវនេះ ជាហេតុធ្វើឲ្យពលករភាគច្រើន បង្ខំចិត្តជ្រើសរើស ការឆ្លងដែនដោយខុសច្បាប់តាមរយៈមេខ្យល់ ដោយរំពឹងថា ឆាប់បានទៅធ្វើការដោះស្រាយបំណុល និងជីវភាព។ ផ្ទុយទៅវិញ ពលករទាំងនោះ ងាយនឹងជួបបញ្ហា ចាញ់បោកមេខ្យល់ និងធ្លាក់ខ្លួនក្លាយជាកម្មវត្ថុ នៃអំពើជួញដូរមនុស្ស និងការកេងប្រវ័ញ្ចកម្លាំងពលកម្មជាដើម។
របាយការណ៍របស់ក្រសួងការងារកម្ពុជា ឱ្យដឹងថា បច្ចុប្បន្នមានពលករខ្មែរជាង ១លាន ២សែននាក់កំពុងធ្វើការនៅប្រទេសថៃ។ ប៉ុន្តែរបាយការណ៍របស់អង្គការសង់ត្រាល់ បង្ហាញថា មានពលករខ្មែរកំពុងធ្វើការដោយស្របច្បាប់ និងមិនស្របច្បាប់នៅប្រទេសថៃជាង ២លាននាក់ ដោយមួយចំនួនពួកគាត់ទទួលរងការរំលោភបំពានសិទ្ធិការងារ និងបាត់បង់ផលប្រយោជន៍ ដែលប៉ះពាល់ដល់បញ្ហាផ្នែកសេដ្ឋកិច្ចគ្រួសារ៕
នគរបាលឃាត់ និងអប់រំពលរដ្ឋប្រុសស្រី ៣០០នាក់ បម្រុងលួចឆ្លងដែនខុសច្បាប់ចូលប្រទេសថៃ ក្នុងភូមិសាស្ត្រស្រុកម៉ាឡៃ កាលពីថ្ងៃទី១៨ ខែមេសា ឆ្នាំ២០២៤។ រូប៖ ស្នងការដ្ឋាននគរបាលបន្ទាយមានជ័យ